Acaki 11

Gedo na bor më Babel

1 Yam cön jö më wi lobo thükül onwongo twakö gïnï lëb acël ëka köp acël. 2 Ï karë na jïï öcakö woth nakun ëdök yo kukïdë, gïn onwongo kany mörö n’obedo bar ï Cinar ëka obedo gïnï kunön.

3 Gïn öcakö twak kën-gï nï, "Bin unu, ëk ëgöö bïrïk ëka ëwang na bër." Gïn otio kï bïrïk nakaka kidi, ëka odok lam më mwönö kin-gï. 4 Cë gïn dökï okobo nï, "Bin unu, ëk ëgër pacö onu, kï gedo na bor na thuno malö ï wi polo, ëk ëmïï nyïng onu ongere ëka kür ëkëth ata ï wi lobo kïbëc."

5 Ëntö Rwoth oidho pïny më nënö pacö ëka gedo na bor na jïï onwongo tye ka gërö. 6 Cë Rwoth okobo nï, "Ka gïn na calö jö n’örïbërë acël na twakö gïnï lëb acël öcakö gïnï tïmö nï köman, cë gin mörö na gïn bino yübö më tïmö ba bino löönögï. 7 Bin unu, ëcïdh pïny erurubo lëbgï ëk kür ngat acëlacël önïang ï lëb awodhe."

8 Cë Rwoth ökëthögï kï kunön ï wi lobo thükül, ëka öwëkö gïnï gërö pacö nön. 9 Manön ënë ömïö ëcakö nyïngë nï Babel—pïën kany nön ënë Rwoth orurubo kï lëb më wi lobo thükül, ëka kï kunön ënë Rwoth ökëthögï ködë ï wi lobo kïbëc.

Ëkwaë ka Cem

10 Man ënë ëkwaë ka Cem.

Ï karë na Cem onwongo dong tye kï mwaka 100, ën önywölö Arpakcad, kinge mwaka arïö n’abwal pii opong ködë ï wi lobo. 11 Ëka kinge na ën önywölö Arpakcad, Cem obedo ï wi lobo pï mwaka 500, ëka ën onwongo dong önywölö awope nökënë ëka anyira.

12 Ï karë n’Arpakcad obedo ï wi lobo pï mwaka 35, ën obino önywölö Cela. 13 Ëka kinge na ën önywölö Cela, Arpakcad obedo ï wi lobo pï mwaka 403 ëka ën onwongo dong önywölö awope nökënë ëka anyira.

14 Ï karë na Cela obedo ï wi lobo pï mwaka 30, ën önywölö Eber. 15 Ëka kinge na ën önywölö Eber, Cela obedo ï wi lobo pï mwaka 403 ëka ën onwongo dong önywölö awope nökënë ëka anyira.

16 Ï karë n’Eber obedo ï wi lobo pï mwaka 34, ën önywölö Peleg. 17 Ëka kinge na ën önywölö Peleg, Eber obedo ï wi lobo pï mwaka 430 ëka ën onwongo dong önywölö awope nökënë ëka anyira.

18 Ï karë na Peleg obedo ï wi lobo pï mwaka 30, ën önywölö Reu. 19 Ëka kinge na ën önywölö Reu, Peleg obedo ï wi lobo pï mwaka 209 ëka ën onwongo dong önywölö awope nökënë ëka anyira.

20 Ï karë na Reu obedo ï wi lobo pï mwaka 32, ën önywölö Cerug. 21 Ëka kinge na ën önywölö Cerug, Reu obedo ï wi lobo pï mwaka 207 ëka ën onwongo dong önywölö awope nökënë ëka anyira.

22 Ï karë na Cerug obedo ï wi lobo pï mwaka 30, ën önywölö Nakor. 23 Ëka kinge na ën önywölö Nakor, Cerug obedo ï wi lobo pï mwaka 200 ëka ën onwongo önywölö awope nökënë ëka anyira.

24 Ï karë na Nakor obedo ï wi lobo pï mwaka 29, ën önywölö Tera. 25 Ëka kinge na ën önywölö Tera, Nakor obedo ï wi lobo pï mwaka 119 ëka ën onwongo dong önywölö awope nökënë ëka anyira.

26 Kinge na Tera obedo ï wi lobo pï mwaka 70, ën onwongo dong önywölö Abram, Nakor ëka Aran.

27 Man ënë ëkwaë ka Tera.

Tera önywölö Abram, Nakor ëka Aran. Ëka Aran önywölö Lot. 28 Ï karë na Tera apap k’Aran pod kwö, Aran obino öthöö ï Ur n’obedo lobo ka jö Kaldaya. 29 Abram ëka Nakor obino onyomo gïnï. Nyïng dhakö k’Abram onwongo ecwodo nï Carai ëka nyïng dhakö ka Nakor onwongo ecwodo nï Milca, ën onwongo obedo nyaka Aran, apap ka Milca ëka Icika. 30 Ëntö Carai onwongo ope k’athïn mörö pïën onwongo ba nywöl.

31 Tera ökwanyö wode Abram, akwarë Lot wod ka Aran, ëka cii wode Carai, dhakö ka Abram. Gïn kïbëc öya ökö kï ï Ur n’obedo pacö ka jö Kaldaya më cïdhö yo lobo Kanaan. Ëntö ï karë na gïn othuno ï Aran, cë gïn kono obedo kany nön.

32 Tera obedo ï wi lobo pï mwaka 205, ëka öthöö ï lobo Aran.