1 Kinge karë mörö, adit na löö poko köngö ölök ëka adit na löö tedo ogati ka rwoth më Ejip ötïmö gïnï bal both adwong-gï n’obedo rwoth më Ejip. 2 Parao onwongo öngö ï kom edite tic mërë arïö, adit na löö poko köngö ölök, ëka adit na löö tedo ogati, 3 cë oterogï ï buc ï öt k’adit na kürö pïny, kanya Yocepu onwongo etweo ïë. 4 Adit na löö acikari na kürö pïny ömïögï both Yocepu cë ën ögwökögï.

Kinge na gïn dong obedo ï buc pï karë mörö, 5 ngat acëlacël—adit na löö poko köngö ölök ëka adit na löö tedo ogati ka rwoth më Ejip n’onwongo etweogï ï buc—oleko lek mërë ï kiwor acël nön, nakun kör lek ka ngat acëlacël path.

6 Ï karë na Yocepu obino bothgï kodiko mërë, ën önënögï na cwinygï ba yom. 7 Cë ën openyo edite tic ka Parao n’onwongo etweogï ï buc ködë ï öt k’adwong mërë nï, "Pïngö cwinywu tin ba yom?"

8 Gïn ögamö nï, "Wan kïbëc tin eleko lek, ëntö ngat mörö ope na römö gönyö nïwa thërë."

Yocepu okobo nïgï nï, "Pathï Obanga ënë gönyö kör lek? Kob nïna unu lekwu."

9 Adit na löö poko köngö ölök öcakö kobo lek mërë both Yocepu nakun kobo nï, "Ï lekna, an anënö yath ölök ï nyima, 10 ëka ï kom yath onwongo tye ïë jangë adek, cücüth na pod odhugo më cakö thuro, cë önyakö nyige ëka öcëk ökö. 11 Okopo ka Parao onwongo tye ï cïnga, cë apüdö nyig ölök ëka abïö ï okopo ka Parao cë amïö ï cïngë."

12 Yocepu okobo nïnë nï, "Lek nonu ene, jang ölök adek nyutho nïnö adek. 13 Ï kin nïnö adek, Parao bino gönyöni ëka bino dwököni ï dhö ticni cë in ibino mïö ën okopo ï cïngë, kite na yam ïtïmö ködë cön ï karë na in ibedo adit na löö poko köngö ölök mërë. 14 Ëntö myero ipo pïra ka jami kïbëc bino woth na bër kodi, akwai nï in thon ïtïm nïna kïca ëka ïtham pïra, ëk ikob both Parao köp ï koma ëk ën thon ögönya ökö kï ï öd buc ni. 15 Pïën an ëkwala akwala tëtëk kï both jö Iburu ëka thon etwea ï buc kany nono na ba abalö gin mörö."

16 Ï caa n’adit na löö tedo ogati önënö nï ëgönyö lek k’awodhe na bër, ën thon okobo both Yocepu mëgë nï, "An thon aleko lek nï onwongo adoko aditi adek më ogati ï wia. 17 Ï adïta na malö onwongo tye ïë kwa ogati na papath pï Parao, ëntö wïny onwongo tye ka camö ogati kï ï adïta na an ayëö ï wia."

18 Yocepu ögamö nï, "Lekni nön thërë ene: Aditi adek nyutho nïnö adek thon. 19 Ï kin nïnö adek Parao bino gönyöni ökö ëka nguno nguti cë ngabö komi ï wi yath ëka wïny bino camö ringo komi ökö."

20 Ï nïnö më adek onwongo obedo nïnö na yam ënywölö Parao ïë, ëka ën öyübö karama pï edite mërë kïbëc. Ën öcakö kelo adit na löö poko köngö ölök ëka adit na löö tedo ogati ï nyim edite mërë. 21 Ën ödwökö adit na löö poko köngö ölök ï tic mërë, ëk ën dökï ömëdërë kï mïö okopo ï cïng Parao, 22 ëntö ën öngabö adit na löö tedo ogati kite na Yocepu ögönyö kï lek mërë.

23 Adit na löö poko köngö ölök ba dökï opo pï Yocepu; wie obino owil ökö ï kome.