1 Kinge mwaka arïö, Parao rwoth më Ejip oleko lek nï ën onwongo ecung ï lak kulo më Nail. 2 Cë dhok abïrö n’oluk ëka n’öcwëë odonyo gïnï yökö kï ï kulo ëka öcakö gïnï camö lum. 3 Cë dhok abïrö nökënë n’ölübö körgï odonyo kï ï kulo më Nail na komgï rarac ëka omogere obino ocung gïnï ï nget dhok n’onwongo tye ï lak kulo. 4 Cë dhok n’onwongo rarac ëka omogere öcamö dhok abïrö n’oluk ëka n’öcwëë ökö. Cë Parao öcakö coo ökö kï ï wang nïnö.

5 Ën dökï önïnö cë oleko lek më arïö mërë. Oleko nï ënënö wi kal abïrö na komgï yot ëka bër, öcëk nakun tye ka döngö ï kom tyën kal acël. 6 Kinge manön, wi kal abïrö nökënë n’oner ödöngö na rarac ëka yamö na lyeth më oro onerogï ökö. 7 Cë wi kal abïrö na rarac öcakö mwönyö wi kal na bëcö ökö. Parao ocoo kï ï wang nïnö cë onwongo nï eleko lek dökï.

8 Kodiko na pïny dong oru, cwinye onwongo ba yom, cë ömïö ën ooro köp më cwodo ajwogi ëka ëryëkö kïbëc më Ejip. Parao öcakö kobo nïgï lek mërë, ëntö ngat mörö ope n’onwongo twërö gönyö nïnë lek nön.

9 Cë adit na löö poko köngö ölök okobo both Parao nï, "An tin dong apo ï kom balna. 10 Ï karë n’onwongo Parao cwinye öwang ï kom etic mërë, cë otweowa k’adit na löö tedo ogati ï öt k’adwong na löö kürö pïny. 11 Cë ï nïnö mörö acël wan kïbëc ebino eleko lek ï kiwor acël, ëka lek acëlacël onwongo tyën köp mërë papath. 12 Awobi mörö më Iburu onwongo tye ködwa ï buc. Ën onwongo obedo atic k’adit na kürö pïny. Wan ebino ekobo nïnë lekwa ëka ën obino ögönyö nïwa, nakun gönyö lek ka ngat acëlacël n’opore kï lek mërë. 13 Ëka kite na ën ögönyö kï lekwa, obino ocobere kömanön. An ebino ëdwöka ï dhö ticna, ëka adit na löö tedo ogati ebino ëngabö kome ï wi yath."

14 Parao öcakö oro më cwodo Yocepu, cë ekelo ën pïöpïö kï ï buc. Ëmïö ölyëlö wie, ölökö böng mërë ëka obino ï nyim Parao.

15 Parao okobo both Yocepu nï, "An aleko lek ëka ngat mörö ope na twërö gönyö tyën köp mërë. Ëntö an awinyo köp ï komi nï in ka iwinyo lek ïtwërö gönyö tyën köp mërë."

16 Yocepu ögamö dhö Parao nï, "Pathï an, ëntö Obanga bino mïö Parao agam na yomo cwinye."

17 Cë Parao okobo both Yocepu nï, "Ï lekna, an onwongo acung ï lak kulo më Nail, 18 ëka dhok abïrö n’öcwëë na komgï oluk odonyo kï ï kulo ëka öcakö gïnï camö lum. 19 Kï körgï, dhok abïrö nökënë dökï odonyo kï ï kulo na komgï rarac, ëka n’omogere rwök. Koth dhok na rarac nön anaka yam bara anënö ï lobo më Ejip. 20 Dhok n’onwongo omogere na komgï rarac, öcakö camö dhok abïrö n’öcakö donyo n’öcwëë na komgï oluk. 21 Ëntö kadï kinge na gïn dong öcamö dhok n’öcwëë nön, gin mörö ope na nyutho nï gïn öcamö dhok n’öcwëë nön ökö, pïën onwongo gïn pod omogere ëka komgï rarac calö kite n’onwongo gïn tye ködë cön. Na dong atyeko lek nön, cë acoo ökö kï ï wang nïnö.

22 "An thon anënö wi kal abïrö n’ödöngö ï tyën kal acël n’öcëk na bër. 23 Kï körgï, anënö wi kal abïrö na reco, n’önwëng na yamö na lyeth më oro onero. 24 Wi kal n’önwëng ömwönyö wi kal abïrö na bëcö ökö. Akobo lek ni both ajwogi, ëntö ngat mörö onwongo ope na twërö gönyö tyën köp mërë nïna."

25 Cë Yocepu okobo both Parao nï, "Lek ka Parao tye acël këkën. Obanga onyutho both Parao gin na ën cwök tïmö. 26 Dhok abïrö na bëcö nyutho mwaka abïrö ëka wi kal abïrö na bëcö nyutho thon mwaka abïrö. Lek nön tyën köp mërë tye acël këkën. 27 Dhok abïrö n’omogere na komgï rarac n’obino kï körgï, ëka wi kal abïrö na yamö na lyeth më oro onero nyutho mwaka abïrö më kec.

28 "Obedo kite na an akobo both Parao: Obanga otyeko nyutho both Parao ngö na ën ëcwök tïmö. 29 Pï mwaka abïrö, cem bino cëk na büp ï lobo Ejip kïbëc. 30 Ëntö kinge manön, mwaka abïrö nökënë bino lübö na kec bino bedo na tye ïë, wi jïï bino wil ökö ï kom cem na yam öcëk nïgï ï Ejip. Ëka kec nön bino balö lobo rwök. 31 Cem na büp n’onwongo öcëk ï lobo ba dökï ebino po ïë, pïën kec na bino lübö manön bino bedo na rac rwök. 32 Lek ka Parao na ën oleko arïö nön nyutho nï Obanga ënë omoko köp nön ëka Obanga bino mïö cobere ï karë na cwöcwök.

33 "Dong pï manön, Parao myero örang dhanö mörö na ryëk na nïang ëk oketh ölöö lobo Ejip kïbëc. 34 Parao myero oketh edite na löö lobo, ëk gïn öcök acël më abic më cem na bino cëk ï lobo Ejip pï mwaka abïrö na cem bino cëk na büp. 35 Myero gïn öcök cem kïbëc ï mwaka na cem bino cëk ïë na büp, ëk ëgwök ï dere më kanö cem na tye ï thë löc ka Parao. 36 Cem nön ebino gwökö pï loboni, më kürö mwaka abïrö na kec bino podho ï Ejip, ëk kür kec onek jö më lobo ni ökö."

37 Parao ëka edite mërë kïbëc önënö nï thama ni bër. 38 Parao okobo both etic mërë nï, "Ëtwërö nwongo dhanö nökënë na cal kï dhanö ni, na tye kï cwiny k’Obanga?"

39 Cë Parao okobo both Yocepu nï, "Kite na dong Obanga onyutho köp ni kïbëc bothi, ngat mörö ope na ryëk ëka na wie tio calö in. 40 In ënë ibino löönö öda ëka jöga kïbëc bino bedo ï thë löcni. An abino löönöni pï then na an atye ïë këkën."

41 Parao okobo both Yocepu nï, "An kobedini dong akethi më bedo alöc më Ejip kïbëc." 42 Cë Parao öwödhö agïth mërë n’eketho anyuth ïë kï ï nya cïngë ëka örëpö ï nya cïng Yocepu. Ën thon oruko Yocepu kï böng na mïmïla na bëcö ëka ömïö oruko nyör n’ëyübö kï gol ï ngute. 43 Parao ömïö Yocepu öngwëcö kï gadigadi na calö alübkörë më arïö kï löc, nakun jïï kïbëc wöö kï redo ï nyime nï, "Rum cöngwu pïny!" Manön ënë kite n’eketho kï Yocepu më bedo alöc më lobo Ejip kïbëc. Parao ömïö Yocepu öngwëcö kï gadigadi

44 Cë Parao okobo both Yocepu nï, "An Parao, dhanö mörö ope na bino tingo cïngë onyo tyënë ï lobo Ejip kïbëc abonge twëröni." 45 Parao ömïö nyïng both Yocepu nï Japenat Panea ëka ömïö ën önyömö Acenat nyaka Potipera, n’onwongo obedo alamdhök më On, më bedo dhakö mërë. Cë Yocepu öcakö wowotha më rimo lobo Ejip kïbëc.

46 Yocepu onwongo dong tye kï mwaka pyer adek ï karë na ën dönyö ï tic ka Parao rwoth më Ejip. Ëka Yocepu öya ökö kï ï nyim Parao cë öcakö wowotha ï lobo më Ejip kïbëc. 47 Ï mwaka abïrö, cem obino öcëk na büp rwök. 48 Yocepu öcökö cem n’öcëk ï lobo Ejip pï mwaka abïrö nonu cë ökanö ï dërö më kanö cem na tye ï kabedo kïbëc ï peci. Ï pacö acëlacël, ën oketho cem n’öya kï ï pwothi kïbëc n’ögürö kany nön. 49 Yocepu ökanö cem na büp rwök ï dere më kanö cem, naka onwongo dong cal kï kwo na tye ï dhö nam, cë ömïö ën öwëkö pimo ökö pïën onwongo dwong rwök na ba römö pimere.

50 Na mwaka më kec bara othuno, Yocepu onwongo dong tye k’ëthïnö awope arïö n’Acenat nyaka Potipera, alamdhök më On, önywölö. 51 Yocepu öcakö nyïng kaö mërë Manace* nakun kobo nï, "Pïën Obanga ömïö wia owil ökö kï ï can-na ëka kï ï öt k’apapna kïbëc." 52 Athïn më arïö ën öcakö nyïngë Epraim, nakun kobo nï, "Pïën Obanga ömïa anywöl ï lobo na an anënö can ïë."

53 Ï karë na mwaka abïrö më cem na büp dong ojik ï lobo Ejip, 54 cë mwaka abïrö më kec öcakërë, kite na Yocepu yam okobo ködë. Kec onwongo ömakö lobo kïbëc, ëntö ï lobo më Ejip kïbëc cem onwongo tye ïë. 55 Ï karë na dong cem othum ökö kï ï lobo Ejip kïbëc, jïï öcakö koko both Parao pï cem. Cë Parao okobo both jö më Ejip kïbëc nï, "Cïdh unu both Yocepu ëk ïtïm unu ngö na ën bino kobo niwu."

56 Ï karë na kec onwongo örömö lobo kïbëc, Yocepu öyabö dere më kanö cem ëka öcakö cadhö cem both jö më Ejip, pïën kec onwongo dong tye na rac ï lobo Ejip kïbëc. 57 Jö më lobo nökënë thon obino gïnï yo Ejip më wïlö cem kï both Yocepu pïën kec onwongo dong tye na rac rwök ï wi lobo thükül.