1 Mikele mya Moose ndulu ifwaani hi mabwe ma hu busu. Ka a imbuli a mbuli hya bi bili ŋaana ve. Ni mu buuna, myo utwala ubita baatu ba bali mu uyaasusaha huli Nzambi, hu bukuhu ve: buni myo mikiitwala uba buuna, tso bali mu uva bungodu bwa tsuhili ni bwo bumosi, pasi ilima nzyen-nzyeni? 2 Tso ba bali mu ukuunda Nzambi buuna, baakituhi ba baatsyeme ndulu tsyeme limosi mu masumu ma bo, bo a baakiiheleene mitima mu masumu ma bo ve. Buuna bo a baakiibweva bungodu bu linyahula li masumu ve. 3 Mu mbuli, mu bungodu bwa tsuhili mo buuna, baatu bali mu uyibuhala moonyi mu masumu ma bo pasi ilima. 4 Mu tooni ati, makila ma balumi ba bangombe na ma balumi ba bataba, utwala umasa masumu ve.

5 Ni mu buuna, bu taangu yi Kristo haakiiya mu tsi yaatoodi, nde aleeli huli Nzambi:

«We a haatoondi tso bungodu bwa tsuhili, tso makabu ve,

ka we aviidi me nyutu.

6 We a haamoni kinya tso mu bibulu ve,

bibulu bi baakudasa ŋa diiku li bungodu,

tso mu bungodu bwa tsuhili ve,

mu nyahulili masumu.

7 Buuna me andeeli:

"Me ndi mu unza huli we me mwakulu, Nzambi a me,

mu ukuhasa litondo la we,

we bu baasonehe mu tooni a me

mu libuuku la Ngidi✝."»

8 Nde amatswamina uleele bunuubu: «We a haatoondi tso bungodu bwa tsuhili ve, tso bungodu bu makabu ve, tso bungodu bu baakudasa ŋa diiku ve, tso bungodu bwa tsuhili mu nyahulili masumu ve, na we a haamoni kinya mu biina ve.» Bungodu bwa tsuhili mo buuna, baakava bwo we bu hu li Mikele. 9 Titswene nde abweleele: «Me aka mu unza me mwakulu mu uyaakuhasa litondo la we.»

Nde miifwinzala bikuundili byatsomi mu ukiisa bi binyatihi. 10 Yisu Kristo akuhisi litondo la Nzambi. Nde ayehuli nde mwakulu yeholo limosi nzyeni, mu utsyemese bisu mu masumu ma bisu.

11 Pasi ngaanga a Nzambi ubaateleme pasi ilumbu, mu usa isalu hya nde. Nde ubaayeholo bungodu bwa tsuhili pasi taangu, bungodu mo buuna, utwala unyahula masumu ma baatu ve✝. 12 Ka Kristo, amiiyeholo bungodu ndulu yeholo limosi nzyeni mu nyahulili masumu. Titswene, nde amiiyatsahala nzyeni ŋa mbahala a Nzambi. 13 Bunuubu, nde li mu ukeele ti Nzambi asuusa baboho ba nde hu tsina a miilu mya nde✝. 14 Ni mu buuna, ndulu mu piili a kabu limosi, nde abiti baatu ba nde haatsyemisi mu masumu, hu usupaha hwa nzyeni.

15 Livupu la Ngidi kaka lili mu usilasa bisu lo na lili mu uleele:

16 «Mono nzuhisini yi me utsa na bo,

hu mbisa a bilumbu mo biina, buleeli Pfumu:

me utsonehe Mikele mya me mu mitima mya bo,

me ukiratana myo mu matsimi ma bo.»

17 Na nde li mu ubwese bunuubu: «Me a humbwenzibuhala moonyi mu masumu ma bo, tso mu mambu ma bo ma mabi ve✝.» 18 Ni mu buuna, ŋa hu li nyahulili masumu, a husaali na tsoongo mu ubweva makabu mu nyahulili masumu ve.

19 Buuna, baana ba ngu, bisu a benu laaka na bunyanga bu ukoto hu mbuha yi yaafulala bungidi, mu nzila yi makila ma Yisu. 20 Nde amiidibula bisu nzila yi nyatihi na ya moonyi, mu uvyohele mu nguumbu*, ni nyutu a nde mwakulu. 21 Bunuubu, bisu lika na mukuutu bangaanga ba Nzambi wu bamiibyalisa mutumi a nzo a Nzambi. 22 Ni mu buuna, lisusahaani huli Nzambi, na mutima wu imbuli, na imiinu hi hyakuha, na mutima wu atsyeme mu matsimi ma mabi, na nyutu yi baaswaha mu mamba ma maatsyeme✝. 23 Lihwadaani na mifudi mu ukaanga hiitu hi lili mu uta ibila, mu tooni ati, Nzambi li ngetetee mu malahi ma nde. 24 Likumbasanaani mu uhwadasana mu usinzatondo, na usalila mavaanga ma mabwe. 25 Linyahaani utiimba mapfuutini ma bisu, we bu hu li ipfu hya baatu bakima. Ka laafwana ubaahwadasana. Mu tooni a bu lili mu umono ti ilumbu hya Pfumu hyaka bebele.

26 Ni mbuli, hu mbisa uyaaba imbuli hyoosi, tso bisu lili mu ukwilala mu usumaha mu usa ukana, a husaali na bungodu bwa tsuhili bu buutwala umaasa masumu ve. 27 Husaali huli bisu ndulu ka ni mu ukeele na tsisu, tsundusu a Nzambi na mbaahu yinene yi yiunyengese bambene ba nde✝. 28 Woosi wu uvelekiinza Mikele mya Moose, sa baduba nde hwavele ukwila nde lingebe, tso bambangi boole buuve batatu batiidi imbangi mu bubi bwa nde✝. 29 Ka buni buuba mu nde wuuna wu ubaarokolo Mwana a Nzambi, wu ubaatsima ti makila ma nzuhisini, ma maafutili inoongi hya nde na Nzambi, a mali na tsoongo ve, na wu ubaatuha Livupu li libaava hyese? Tsimaani ki pila a tsyembili yuuhwama na nde! 30 Mu mbuli, bisu liyaabi nde wuuna wu aleele bunuubu:

«Mufutili a piinga me,

me ni wu utsyende pasi muutu».

Titswene nde abweleele bunuubu:

«Pfumu sa atsundasa baatu ba nde✝.»

31 Ni dyambu la tsisu mu ubwa ŋa myoho mya Nzambi a moonyi!

32 Ka yibuhalaani moonyi mu ma benu laabwani na mo hutsomi. Mu bilumbu mo biina, hu mbisa uyaka liyalala la Nzambi, benu laakuundi mapasi, benu laavaangini mu iteesi hi inono. 33 Bakima mu benu baayaki bituhi na baanyongisi bo ŋa kuungi la baatu. Taangu kima, bakima baakahwadisa ba baakayaka bituhi na ba baakaba mu munyongi. 34 Benu laamoni mapasi itwadi na bikondaayi. Bu baapatuli busina bwa benu, benu laasiingi na kinya ti bapatula busina bya benu, bu benu laaba laayaaba ti benu na busina bu bwafulala bubwe, bu bubaadiinga taangu yoosi. 35 Ni mu buuna, a lipatusa hiitu hya benu ve, mu tooni ati, hyo na musyendo wu munene. 36 Buuna, benu na nzala mukonono mu ukuhasa litondo la Nzambi, na uyaka biina bi nde haamiisila benu lahi. 37 Mu mbuli, baasonehe:

«Ka ndulu mwana a taangu hoole, yi yaafulala hoole,

na wu afwana uya, sa aya,

nde a huutaamba ve.

38 Woosi wu li tsiitsa ŋa busu bwa me uba moonyi mu imiinu,

ka nde afutaha mbisa,

me a umono kinya mu nde ve✝.»

39 Bisu a lili ba bubaafutaha mbisa, na udimbala ve. Bisu lili baatu ba nga imiinu na ba bali mu nzila liyobolo.