1 Jakob owinyo nï awope ka Laban onwongo tye ka kobo nï, "Jakob otero jami kïbëc n’onwongo apapwa tye ködë ëka onwongo lönyö ni kïbëc kï ï kom lïm k’apapwa." 2 Ëka Jakob thon önënö nï Laban ba dökï nënë na bër kite n’onwongo tye ködë cön.

3 Cë Rwoth okobo both Jakob nï, "Dök ökö cen ï lobo ka kwereni ëka wedeni, cë an abino woth kodi."

4 Cë Jakob ooro dhanö mörö më cwodo Racel ëka Lea më bino ï bar kanya lïm mërë onwongo tye ïë. 5 Ën okobo bothgï nï, "An atye ka nënö nï apapwu ba tye ka nënöna na bër kite na cön, ëntö Obanga n’apapna wörö obedo ka gwököna. 6 Un ingeo nï an atio tic both apapwu kï tëköna kïbëc, 7 ëka apapwu obedo ka bwölöna nakun lökö öcarana wang apar twal. Ëntö Obanga ba oyeo nïnë më tïmö gin mörö na rac ï koma. 8 Ï karë kïbëc ka ën okobo nï, ‘Leeni n’ënywölö n’obedo ölïnga bino bedo cülni,’ cë leeni kïbëc nywölö ëthïnögï n’obedo ölïnga; ëka ka ën okobo nï, ‘Leeni n’ënywölö n’obedo omer bino bedo cülni,’ cë leeni kïbëc nywölö ëthïnögï n’obedo omer. 9 Manön ënë kite n’Obanga ökwanyö lïm k’apapwu cë ömïögï botha.

10 "Ï karë më wapere ka rom kï dyegi, an anënö kï ï lekna nywogi na tye ka kwaro megi dyegi ëka megi rom na komgï obedo omer ëka okomol onyo ölïnga. 11 Malaika k’Obanga ocwoda ï wang lek nï, ‘Jakob.’ An agamö nï, ‘An ene.’ 12 Cë malaika okobo nïna nï, ‘Ting wangi malö ëka ïnën nï nywogi kïbëc na tye ka kwaro megi dyegi obedo omer, okomol onyo ölïnga, pïën an anënö gin na kïbëc na Laban obedo ka tïmö ï komi. 13 An abedo Obanga më Betel, kanya in iwiro möö ïë ï wi kidi ëka kanya in ikwongo kwong ködë botha. Kobedini dong yaa ökö pïöpïö kï ï lobo ni ëka ïdök cen yo lobo kanya enywoli ïë.’"

14 Cë Racel ëka Lea okobo both Jakob nï, "Wan pod etye kï gin mörö më alea kï ï öt k’apapwa? 15 Ën ba bino nënöwa na calö Erok? Ën ba öcadhöwa këkën, ëntö öcamö thon lïm n’onwongo ïmïö bothe pïrwa. 16 Adyer lïm kïbëc na dong Obanga ökwanyö ökö kï both apapwa obedo mëwa ëka ëthïnöwa. Dong ïtïm gin na kïbëc n’Obanga okobo nini."

17 Cë Jakob oketho ëthïnö mërë ëka mon mërë ï ngee kïnaga, 18 ën ökölö leeni mërë më pacö kï jami kïbëc na ën onwongo kï ï Paddan Aram, ëka öcakö cïdhö më dök cen ï lobo Kanaan kanya apap mërë Icaka ökwö ïë.

19 Ï karë na Laban onwongo öcïdhö më nyarö yer rom mërë, Racel ökwalö cal obanga k’apap mërë gïnï kï ï öt. 20 Jakob thon öbwölö Laban dhanö më Aram nakun ba okobo nïnë woth mërë. 21 Ën ölüü kï lïm kïbëc n’onwongo ën tye ködë, ëka öngölö kulo Euparate, nakun dök yo lobo n’otingere më Gilead.

22 Kinge nïnö adek, ekobo both Laban nï Jakob ölüü ökö. 23 Laban ökwanyö wede mërë ölübö kï kör Jakob pï nïnö abïrö ëka ëmakö ën ï lobo n’otingere më Gilead. 24 Ëntö ï kiwor Obanga obino both Laban dhanö më Aram ï wang lek ëka okobo nïnë nï, "Gwokiri, kür ïcïdh ikob gin mörö na bër onyo na rac both Jakob."

25 Jakob onwongo dong oguro këma mërë ï lobo n’otingere më Gilead ï karë na Laban ömakö ën. Laban ëka wede mërë thon oguro këmagï kany nön. 26 Cë Laban okobo both Jakob nï, "Ngö na in ïtïmö? In ïbwöla, ëka itero anyirana na calö jö n’ëmakögï kï ï dhö lwëny. 27 Pïngö in ïlüü alüa ïmüng na ba ïnïanga? Pïngö ba ikobo nïna ëk amii ïcïdh unu kï yom cwiny nakun iwero unu wer kï bul ëka adungu? 28 In thon ba ïmïa amotho ëkwaëna ëka anyirana. In ïtïmö gin mörö më mingo. 29 An atye kï twër më wanöwu kïbëc, ëntö ï kiwor n’opoth Obanga k’apapni okobo nïna nï, ‘Gwokiri, kür ïcïdh ikob gin mörö na bër onyo na rac both Jakob.’ 30 Man dong ïya ökö, pïën ïmïtö dök ï öt k’apapni. Ëntö pïngö in ïkwalö obangana gïnï?"

31 Jakob ögamö dhö Laban nï, "An onwongo alwor, pïën an athamö nï in ïtwërö gamö anyirani ökö kï botha tëtëk. 32 Ëntö ka in inwongo ngat mörö na tye k’obangani gïnï, ngat nön ba bino kwö. Rang gin mörö këkën n’obedo megi ï nyim wede onu ëka ïkwany ïcïdh ködë." Jakob ba ongeo nï Racel onwongo ökwalö cal obanga k’apap mërë gïnï.

33 Laban ödönyö ï këma ka Jakob, ï këma ka Lea ëka ï këma ka mon arïö n’obedo etic, ëntö ën ba onwongo gin mörö. Kinge na ën odonyo yökö kï öd këma ka Lea, ën ödönyö ï këma ka Racel. 34 Ëntö Racel onwongo ökwanyö cal obanga k’apap mërë gïnï, cë okethogï ï gin më bedo ï ngee kïnaga ëka obedo ï wie. Laban örangö jami kïbëc na tye ï öd këma, ëntö ba onwongo gin mörö.

35 Racel okobo both apap mërë nï, "Adwongna, kür akëmö omaki ï koma ka ïnënö nï ba atwërö yaa malö ï nyimi, pïën an atye kï two dwena." Cë Laban ömëdërë kï rangö cal obanga mërë gïnï ëntö ba onwongo.

36 Akëmö ömakö Jakob, cë öcakö twak kï Laban nakun kobo nï, "Ngö na rac na an atïmö?" Ën openyo Laban nï, "Bal ngö na an atïmö na mïö in itye ka lübö köra rwök? 37 Kobedini na dong in ïrangö ï jamina kïbëc, inwongo gin mörö n’obedo megi? Keth ï nyim wedeni ëka mëga, cë ïmïïgï öngöl köp ï kin ön jö arïö.

38 "An abedo bothi pï mwaka pyer arïö. Megi rom ëka megi dyegini ïgï ba ööny. An thon ba acamö nywogini mörö. 39 Ka lee më thim oneko romni onyo dyegini an ba akelo bothi, an kikoma ënë acülö. Ëka, in ïmïa acülö pï lee mörö n’orwenyo, kadï bed nï ëkwalö kiceng onyo kiwor. 40 Man ënë kite n’onwongo an atye ködë: Ceng wanga kiceng ëka koyo neka kiwor, cë nïnö kwërö wanga ökö. 41 Pï mwaka pyer arïö na an abedo ködë ï pacöni, an atio bothi mwaka apar angwën pï anyirani arïö, ëka pï mwaka abicël pï lïmni. In ibedo ka lökö öcarana wang apar külü! 42 Ka Obanga k’apapna, Obanga k’Abraam ëka Obanga n’apapna Icaka wörö, onwongo ba ögwöka, in onwongo ïtwërö ryëmöna kï cïnga nono. Ëntö Obanga önënö kite na an lïmö kï can ködë, tic na tëk na an atïmö, ëka ocoki ï kiwor n’opoth."

43 Laban okobo both Jakob nï, "Lea ëka Racel obedo gïnï anyirana, ëthïnögï obedo gïnï ëkwaëna, ëka lïm kïbëc obedo mëga. Gin na in itye ka nënö kïbëc obedo mëga. Ëntö ngö na an atwërö tïmö ï kom anyirana tin, onyo ëthïnö na gïn önywölö? 44 Bin dong, ëk emok cïkërë, in ëka an, ëk obed caden ï kin ön."

45 Cë Jakob ökwanyö kidi ëka oketho na calö wïr. 46 Ën okobo both wede mërë nï, "Cök unu kite mörö." Gïn öcökö kite ëka eurogï ï athuketh, cë ocemo gïnï ï nget athuketh. 47 Laban öcakö nyïng kabedo nön nï Jegar Caduta,* ëntö Jakob öcakö nyïngë nï Galeed.

48 Laban okobo nï, "Kite n’euro ni obedo caden më cïkërë tin, ï kin in kï an." Manön ënë gin n’ömïö ecwodo nï Galeed. 49 Onwongo thon ecwodo nï Mijpa,* pïën ën okobo nï, "Ëk Rwoth ögwök kin ön ï karë na ngat acëlacël bino bedo na bor kï both awodhe. 50 Ka in ibino yelo anyirana onyo ka in ibino nyömö mon nökënë më mëdö ï kom anyirana, kadï bed nï ngat mörö ope kod onu, myero ipo nï Obanga obedo caden ï kin in kï an."

51 Cë Laban dökï okobo both Jakob nï, "Athuketh më kidi ni ene, ëka an aketho wïr ni ï kin in kï an. 52 Athuketh ni obedo caden, ëka wïr ni obedo caden, na an ba abino kadhö më bino bothi më wanöni, ëka in ba ibino kadhö athuketh më kidi ni ëka wïr ni më bino wanöna. 53 Ëk Obanga k’Abraam ëka Obanga ka Nakor,* Obanga k’Apapgï, öngöl köp ï kin ön."

Cë Jakob okwongo kwong kï nyïng Obanga n’apap mërë Icaka wörö. 54 Jakob oneko lee ëka ötyërö na calö tyër awanga ï wi kidi, cë ocwodo wede mërë më bino cem. Kinge na gïn otyeko cem, gïn önïnö ï wi kidi kunön.

55 Kodiko cön na pïny dong oru, Laban omotho ëkwaë mërë ëka anyira mërë kï nödhö lemgï, ëka ölamö nïgï gum. Cë opokere ködgï ëka ödök yo pacö mërë.