2 Mu taangu yi yimiisaala benu ŋa toto, a hwafwana ti benu libaadyata we bu huli mapeyu ma musunya ve, ka dyataani we bu huli litondo la Nzambi. 3 Hutsomi, benu laavyosi taangu yindahi, mu ubaasa mavaanga ma mu baava kinya huli ba baaveleyaba Nzambi. Benu laavahuli linyutu la benu mu bumbembo, mu mapeyu ma musunya, mu malaangi, mu mikungi mi udya na unywa, na ubaasambila bifwita. 4 Bunuubu, ba baaveleyaba Nzambi, bali mu ukimuha bu benu laabwevelepfutana na bo hutso a mbiili bumbembo yi yalendolo iteesi. Isalu hya bo aka ubaatuha benu. 5 Ka bo bu uva ikuumbu huli wu amiivangama mu utsundasa bamoonyi na babaakwa. 6 Ni mu buuna, Yisu hayabisi Musamu wu Mubwe pa huli babaakwa. Humbisa uyaka tsundusu yi musunya we bu huli litondo la baatu, bo bu uba moonyi mu Livupu, we bu huli litondo la Nzambi.

7 Tsukusu a tsi yika bebele. Ni mu buuna, baabaani na mbiili ya tsiki na likanda, mana benu libaatwala usambila.