1 Abraam dökï obino önyömö dhakö nökënë na nyïngë Ketura. 2 Ën obino önywölö nïnë Yimran, Yokocan, Medan, Midian, Icibak ëka Cuak. 3 Yokocan önywölö Ceba ëka Dedan. Ëkwaë ka Dedan ënë jö Acurit, jö Letuc, ëka jö Leum. 4 Awope ka Midian ënë Epa, Eper, Anok, Abida, ëka Elda. Man kïbëc onwongo obedo gïnï ëkwaë ka Ketura.

5 Abraam ömïö gin na kïbëc na ën onwongo tye ködë both wode Icaka. 6 Ëntö ï karë na ën onwongo pod kwö, ën obino ömïö mïc both ëthïnö na mon mërë nökënë önywölö ëka ömïögï öcïdhö ökö kï both Icaka yo ngöm na tye yo kukïdë.

7 Abraam obino obedo ï wi lobo pï mwaka 175. 8 Cë öthöö na mwaka mërë dong dit, na dong otengo rwök cë eiko ën kanya acël kï kwere mërë. 9 Awope mërë Icaka ëka Icimael, oiko gïnï ën ï rwo më Makpela na cwöcwök kï Mamre, ï pwodho ka Epron wod ka Joar n’obedo dhanö më Kit, 10 kunön ënë pwodho na yam Abraam öwïlö kï both jö Kit ëka eiko ën kï dhakö mërë Cara ïë. 11 Kinge na dong Abraam öthöö, Obanga obino ömïö wode Icaka gum, cë Icaka obedo na cwöcwök kï Beer Lakai Roi.

12 Man ënë ëkwaë ka Icimael wod k’Abraam, na Agar, atic ka Cara n’obedo nya jö Ejip, önywölö both Abraam.

13 Man ënë nyïng awope ka Icimael, na lübërë kï kite n’ënywölögï ködë körë kï körë. Nebayot ënë obedo kaö ka Icimael ëka dong Kedar, Adbel, Mibcam, 14 Micma, Duma, Maca, 15 Adad, Tema, Jetur, Napic ëka Kedema. 16 Man ënë awope ka Icimael, n’onwongo obedo gïnï rwodhi më kaka apar arïö na lübërë kï peci ëka këmagï. 17 Icimael obino obedo ï wi lobo pï mwaka 137 cë dong öthöö, ëka eiko ën kanya acël kï kwere mërë. 18 Lobo ka jö ka Icimael öcakërë kï ï Kabila thuno ködë naka yo Cur, na cwök kï wang lobo më Ejip na dök yo Aciria. Ëka gïn onwongo bedo na dagërë gïnï kï utmegogï nökënë kïbëc.

19 Man ënë ëkwaë ka Icaka wod ka Abraam.

Abraam önywölö Icaka. 20 Icaka onwongo dong tye kï mwaka pyer angwën ï karë na ën nyömö Rebeka nyaka Betuel n’obedo dhanö më Aram na tye ï Paddan Aram, ëka amïn Laban dhanö më Aram.

21 Icaka obino ölëgö both Rwoth pï dhakö mërë, pïën Rebeka onwongo obedo alür. Rwoth ögamö lëga mërë cë dhakö mërë Rebeka obino öyac. 22 Ëthïnö obedo ka twomere kën-gï kï ïë, cë Rebeka okobo nï, "Pïngö gin ni tye ka tïmërë ï koma?" Cë ën openyo Rwoth. 23 Ëka Rwoth okobo nïnë nï,

"Rok arïö tye ï ii,

ëka rok arïö kï bothi bino pokere gïnï ökö,

rok acël bino bedo na tëk na löö awodhe,

ëka athïn na dit bino tic pï athïn na tïdï."

24 Ï karë na caa mërë më nywöl dong örömö, Rebeka obino ongeo nï adyer etye kï rudi ï ïë. 25 Athïn n’ëcakö nywölö onwongo kwar ëka kome opong yer, cë gïn obino öcakö nyïngë Ecau.* 26 Kinge, ebino ënywölö ömïn mërë n’ömakö opuny tyën Ecau, cë gïn obino öcakö nyïngë Jakob*. Icaka onwongo dong tye kï mwaka 60 ï karë na Rebeka nywölö ëthïnö mërë.

27 Ëthïnö awope ödöngö ëka Ecau obino obedo adwar na tye kï dïrü, ën onwongo marö woth ï lum, ëntö Jakob onwongo obedo dhanö na lïng alïnga na marö bedo pacö. 28 Icaka onwongo marö Ecau rwök pïën onwongo marö camö ringo leeni na ën neko, ëntö Rebeka onwongo marö Jakob.

29 Ï nïnö mörö acël Jakob onwongo tye ka tedo dëk, cë Ecau obino kï ï lum na kec oneko. 30 Ën okobo both Jakob nï, "Mïa dëk nön mörö acam pïën kec oneka rwök." (Ënë ömïö onwongo ecwodo ën thon nï Edom.)

31 Jakob ögamö nï, "An abino mïöni ka in ïmïa twëröni më bedo kaö."

32 Ecau ögamö nï, "Nën, an dong acwök thöö, ngö na twërö më bedo kaö tïmö nïna?"

33 Ëntö Jakob okobo nï, "Kwongiri botha kono." Cë Ecau okwongere nakun cadhö twërö mërë më kaö both Jakob.

34 Cë Jakob ömïö Ecau kwon ëka dëk. Ën ocemo ëka omodho cë öya öcïdhö.

Manön ënë kite n’Ecau öcadhö kï twërö mërë më kaö.