Gênesis 38

Yahudayiy Tamar

1 Mane gahıl Yahuda çocaaşike curxha, Xira donane Adullamğançene sa insanne k’anyaqa hark’ın, maa’ar axva. 2 Yahudayk’le maa’ar Şua donane Kana’anbışde sa adamiyna yiş g’eece. Yahudee mana hey’ı, məng’ı’ka g’ılexha. 3 Mana zəiyfa vuxhne ayxu, sa dix uxooxa, Yahudee mang’un do Er giyxhe. 4 Zəiyfa meer vuxhne ayxu, dix uxooxa, doyud Onan giyxhe. 5 Qiyğa meer dix uxu, do Şela giyxhe. Zəiyfee mana uxooxang’a, Yahuda Keziv eyhene şaharee ıxha.

6 Yahudee ts’erriyne dixes Erıs xhunaşşe hee’e, məng’ı’n do Tamar ıxha. 7 Yahudayna ts’erriyna dix Er Rəbbinemee karaı’dəəna insan ıxha. Mançil-allar Rəbbee mana gek’ana.

8 Yahudee Onanık’le eyhen:

– Çocune xhunaşşeyka g’alixhe. Yiğın g’aynivalin şib qele, çocunemee nasıl hee’e.

9 Onanık’le ats’anniy, mana nasıl cuna devxhesva. Mançil-allar mana çocune xhunaşşeyka g’alirxhumee, toxum mıgleqqa k’yaa’a vuxha, çocus nasıl hidyaa’asva. 10 Mang’vee haa’ana iş Rəbbine ulesqa yugba qidyabı, Rəbbee manar gek’ana.

11 Yahudee cune sossak’le Tamarık’le eyhen:

– Yeera dekkıne xaaqa sip’ıriy xhinne sayk’le. Yizda dix Şela xər qixhesmee, adamiys imeek’an.

Yahuda qəyq’ən ıxha, Şelar cun, çocar xhinne, qek’ava. Tamar ark’ın, dekkıne xaa eexva. 12 Xılece gahbışile qiyğa Şuayna yiş yeexhena Yahudayna xhunaşşe qeek’ana. Yahuda yas ç’əvuvxhayle qiyğa, cune hambazıka Adullameençene Xirayka sacigee Timna eyhene cigeeqa syurıbı qoyşaranbışisqa ayk’an.

13 Tamarık’le eyhen:

– Yiğna abattey syurıbı qoşşaras Timneeqa vor ı’qqə.

14 Tamaree sip’ıreeşe alya’an karbı g’ayşu, yic qıvmeets’ecenva şal adaççe. Mana Timneeqa əlyhəəne yəqqəne, Enayimeeqa ı’kkəəne akkabışde ögee giy’ar. Məng’ı’k’le g’ecen Şela xər qıxha vor, yic mang’us adamiys heele deşur.

15 Yahudayk’le mana g’aycumee, mang’uk’le mana yəqqı’le qığeyç’una zəiyfa xhinne yeets’a yeexhe, məng’ee aq’va dyugul hı’ıva. 16 Yahuda məng’ı’ne suralqana ark’ın, eyhen:

– Hasre vaka g’alixhas.

Mang’uk’le mana cuna sos yixhay yeets’a deşdiy. Zəiyfee eyhen:

– Zaka g’alixhasdemee ğu zas hucoona heles?

17 Yahudee eyhen:

– Syuruneençe sa mısva g’axuvles.

Məng’ee eyhen:

– Mana g’axuvlesmee zasne sa kar g’alyadaççeye?

18 Yahudee qiyghanan:

– Zı vas hucoona g’aleççe?

Zəiyfee eyhen:

– Baağılin yiğın peçatiy xıledın əsaa.

Yahudee manbı zəiyfaysqa quvu, məng’ı’sqa ikkeç’e. Zəiyfa mang’uke vuxhne eexva. 19 Qiyğa Tamar mançe iyeek’anna. Məng’ee şal g’ayşu, sip’ıreeşe alya’an, tanalinbı alya’a.

20 Yahudee zəiyfayke vucee g’aletçuyn kar alyaat’asva, Adullamğançene hambazıka mısva g’uxoole. Mang’uk’le mana zəiyfa iveeke deş. 21 Mang’vee zəiyfa ulyorzulyne cigayne insanaaşike qiyghanan:

– Enayimıs k’anene yəqqə giy’ırna yəqqı’le qığeyç’una zəiyfa nyaane vor?

Manbışe eyhen:

– İnyaa yəqqı’le qığeyç’una zəiyfa deşda.

22 Mana insan Yahudayne k’anyaqa sark’ıl eyhen:

– Zak’le mana aveykı deş. Mane cigayne insanaaşed «inyaa yəqqı’le qığeyç’una zəiyfa deşdava» uvhu.

23 Yahudee eyhen:

– Hasre man karbı məng’ı’nbı ixhecen, saccu şi mane işee k’ap’ik’ıle avqa qıdeepxhes. İna mısva zı məng’ı’sniy g’axuvu, vak’leme mana aveykı deş.

24 Mançile xheyible vazna qiyğa Yahudayk’le eyhen:

– Yiğne sossee Tamaree zina hı’ı, vuxhne ayxu.

Yahudee eyhen:

– Mana qığeyhı, geexhvan hee’e.

25 Mana g’aqa qığeyhımee, məng’ee abatteysqa insan g’axuvu, eyhen:

– Zı ine karbışde iyesiyke vuxhne ayxu.

Qiyğa eyhen:

– İlekkelan in baağılin peçatiy əsaa şavuniy?

26 Yahudayk’le manbı qıvaats’ı, eyhen:

– Mana zale qorkura vor, zı mana yizde dixes Şelays hidey’ıva.

Yahuda məng’ı’ka sayır g’ılexha deş.

27 Tamaree uxooxamee, məng’ı’ne vuxhne q’ömkaler vuxhay ats’axhxhe. 28 Uxooxane gahıl uşaxaaşine sang’vee xıl hozar ha’a. Uşaxar vuxooxang’a, kumag ha’ane zəiyfee mang’une mane xılelqa ç’ərana baağ avt’ul eyhen:

– Ts’erree ina g’acu.

29 Mane uşaxeeme xıl yı’q’əlqa ts’ıts’a’a, ts’erre manasa eyxhe. Kumag ha’ane zəiyfee eyhen:

– Nəxürne ğu mançe ılğeç’u?

Mançil-allad mang’un do Perets (ılğeç’ena) giyxhe. 30 Mang’ule qiyğa xılel baağnana çoc eyxhe. Mang’un do Zerax (ı’lqəəna verığ) giyxhe.