1 Kinge man, Rwoth ötwak k’Abram ï wang lek, nakun kobo nï,

"Abram, kür ibed na lwor!

An abedo kwot na megi,

cül na megi bino bedo na thwönë."

2 Ëntö Abram ögamö nï, "Rwoth Obanga Won Twër, ngö na in ibino mïöna nakun ape k’athïn mörö ëka dhanö na bino leeno jamina ënë Eliejer më Damaciko?" 3 Abram dökï okobo nï, "In ba ïmïa athïn mörö, ëka atic ni n’ënywölö ï öda ënë bino leeno jamina."

4 Cë Rwoth dökï ötwak ködë nï, "Dhanö ni ba bino leeno jamini, ëntö wodi kikokome na in ïnywölö ënë bino leeno jamini." 5 Cë Rwoth okelo Abram yökö ëka okobo nïnë nï, "Nën malö ï wi polo ëka ïkwan wel cër—ka adyer in ïrömö kwanögï." Cë ën okobo nïnë nï, "Ëkwaëni thon bino bedo na pol kömanön."

6 Abram oketho yee mërë ï kom Rwoth, ëka ömïö ëkwanö ën nï kite atïr.

7 Cë Rwoth dökï okobo nïnë nï, "An abedo Rwoth na ënë okeli yökö kï ï Ur na tye ï lobo ka jö Kaldaya, më mïöni lobo ni ëk obed megi."

8 Ëntö Abram ögamö nï, "Rwoth Obanga Won Twër, an atwërö ngeno nïngö nï lobo ni bino bedo mëga?"

9 Rwoth okobo both Abram nï, "Kel nïna nya raa mörö më mwaka adek, nya dyël më mwaka adek, thwön römö më mwaka adek, akur ëka athïn amam."

10 Ën okelo jami ni kïbëc both Rwoth, cë ongunguno ïgï arïö arïö ëka öcanögï na dul acëlacël kemo awodhe, ëntö wïny ën ba ongungunogï. 11 Ka acuth obino më camö ringogï, Abram ryëmögï ökö.

12 Ï karë na ceng dong cwök dönyö, nïnö ömakö wang Abram rwök, ëka pïny na cöl cuc oumo ën ökö. 13 Cë Rwoth okobo nïnë nï, "Myero inge atïr nï ëkwaëni bino bedo Erok ï lobo na pathï mëgï. Ebino mïögï bedo opii ëka ebino yelogï pï mwaka 400. 14 Ëntö an abino mïö pwod ï kom jö na bino yelogï, ëka kinge gïn bino yaa ökö kï kunön nakun nwongo tye gïnï kï lïm na pol. 15 Ëntö in ebino ikoni kanya acël kï kwereni kï kuc. Ebino ikoni na dong itii. 16 Kinge rok më angwën, ëkwaëni bino dwogo gïnï cen kany pïën bal ka jö Amor bara römö ketho can ï komgï."

17 Ï karë na ceng dong ödönyö, ëka pïny ödökö na cöl, agulu na iro dung kï ïë kï mac na lyël ï raa onen ëka owok ï dyere ringo n’engunguno kï kom lee acëlacël. 18 Ï nïnö nön ënë Rwoth oketho cïkërë mërë k’Abram nakun kobo nï, "An amïö lobo ni both ëkwaëni, cakërë kï ï kulo më Ejip thuno ködë naka ï kulo na thwönë më Euparate, 19 lobo ka jö Keni, jö Keniji, jö Kadmon, 20 jö Kit, jö Periji, jö Repa, 21 jö Amor, jö Kanaan, jö Girgac ëka jö Jebuc."