1 Ni mu buuna, baana ba ngu, benu ba lili bangidi ba Nzambi, benu lili na kabu la teelili yi yili mu umata hu mayulu. Buuna, talaani Yisu, iluumbi hya Nzambi na mukuutu bangaanga ba Nzambi wu imiinu hi bisu lili mu uta ibila. 2 Nde aba ngetetee mu Nzambi wu abyalisi nde, we bu baabyalisi Moose mu utuma nzo a nde yoosi✝. 3 Bunuubu, muyusu wu li na Yisu, afulala wa Moose bunene. Mu tooni ati, wu ubaatuunga nzo, afulala nzo yo mwakulu muyusu. 4 A hu li na nzo yi yaavele na mutuungi ve, ka wu atuunga bisiha byosi ni Nzambi. 5 Mu li litali Moose, nde aba ngetetee mu utuma nzo a Nzambi yoosi, bu nde haaba musalili wu uta imbangi mu ma Nzambi haakiibaaleele. 6 Ka Kristo, nde li ngetetee bu nde ali Mwana wu baasuusa mu utuma nzo a Nzambi. Na bisu ni nzo a nde, tso bisu likeelisi imiinu na hiitu bi bisu lili na nyeme mu byo.

7 Ni mu buuna, we bu Livupu la Ngidi lili mu uleele:

«Lolo yiniiyi, tso benu liyuhi ndaha a Nzambi,

8 a lisa mitima mya benu ngototoo ve,

we bu benu laatuumbihili nde,

mu ilumbu hi benu laayebi nde

hu kumu a nzala.

9 Huuna, bakaaha ba benu baamesi me na baayebi me, buleeli Nzambi,

tso hu mbisa umono moosi ma me apaangi

10 mu maku mana ma bilima.

Ni mu buuna, me akwili tuungi mo liina kesi, na me andeeli:

"Mitima mya bo mili mu udunga taangu yoosi,

na bo a baatoondi utsikaha manzila ma me ve."

11 Hutso a kesi a me,

me andabi mulabu mo wunuuwu:

Bo a buubila ukoto hu puumili,

yi me amiipaangila bo ve✝!»

12 Baana baa ngu, kebaani, mana muutu ŋa hati la benu aveleba na mutima ngototoo, wu avele na imiinu, wu li mu ubita nde mu umiinguha Nzambi a moonyi. 13 Ka baahwadasanaani pasi ilumbu, mu mataangu moosi ma buutwala uleele «lolo yiniiyi», mana tso mumosi mu benu a haba na mutima ngototoo, na a habwa mu soho li lisumu. 14 Mu mbuli, bisu lili batsyengi ba Kristo, tso bisu likeelisi na mifudi natee hu tsukusu, hiitu hi bisu laabahi ŋa mbaandu.

15 Buuna, baaleele:

«Lolo yiniiyi, tso benu liyuhi ndaha a Nzambi,

a lisa mitima mya benu ngototoo ve,

we bu benu laatuumbihili nde✝.»

16 Ka, bana baayuhi ndaha a Nzambi na baatuumbihili nde? Ni boosi ba Moose haapalisi mu Ngipiti. 17 Huli baana Nzambi haakwili kesi mu maku mana ma bilima? Ni huli ba baasumihi na ba baakwidi mu kumu a nzala. 18 Ŋa Nzambi haalabi mulabu mo wunuuwu: «Bo a buubila ukoto hu puumili yi me amiipaangila bo ve», huli baana nde haalabi nde? Huli ba baatuumbihili nde✝. 19 Mu mbuli, bisu lili mu umono ti bo a baatwali ukoto hu puumili mo yiina ve, mu tooni ati, bo baabisi usa imiinu.