1 Ngu a dyambu mu mambu moosi ma bisu luuleele, ni wunuuwu: bisu lili na mukuutu bangaanga ba Nzambi, nde wuuna wu atsahala hu mayulu, ŋa mbahala a kiti-ipfumu ya Nzambi✝, Nga matwala. 2 Nde li mu usa isalu hya nde hutso a mbuha a ngidi, ni nzo a ngooto ya mbuli, yi Pfumu haatelemese, ka a yi muutu haatelemese ve.

3 Buuna, pasi mukuutu bangaanga ba Nzambi, bubaabyalisa mu isalu hi ubaava makabu na bungodu huli Nzambi. Ni mu buuna, wa bisu kaka mukuutu bangaanga ba Nzambi, afwana ubaha kaka isiha hi uva. 4 Kini nde li ŋa toto ŋaniiŋa, nde a haakiiba tso ngaanga a Nzambi ve. Mu tooni ati, hwamiiteehele bakima ba bali mu uva makabu we bu hu li Mikele mya Moose. 5 Bikuundili* bi bangaanga ba Nzambi mo baniiba, bili ndulu ifwaani, buuve inzinza hi bimbuli bi mayulu. Byo byayelemene na bu Nzambi haayibusi Moose mu tumili mo yiniiyi, ŋa nde haakiituunga nzo a ngooto ya ngidi: «We afwana usa moosi, mana isalu hya we hiyelemene na bituungili bi me amweesi we ŋa yulu isyelo✝.»

6 Ka bunuubu, Yisu li mu usa isalu hi hyalutahala isalu hi bangaanga ba Nzambi. Mu tooni ati, nde ni sabu la nzuhisini yi yaalutahala bubwe, yi yaatsahala ŋa yulu malahi ma maalutahala bubwe.

7 Tso mbuli nzuhisini* yatsomi a yaaba na ipiha ve, a hwakiiba na tsoongo mu ukiisa yo mu ya moole ve. 8 Ka Nzambi li mu usyembe baatu ba nde na uleele:

«Mu bilumbu bi byuya hu busu, huleeli Pfumu,

me ukuta nzuhisini yi nyatihi

na bisu Isereli, na bisu Yuda.

9 Yo a yuuba we nzuhisini yi me akuti na bakaaha ba bo ve,

mu ilumbu hi me apalisi bo, mu tsi a Ngipiti mu hooho hwa me.

Bo a baabeedi ngetetee mu nzuhisini mo yiina ve,

Ni mu buuna, me apelimbwemonele bo lingebe, buleeli Pfumu.

10 Ka mono buni nzuhisini yi me ukuta na bisu Isereli yuuba,

hu mbisa bilumbu mo biina buleeli Pfumu:

Me utsonehe matumili ma me mutso matsimi ma bo,

me ukiratana mo mutso mitima mya bo:

me umba Nzambi a bo, na bo buuba baatu ba me!

11 Muutu tso mumosi a huubwebila ulongese wuna, buuve mwana a ngu a nde ve,

na uleele: "Yaaba Pfumu!"

Mu tooni ati, boosi buuyaaba me,

umata wu afulala bukenyi,

natee wu afulala bukuutu.

12 Me utsa kolo-kolo mu ma mabi ma bo,

na me a humbwenzibuhala moonyi mu masumu ma bo ve✝.»

13 Bu Nzambi haayambili mu nzuhisini yi nyatihi, nde miikitusa yatsomi yiba yi kulu. Ka hi ikulu na hi himiinuna, byaka bebele mu udimbala.