Êxodo 11

Yits’ıd’esın divan k’ane qexhe

1 Rəbbee Mısayk’le eyhen:

– Zı fironulqayiy Misirılqa sayib balyaa g’axuvles. Mançile qiyğa mang’vee şu inçe g’avkvasınbı. Saccu avak’neva vuk’lele haa’as. 2 Milletık’le eyhe, adameeşeyiy yedaaşe hiqiy-allane Misirbışike nuk’raykeyiy k’ınəəğəyke hı’iyn karbı heqqecen.

3 Rəbbee məxüd ha’a, Misirbışde ulesqa millet yugda qadayle. Mısamee fironne insanaaşik’le, Misirne milletık’le geer xərna insan xhinne ats’a eyxhe.

4 Mısee fironuk’le eyhen:

– Rəbbee inəxüdud eyhe: «Xəm sura vuxhamee, Zı Misirne yı’q’neençe ılğeç’es. 5 Taxtıl gyu’arasde fironne ts’erriyne dixele girğıl, suk giviyxərne g’ayeyne yı’q’əl giy’ırne nukarne dixelqamee, gırgıng’un ts’eppiyn dixbı hapt’asınbı. Həyvanaaşinıd çikana ts’ettiyn balabı hatt’asınbı. 6 Misirvolle xədın geşşuy ixhes. Məxdın geşşuy mankilqameeyid ıxha deşdiy, mançile qiyğad mısacad ixhes deş. 7 İzrailybışilqayiy cone çavra-vəq’əlqa xvaayib gihivxhas deş». Mançike şok’le ats’axhxhesın Rəbbee İzrailybıyiy Misirbı nəxübiy sana-sang’uke curav’u. 8 Yiğın insanar zasqa abı, yizde g’elybışeeqa qutyopk’ul eyhesın: «Ğunar hoora, vaqa qihna hoyharan gırgın milletıd hooracen!» Mançile qiyğa zı əlyhəəsda.

Manıd uvhu, Mısa qəlın qek’a fironusse qığeç’ena.

9 Rəbbee Mısayk’le eyhen:

– Zasse Misir geed əlaamatbı hagvas əxecenva, fironee şol k’ırı alixhxhes deş.

10 Mıseeyiy Harunee man gırgın əlaamatbı fironuk’le hagveyid, Rəbbee fironuke hı’t’iy hı’ı, mang’vee İzrailybı cune ölkeençe g’avku deş.