1 Nzuhisini yatsomi yaabeedi na matumili ma bikuundili na mbuha ya ngidi ya ŋa toto. 2 Nzo a ngooto yi bibadi byole baatelimisi. Mu ibadi hyatsomi hi bubaateele «mbuha ya ngidi», hwaba na isuusili hya miinda, na meetse ma baasuusala mapa ma baayeholo huli Nzambi. 3 Hu mbisa a nguumbu ya moole, hwaba na ibadi hi bubaateele «mbuha yi yaafulala bungidi✝». 4 Huuna, hwaba na meetse ma baayolo mu wolo, hu baakatsuha paha a tsulu yimbwe, na kasu a nzuhisini yi baayolo mu wolo. Hutso a kasu mo yiina, hwaba na ikoombe hya mu wolo, hi hyaluula mu maane, likaanda la Aroni li laapalisi bifulu, na bibadi bi mamanya ma baaba baasonehe matumili ma nzuhisini✝. 5 Ŋa yulu a kasu, baavala bifwaani bi bakeluba ba muyusu. Posi mapapi ma bo, yaakafuha mbuha yi bubaayeholo makila mu linyahula li masumu ma baatu. Ka taangu kini a yaafwana mu uyambila mu mambu mo maana ve✝.

6 Bu baavangimisi bisiha mo biina byosi, bangaanga ba Nzambi buukaakoto taangu yoosi, mu ibadi hyatsomi hya nzo a ngooto, mu usa bikuundili bya bo. 7 Ka ndulu mukuutu bangaanga ba Nzambi ukoto mu ibadi hya byole. Nde akakoto huuna, ndulu koto limosi mu ilima. Nde afwana ubita makila ma ibulu, ma nde huuyeholo huli Nzambi mu tooni masumu ma nde mwakulu, naapa mu ma baatu baavangi hutso budiimbu✝. 8 Ni mu buuna, Livupu la Ngidi lili mu umweese ti, nzila yi ukoto hu mbuha yi yaafulala bungidi kini a yaadibumi ve, bu ibadi hya nzo a ngooto hyatsomi hikini. 9 Yiina ni kuma a taangu mo yiniiyi. Yo yitoondi uleele ti, makabu na bungodu bwa tsuhili bibulu bu bubaava huli Nzambi, utwala uvudamasa matsimi ma muutu wu ubaasa bikuundili mo biina ve. 10 Maana ndulu matumili ma bumuutu, ma maakangama mu byudya, byunywa na matsalili mana moosi ma utsyemese nyutu. Matsalili mo maana, maaba na tsoongo ndulu mu mwana a taangu*, natee bu Nzambi huubwesobo mambu moosi.

11 Ka Kristo amonihili na biita li mukuutu bangaanga ba Nzambi, wu mabwe moosi maamiimonehele. Nde akoti hutso a nzo a ngooto yi yaalutahala tsoongo na usupaha, yi baaveletuunga mu myoho mya baatu, buuve yi yaavele ya tsi mo yiniiyi. 12 Ŋa Kristo haakoti ndulu koto limosi nzyeni hu mbuha yi yaafulala bungidi, nde a haayehuli makila ma balumi ba bataba, na ma balumi ba bangombe* ve. Ka nde makila ma nde mwakulu haayehuli, na nde ayobili bisu mu masumu ma bisu mu bilima na bilima. 13 Makila ma balumi ba bataba na ma balumi ba bangombe, na mufutu wa mwana a ngombe wu baakudasa✝, bi bubaapuupala ŋa yulu a baatu ba baasumaha, bibaatsyemese bo mu masumu ma bo. 14 Ka umono ti ni buuna, na ki pila mifudi mi myafulala, makila ma Kristo muubweba! Mu Livupu li bilima na bilima li laakasala mu nde, Kristo ayehuli nde mwakulu huli Nzambi hwavele ipiha, we bungodu bu bwasupaha. Makila ma nde muutsyemese matsimi ma bisu mu mavaanga ma mabi, mana bisu a benu likuundaani Nzambi a moonyi.

15 Ni mu buuna, Kristo ali sabu la nzuhisini yi nyatihi, mana ba Nzambi haamiiteele, bayaka mukobe wu bilima na bilima, wu nde haasa lahi huli baatu ba nde. Bo utwala uyaka nde, mu tooni a bu lipfu laamonihili, lipfu li limiiyobolo baatu mu masumu ma bo baasiidi mu nzuhisini yatsomi.

16 Ŋa hu li muhanda a nzuhisini*, hwafwana basilasa ti, musonihi muhanda mo wuuna miikwa. 17 Mu mbuli, muhanda a nzuhisini a hali na tsoongo ve, bu musonihi a nde akini moonyi. Nde huuba na tsoongo ndulu ŋa musonihi a nde amiikwa. 18 Ni mu buuna, nzuhisini yatsomi kaka yaavelitswiha, hwavele puhimini makila. 19 Moose amayabisa huli baatu boosi matumili moosi, we bu baasonehe mo hutso libuuku li Mikele. Titswene, nde avoli makila ma baana ba bangombe na ma balumi ba bataba, na mamba. Nde asalili itabi hi muti a isopi* na myoso mi mibeenge, mu upuhala byo ŋa yulu libuuku li Mikele, na ŋa yulu a baatu boosi. 20 Nde aleeli bunuubu: «Maniima ni makila ma mali mu usilasa nzuhisini yi Nzambi haatumasa benu mu ukiinza✝.» 21 Bumosi kaka, Moose atsaatsili makila ŋa yulu a nzo a ngooto, na mu bisiha byosi bi bo baakasalila mu bikuundili. 22 We bu hu li Mikele, bisiha byosi baafwana utsyemese ndulu mu makila, na nyahulili masumu ubaayaka ndulu mu puhimini yi makila✝.

23 Tso ni buuna baafwana utsyemese bisiha bi bikuundili, bi bili bifwaani bya hu mayulu, bi bili hu mayulu na nzala bungodu bu bwalutahala tsoongo. 24 Mu mbuli, Kristo a haakoti mu nzo a ngooto yi myoho mya baatu myatuunga ve, yi yaakiiba ndulu ifwaani hya mbuha yi yaafulala bungidi. Ka Kristo akoti hu yulu lo mwakulu, hu nde ali mu umonehele ŋa busu bwa Nzambi mu uvolele bisu mileembe. 25 Pasi ilima, mukuutu bangaanga ba Nzambi wu Bayudaayo, ubaakoto hu mbuha yi yaafulala bungidi, na makila ma maavele ma nde. Ka Kristo a haakoti hu yulu mu uyeholo nde mwakulu nzyeholo yindahi ve. 26 Tso a buuna ve, kini nde akiimono pasi mono yindahi umata pangili a tsi. Mu mbuli, mu taangu mo yiniiyi, nde ayamonehele monehele limosi, mu tsukusu a taangu, mu umaasa masumu mu nzyehulili a nde mwakulu mu bungodu. 27 Pasi muutu afwana ukwa kwa limosi, titswene Nzambi tsundisi nde. 28 Ni bumosi kaka, Kristo baayehuli nde yeholo limosi mu bungodu, mu umaasa masumu ma baatu ba balahi✝. Nde uyaamonehele monehele la moole, a husaali mu uyaamaasa masumu ma baatu ve, ka mu uyaafuuhasa boosi ba bali mu ukeele liyobolo mu nziili a nde.