1 Kinge karë mörö, Obanga ötëmö Abraam. Ën okobo nïnë nï, "Abraam!"

Abraam ögamö nï, "An enene."

2 Cë Obanga okobo nï, "Kwany wodi acël këkën Icaka, na in ïmarö, ëka ïcïdh ï lobo më Moria, ëk ïtyër ën kunön na calö tyër awanga ï wi kidi mörö acël na an abino kobo nini."

3 Kodiko cön Abraam öya ëka otweo then më bedo ï wi kana mërë. Ën ökwanyö etic mërë arïö ëka wode Icaka. Ï karë na ën dong otongo yen më tyër awanga, ën öcakö woth më cïdhö ï kabedo n’Obanga onwongo okobo nïnë. 4 Ï nïnö më adek Abraam otingo wangë malö ëka önënö kabedo nön kï kanya bor. 5 Cë Abraam okobo both etic mërë nï, "Bed unu kany kï kana nakun an ëka awobi ni ëcïdhö yo tung ca më wörö Obanga ëka ebino dwogo bothwu."

6 Abraam ökwanyö yen më tyër awanga cë oketho ï wi wode Icaka, nakun ën ömakö mac ëka pala ï cïngë. Ï karë na jö arïö ni tye ka woth kanya acël, 7 Icaka okobo both apap mërë Abraam nï, "Apap!"

Apap mërë ögamö nï, "Eyo woda."

Icaka ögamö nï, "Mac ëka yen tye kany, ëntö römö më tyër awanga tye kwene?" "Römö më tyër awanga tye kwene?"

8 Abraam ögamö nï, "Woda, Obanga kikokome bino mïö römö më tyër awanga." Ëka jö arïö ni ömëdërë gïnï më woth kanya acël.

9 Ï karë na gïn othuno ï kabedo n’onwongo Obanga okobo nïnë, Abraam ögërö keno tyër kany nön ëka öcanö yen ï wie. Ën otweo wode Icaka ëka opyelo ï wi keno tyër, ï wi yen. 10 Cë Abraam ökwanyö pala ëka otingo cïngë malö më neko wode. 11 Ëntö malaika ka Rwoth ocwodo Abraam kï ï polo nï, "Abraam! Abraam!"

Ën ögamö nï, "An enene."

12 Ën okobo nï, "Kür iketh cingi ï kom awobi nön. Kür ïtïm gin mörö ï kome. Kobedi dong an angeo nï in ilworo Obanga, pïën in ba itwona wodi, wodi acël këkën."

13 Abraam otingo wangë, cë önënö römö tye yo kungee na tunge omoko ökö. Ën öcïdhö cë ökwanyö römö ëka ötyërö na calö tyër awanga nakaka wode. 14 Abraam öcakö nyïng kabedo nön nï "Rwoth ënë bino mïö." Ëka naka tin ekobo nï, "Ï wi kidi ka Rwoth ebino mïö."

15 Malaika ka Rwoth ocwodo Abraam wang më arïö kï ï polo. 16 Cë okobo nï, "Rwoth okobo nï, ‘An akwongara kï nyïnga këna, pïën in ïtïmö gin ni ëka ba itwona wodi, wodi acël këkën, 17 an abino mïöni gum, ëka an abino mïö ëkwaëni bedo na pol calö cër na tye ï wi polo ëka na calö kwo na tye ï dhö nam. Ëkwaëni bino löönö jami më pacö ka lang-gï, 18 ëka kï kom ëkwaëni, rok kïbëc na tye ï wi lobo bino bedo kï gum, pïën in ibedo kï winy ï koma.’"

19 Cë Abraam odwogo both etic mërë, ëka öcakö cïdhö gïnï yo Beerceba kanya Abraam obedo ïë.

20 Kinge karë mörö, ekobo both Abraam nï, "Milca thon önywölö ëthïnö k’omeru Nakor: 21 Uj obedo athïn kaö, ömïn mërë Buj, Kemuel (apap k’Aram), 22 Keced, Kajo, Pildac, Jidlap ëka Betuel." 23 Betuel önywölö Rebeka. Milca önywölö ëthïnö aboro kï Nakor ömïn Abraam. 24 Nakor onwongo thon tye kï dhakö nökënë n’ecwodo nï Reuma, n’önywölö thon awope: Teba, Gaam, Taac ëka Maaca.