1 İbrıhımee sa merna xhunaşşe hee’e. Məng’ı’n do Qetura ıxha. 2 Qeturee mang’us inbı vuxooxa: Zimran, Yoq’şan, Medan, Midyan, İşbaq, Şuax. 3 Yoq’şanıke Şeva, Dedan g’abayle. Dedanıke inbı g’abı: Aşşurbı, Letuşbı, Leumbı. 4 Midyanın dixbı: Efa, Efer, Xanok, Avida, Eldaa. İnbışin gırgınbı Qeturayn uşaxar vob.

5 İbrıhımee cun gırgın kar I’saq’ıs hele. 6 Həmbal zəiyfabışde dixbışisme paybı hele. Qik’assecar mang’vee manbı I’saq’ısse şargılyne surabışilqa g’uxoole.

7 İbrıhımee vəşşe yights’ale xholle (175) sen ha’a. 8 Mang’vee xıliyna ı’mı’r haa’a, dyunyeyle ats’ı, q’əs qıxha qek’a. Məxür mana ahaleeqa ayk’an. 9 Dixbışe I’saq’ee, I’smı’ı’lee mana Mamreyne k’anene Maxpela eyhene mağaree k’eyxha. Mana mağara Q’etbışda eyxhene Tsoxarne dixene Efronne cigeeniy vob. 10 Man ciga İbrıhımee Q’etbışike alişşu ıxha. İbrıhımnab cune xhunaşşeyna Sarraynab nyaq’v maa’ab vuxha. 11 Allahee İbrıhım qik’uyle qiyğa mang’une dixes, I’saq’ıs, xayir-düə hoole. I’saq' Beer-Laxay-Roi eyhene cigee axva ıxha.

12 Sarrayne həmbalee misirğançene Haacaree İbrıhımıs uxuyne I’smı’ı’lyna nasıl ina vob. 13 Çiçiqab qihna vuxuyne I’smı’ı’lyne dixbışin dobı inbı vod: I’smı’ı’lyna xərna dix Nevayot, Qedar, Adbeel, Mivsam, 14 Mişma, Duma, Massa, 15 Xadad, Tema, Yetur, Nafiş, Qedma. 16 I’smı’ı’lin dixbı inbı vob. Manbışin dobı co aaxvane cigabışisiy xivaaşis huvu. Manbı cone yits’ıq’vəne (12) nasılen ç’ak’ınbı vuxha.

17 I’smı’ı’lee vəşşe xhebts’ale yighılle (137) sen ha’a. Mana qek’ana, məxür mana ahaleeqa ayk’an. 18 I’smı’ı’like g’abıynbı Xavila eyhene cigeençe Şur eyhene cigeeqameene cigee aaxva vuxha. Şur Aşşurqa əlyhəəme Misirne ögil vooxhe. Manbı çocaaşika aldaaxhvancab vuxha.

19 İbrıhımne dixen I’saq’ın taarix inəxüd vod: I’saq' İbrıhımıke g’arı. 20 I’saq’ee Paddan-Arameençe Aramğançene Betuelyna yiş, Lavanna yiçu Rivq’a hee’eng’a, mang’uqa yoq’ts’al (40) senniy vod.

21 I’saq’ee xhunaşşe vuxhne ideexvava Rəbbis düə hav’u. Rəbbik’le I’saq’na düə g’avxhu, mang’una xhunaşşe Rivq’a vuxhne ayxu.

22 Yedine vuxhnee uşaxar sıç’ooka giviyğal. Məng’eeyid «Nişil-allane in yizde vuk’lelqa qadıva?» uvhu, Rəbbike qiyghanas hiyeek’an. 23 Rəbbee məng’ı’k’le eyhen:

– Yiğne vuxhne q’ölle millet vod,

Yiğne vuxhnençe q’ölle xalq' qığeç’es.

Sa xalq' manisa xalq’ıle gucuka ixhes,

Xərne çocee k’ıning’us g’ullux haa’as.

24 Rivq’ayna uxasda gah qabıyng’a, ats’axhxhen məng’ı’ne vuxhne q’ömkaler vuxhay. 25 Ts’erree uxuyne uşaxın g’ekva ç’əradaniy, sayir mana xhayıke hı’iyn kar xhinne xhırıra ıxha. Mançil-allad mang’un do Esav (xhırıra) giyxhe. 26 Qiyğar manasa çoc Esavne mı’q’leyke at’irq’ın dyunyelqa qarayle. Mançil-allad mang’unud do Yaaq’ub (mı’q’leyke at’irq’ın) giyxhe. Manbı vuxhayng’a I’saq’ıqa yixhts’al (60) senniy vod.

27 Çocar ç’ak’ı qeebaxhe: Esav yugna k’onay, xaa hüdöörəxəna insan eyxhe, Yaaq’ubır hexxan nıq' denana xaana insan eyxhe. 28 I’saq’ıs Esavniyxhe geer ıkkiykanna, mang’vee ı’xı’yn həyvanar cus ıkkanəxüd eyxheva. Rivq’aysmee Yaaq’ubniyxhe ıkkiykanna.

29 Sa yiğıl Yaaq’ubee yıq' haa’a. Esavır çoleençe orzul-ortul mıssıra qarayle. 30 Esavee Yaaq’ubık’le eyhen:

– Mane ç’ərane karake sık’ınin zas hele oxhanas, mıs qıxha.

Mançil-alla mang’us q’öd’esın do Edom (ç’ərara) giyxhe. 31 Yaaq’ubee eyhen:

– Manke ts’erriyna dixvalla zas hevle.

32 Esavee eyhen:

– Zı mıssınçe qek’ang’a zas ts’erriyna dixvalla nişistannane?

33 Yaaq’ubee eyhen:

– Ts’etta zas k’ın he’e!

Esavee k’ın g’assır ts’eppiyna dixvalla Yaaq’ubıs qoole. 34 Yaaq’ubee Esavıs hüvəyna yıq’iy gıney hele. Esav otxhun-ulyodğu qığeç’u ayk’anna.

İnəxüb Esavne ulesqa ts’erriyna dixvalla kar xhinne qavayle deş.