Acaki 29

Jakob othuno ï pacö ka Laban

1 Cë Jakob ömëdërë kï woth mërë, ëka othuno ï lobo ka jö më kukïdë. 2 Ï karë na ën othuno ï kabedo nön, ën önënö kulo na tye ï pwodho, ëka öthïpan rom adek n’obuto gïnï pïny na cwök kï nget kulo nön, pïën rom onwongo modho pii kï ï kulo nön. Kidi më dhö kulo onwongo thwönë rwök. 3 Ï karë n’öthïpan rom kïbëc gürë gïnï kunön, ëkwath kwanyö gïnï kidi ökö kï ï dhö kulo ëka cakö mïö gïnï rom modho pii. Cë kinge na dong öthïpan rom omodho pii, gïn dwökö kidi kakarë ï dhö kulo.

4 Jakob openyo ëkwath nï, "Utmegona, un ïya unu kï kwene?"

Gïn ögamö nï, "Wan ëya kï ï Aran."

5 Jakob okobo bothgï nï, "Un ingeo Laban n’obedo akwar Nakor?"

Gïn ögamö nï, "Eyo, wan engeo ën."

6 Cë Jakob openyogï nï, "Ën tye na bër?"

Gïn ögamö nï, "Eyo, ën tye na bër. Nën, nyarë Racel ëca tye ka kelo rom."

7 Cë Jakob okobo nï, "Ceng pod tye malö, ëka man ba obedo caa më gürö öthïpan rom kanya acël. Mïï unu rom pii ëk omodhi, ëka itergï ï kwath dökï."

8 Gïn ögamö nï, "Wan ba ëtwërö mïögï pii, naka wang na rom kïbëc ögürë gïnï kanya acël, ëka nwongo ëkwanyö kidi ökö kï ï dhö kulo. Cë wan dong ëcakö mïö rom modho pii."

9 Ï caa n’onwongo ën pod tye ka twak ködgï, Racel obino kï rom k’apap mërë, pïën ën onwongo obedo akwath. 10 Ï karë na Jakob önënö Racel nyaka Laban, n’obedo nero mërë, ëka kï rom ka nero mërë Laban, Jakob öcakö cïdhö anyim cë ökwanyö kidi ökö kï ï dhö kulo ëka ömïö rom ka nero mërë omodho pii. 11 Cë Jakob önödhö lem Racel, ëka öcakö kok rwök kï yom cwinye. 12 Ï karë na Jakob okobo both Racel nï ën ebedo wat k’apap mërë ëka wod ka Rebeka, cë ën örïngö okobo both apap mërë.

13 Cücüth na Laban owinyo köp ï kom Jakob wod k’amïn mërë, ën öbünyö ngwëc më cïdhö romo ködë. Öthünö kore ëka önödhö leme, cë otero ën naka ï ödë. Kï kunön Jakob okobo kite na ën ebedo ködë wat both Laban. 14 Cë Laban okobo nïnë nï, "Adyer in ibedo koma kikokome ëka remona." Cë obedo gïnï kanya acël ködë pï dwe acël.

Jakob önyömö Lea ëka Racel

Kinge na Jakob obedo bothe pï dwe acël, 15 Laban okobo both Jakob nï, "Myero in itii nïna tic abonge cül pïën ön ebedo wat? Kob nïna, kite na myero an aculi ködë."

16 Laban onwongo tye k’anyira mërë arïö, nyarë n’adit nyïngë onwongo ecwodo nï Lea, ëka nyarë na tïdï nyïngë onwongo ecwodo nï Racel. 17 Lea onwongo wangë görü,*29:17 Lea onwongo wangë görü tyën köp mërë ï Lëb Iburu ba ngere. ëntö Racel onwongo tïr ëka leng rwök. 18 Jakob onwongo marö Racel rwök, cë okobo nï, "An abino tio tic nini pï mwaka abïrö pï nyari na tïdï Racel."

19 Laban ögamö nï, "Bedo na bër ka an amïö ën bothi, nakaka mïö both ëcwö mörö nökënë. Pï manön, bed botha kany." 20 Cë Jakob obino otio tic pï mwaka abïrö ëk ëmïë ënyöm Racel, ëntö karë nön onwongo obedo calö nïnö mörö na nönök kï bothe pïën cwinye onwongo ömarö Racel rwök.

21 Cë Jakob okobo both Laban nï, "Mïa dong dhaköna ëk abed ködë, pïën karë na ön emoko dong othum ökö."

22 Cë Laban öyübö karama më nyom ëka ocwodo lwak kïbëc më kabedo nön. 23 Ëntö kothyeno na pïny dong ocido, ën okelo nyarë Lea ömïö both Jakob, ëka Jakob obedo ködë. 24 (Laban ömïö atic mërë na nyakö na nyïngë Jilpa both nyarë Lea më bedo calö atic mërë.)

25 Kodiko mërë na pïny dong oru, Jakob önënö nï Lea ënë onwongo tye kanya acël ködë. Cë Jakob okobo both Laban nï, "Man ngö na in ïtïmö ï koma? An onwongo ba abedo ka tic bothi pï Racel? Pïngö in ïbwöla?"

26 Laban ögamö nï, "Ba obedo thëkwaröwa kï kany më mïö nyakö na tïdï më anyöma na bara ënyömö nyakö na dit. 27 Tyek kono yüb më nyom më cabït ka nyara ni, cë wan ebino mïöni nyakö na tïdï thon, ëntö in myero itii tic nïna pï mwaka abïrö nökënë."

28 Ëka Jakob obino ötïmö nï kömanön. Ï karë na Jakob otyeko cabït acël kanya acël kï Lea, Laban obino ömïö nyarë Racel bothe më bedo dhakö mërë. 29 (Laban obino ömïö atic mërë na nyakö na nyïngë Bila both nyarë Racel më bedo calö atic mërë.) 30 Jakob obino obedo kï Racel thon. Ën ömarö Racel rwök na löö Lea, cë ën obino otio tic both Laban pï mwaka abïrö nökënë.

Ëthïnö ka Jakob

31 Ï karë na Rwoth önënö nï Jakob ba marö Lea, cë öyabö öd nyodo mërë, ëntö Racel onwongo obedo alür. 32 Lea öyac, ëka önywölö athïn n’ëcwö, cë ën öcakö nyïngë Reuben,*29:32 Reuben nyïng ni cal kï nyig köp më Iburu na kobo nï ën önënö pëköna nyïng ni gönyö nï nën, wod. nakun ën okobo nï, "Pïën Rwoth önënö can na mëga, adyer dong cwöra bino maröna."

33 Ëka ën dökï ögamö ïë, cë önywölö athïn n’ëcwö, ëka okobo nï, "Pïën Rwoth owinyo nï an ba ëmara, ömïa dökï man thon." Cë ën öcakö nyïngë Cimeon.*29:33 Cimeon nyïng ni cal kï nyig köp më Iburu na kobo nï owinyo.

34 Kinge dökï ën ögamö ïë, cë önywölö athïn n’ëcwö, ëka okobo nï, "Kobedini dong cwöra bino moko ï koma, pïën anywölö nïnë awope adek." Manön ënë ömïö ëcakö nyïngë Lebi.*29:34 Lebi nyïng ni cal kï nyig köp më Iburu na kobo nï moko.

35 Ëka dökï ögamö ïë, cë önywölö athïn n’ëcwö, ëka okobo nï, "Man ënë karë na an abino pakö Rwoth ïë." Ën öcakö nyïngë Yuda.*29:35 Yuda nyïng ni cal kï nyig köp më Iburu na kobo nï pak. Cë ën ocung kono ökö.