1 Buuna, bu lahi li Nzambi haamiisiisala mu ukoto hu puumili a nde likini, likebaani, mana tso mumosi mu benu a haba na tooni yi usaala mbisa. 2 Mu mbuli, bisu laayaki tsaangu yimbwe, bumosi kaka we ba baabeedi hu kumu a nzala. Ka tsaangu yi bo baayuhi, a yaabuti kaluha ve. Ka bu bo baayuhi yo, bo a baayuhi yo na imiinu ve. 3 Bisu baa lili mu usa imiinu, laaka mu ukoto hu puumili mo yiina yi Nzambi haaleeli:

«Hutso a kesi a me, me andabi mulabu mo wunuuwu:

Bo a buubila ukoto hu puumili,

yi me amiipaangila bo ve✝!»

Nzambi haaleeli lo, bu isalu hya nde hyaaba hyaamiifwa umata pangili a tsi. 4 Ni mu buuna, baasonehe bunuubu mu Libuuku la Ngidi mu tooni ilumbu hya tsambu: «Nzambi avuumi mu ilumbu hya tsambu, bu haamani isalu hya nde hyoosi✝.» 5 Tsyelo kima kaka baabwesonehe: «Bo a buubila ukoto hu puumili yi me amiipaangila bo ve✝.» 6 Baatu ba tsikulu ba baayuhi Mambu ma Nzambi, a baakoti hu puumili mo yiina ve, mu tooni ati bo baasiidi kene. Buuna, hukini na muswa huli baatu bakima mu ukoto huuna. 7 Ni mu buuna, Nzambi amiibwekese ilumbu ikima hi bali mu uteele «lolo yiniiyi». Nde amatoyo mu hyo umata beleve mu munywa a Davidi, mu mambu ma baamiikwasonehe:

«Tso benu liyuhi ndaha a Nzambi lolo yiniiyi,

a lisa mitima mya benu ngototoo ve✝.»

8 Mu mbuli, ubaamono ti Yosuwa atoosi buli li Isereli hu puumili mo yiina✝, Nzambi a haakiibweyambila mu ilumbu ikima hu mbisa ve. 9 Ni mu buuna, hukini na puumili kima huli baatu ba Nzambi, yi yafwanina na yi ilumbu hya tsambu. 10 Mu mbuli, woosi wu miikoto hu puumili yi Nzambi haamiivangimasa, miivuuma mu isalu hya nde, we bu Nzambi haavuumi mu hya nde. 11 Ni mu buuna, lihwadaani mu ukoto hu puumili mo yiina, mana muutu tso mumosi avelebwa mu tooni a kene, we bu hwasiidi bakaaha ba bisu. 12 Mu mbuli, mambu ma Nzambi mali moonyi na mifudi. Mo maafulala tso mbeedi a suungu mu uto. Mo mu baakotelele natee hu ukahula muvumu na iluunzi, makede na busoho. Mo mu baatsundasa makani na matsimi ma mutima a muutu. 13 A hu li na ivangu tso imosi hi hyutwala uswemene Nzambi ve. Ŋa miisu mya nde, byosi byamonehele paayalala, huli nde wuuna wu bisu boosi laafwana uva ikuumbu.

14 Ni mu buuna, likaangaani mu mifudi, imiinu hi libaataani ibila! Mu tooni ati, bisu lili na mukuutu bangaanga ba Nzambi nga bunyanga bu utuma, wu amiito natee ŋa busu bwa Nzambi: ni Yisu, Mwana a Nzambi. 15 Bisu lili na mukuutu bangaanga ba Nzambi wu ubaamono pasi mu ikolili hya bisu. Mukuutu bangaanga ba Nzambi wa bisu, baayebi mu moosi we bu bisu lili, ka nde a haasiidi lisumu ve.

16 Lisusahaani na hiitu ŋa pedu a kiti-ipfumu hya Nzambi, hu hyese hili mu usasa. Huuna, bisu luuyaka kwili lingebe na hyese, mu uyobolo bisu mu taangu yi yaafwana.