1 Uto ti bisu, koonge yinene yi bambangi mo baniiba, yaadiinga bisu. Ni mu buuna, litiimbaani byosi bi bibaalemese dwe la bisu, fula-fula masumu ma maasinzakangama mu bisu. Na libataani tiinu na mukonono, mu uvaangana hwa tiinu ya ŋa busu bwa bisu. 2 Lisungamanaani Yisu, wu li mbandihili imiinu hya bisu, na wu li mu utoose hyo hu usupaha. Ŋa mbuha makinya ma baasuusi ŋa busu bwa nde, nde akuundi lipfu ŋa kuruwa, hwavele umono tsonyi mu lipfu la pila mo yiina. Na bunuubu, nde amiitsahala ŋa mbahala a kiti-ipfumu ya Nzambi✝.

3 Tsimaani buni nde haakami mutima ŋa busu bwa baatu ba baasumaha, ba baatelimini nde, mana benu a likolo na a lifutaha mbisa. 4 Mu tooni ati, mu mudiingu a benu ŋa busu bu masumu, benu kini a laamaalwana natee lipfu ve. 5 Benu laamiivusahana kwadisili yi Nzambi haahwadisa benu, we huli baana ba nde:

«Mwana a me, a nyasula tsuungihili yi Pfumu ali mu usuungaha we ve,

na a kolese binama ve,

ŋa nde ali mu usyembe we.

6 Mu tooni ati, Pfumu ubaasuungaha wu nde haatondo,

nde ubaatete bikooti

huli woosi wu nde ubaasilasa ti mwana a nde✝.»

7 Kamaani mutima mu mapasi ma Nzambi ali mu usuungaha benu. Mu mbuli, Nzambi ubaavolo benu we baana ba nde. Ki mwana wu taata haavelesuungaha? 8 Tso a basuungihi benu we bu bali mu usuungaha baana ba nde boosi ve, buuna benu a lili baana ba mbuli ve. Ka benu lili baana ba bitswadi. 9 Liyibuhalaani moonyi mu bataata ba bisu ba ŋa toto: bo baakasuungaha bisu, na bisu laakakiinza bo. Tandisini a Taata a bisu wa hu mayulu! Bisu laafwana uba hu tsina lituma la nde, mana liyakaani moonyi mu nde. 10 Bataata ba bisu baakasuungaha bisu mu mwana a taangu hoole, we bu bo baakatondo. Ka, mu libwe la bisu, Nzambi li mu usuungaha bisu, mana bisu liba bangidi we nde. 11 Ŋa bisu limiiyaka matsuungihili, bisu libaakoto mu lingebe, kini a mu kinya ve. Ka hu busu, ba baamiiyiha tsuungihili mo yiina, bubaayaka kaluha: kaluha ni hyenze hi hyabaambana na idiingu hi hyahwama na litondo la Nzambi.

12 Ni mu buuna: Hwadisaani myoho mya benu mi myaamiikolo, na maboongo ma benu ma mali mu utehete! 13 Kotwaani mu misoho mi myasungama✝, mana huulu hwa tsode a hubangumana, ka hwo hubeeloho.

14 Hwadaani mu uba mu hyenze na baatu boosi, napa mu bungidi; tso a mu bwo ve, muutu utwala umono Pfumu ve. 15 Kebaani mana muutu tso mumosi a haveleyaka hyese hya Nzambi. Kebaani mana muutu tso mumosi a hakituha linganzi li unyongese bana. Kebaani mana muutu tso mumosi a hakituha linganzi la kali, li luukula na ubiiyasa baatu ba balahi ŋa hati la benu✝. 16 Kebaani mana muutu tso mumosi mu benu a hadyata hutso bumbembo. Kebaani mana muutu tso mumosi mu benu a hapenye bisiha bya ngidi, we Esawu wu asuumbisi bukuutu bwa nde mu mwana a byudya. 17 Benu liyaabi ti hu busu, nde atoondi uyaka lisyeme la taata a nde, ka baanyasuli nde. Nde a haatwali usobo dyambu mo liina ve, tso bu nde haayehili usaha ubwefutahala bukuutu bwa nde hutso bililu✝.

18 Benu a laayidi ŋa pedu bisiha bi baatu buutwala ubeembe ve: tso na mbaahu yi yibaakudasa, tso na butsuhu, tso na piipidi ya dunga-dunga, tso na mvula muhuunga*, 19 tso na munyingu a kulambeete, tso na munyingu a ndaha mosi. Ŋa bisu Isereli baayuhi ndaha mo yiina, bo baavondi ti bo babweveleyuha ndaha mo yiina✝. 20 Ka bo a baakuundi tumili mo yiniiyi ve: «Pasi muutu wu ubeembe isyelo, tso hyaba ibulu, sa baduba nde mu mamanya.» 21 Ma bo baamoni, maaba ma boomo bu bwafulala ŋa Moose haaleeli:

«Me ndi mu utehete, bu me ndi mutso a boomo bu bwafulala✝.»

22 Ka benu laayidi ŋa pedu isyelo hya Syoni, na ŋa pedu musyenge a Nzambi a moonyi: ni Yeruselemi ya hu yulu, na biveeve bi bapofi ba nde. 23 Benu laayidi ŋa pedu a pfuutini yi mukungi. Mukungi bapasa-mabeelo ba babahala ba Nzambi, ba manduhi baasonehe hu mayulu. Benu laayidi ŋa pedu a Nzambi, mutsundisi a baatu boosi, na biluunzi bya baatu ba tsiitsa, ba baamiito hu bukuhu. 24 Benu laayidi ŋa pedu a Yisu, sabu la nzuhisini yi nyatihi, na li makila ma nde, ma maasupihini, ma mali mu utoyo bubwe, ufulala makila ma Abeli✝.

25 Ni mu buuna, kebaani! A libisa uyuhala wu li mu uyambila huli benu ve. Ba baabisi uyuhala wu akayibusa bo ŋa toto✝, baayaki tsyembili. Tandisini a bisu, sa buba bumosi kaka, tso bisu litunihili wu li mu uyibusa bisu umata hu mayulu. 26 Hutsomi, ndaha a Nzambi yaanyingisi toto. Ka lolo yiniiyi, nde li mu usa bisu lahi mo liniili:

«Me unyingasa toto nyingasa likima,

a ndulu toto ve, ka napa yulu✝.»

27 Bunuubu, bikuma bya we «nyingasa likima», bitoondi uleele ti bisiha bi Nzambi haavaanga, byutsaamuha na byudimbala, mana ndulu bi byuveletsaamuha bikwilala.

28 Ni mu buuna, libaafutalaani matondo huli Nzambi, mu tooni ati bisu a benu lili mu uyaka Ipfumu hi hyuveletsaamuha. Limweesaani pfutilili matondo mo yiina mu ukuunda Nzambi bu hwafwana, hutso butsitu na boomo bwa nde. 29 Mu tooni ati, Nzambi a bisu li mbaahu yi yibaakudasa✝.