1 Melekisedeki mo wunuuwu, abeedi mutumi a Salemi*, na ngaanga a Nzambi wa Nzambi a hu hati a yulu. Ŋa Abrahami haamati hu mudiingu wu nde haabiingili batumi, Melekisedeki ayabwana nde na asyemi nde. 2 Abrahami aviidi nde ikuuku imosi mu kuumi, hya byosi bi nde haavoli. Nduhi a Melekisedeki mbindulili a hati a tsomi ti: «mutumi a butsiitsa» titswene, nde abeedi mutumi a Salemi, mbindulili ti «mutumi a hyenze✝». 3 A baayaaba taata a nde, tso ngu a nde, tso kaaha a nde ve. Nde a hali na tso mbandihili bilumbu, na tso tsukusu idiingu ve. Bu bubaamono ti nde afwanina na Mwana a Nzambi, nde ukwilala ngaanga a Nzambi✝ mu bilima na bilima.

4 Monwaani ki biita lilinene li nde ali na lo! Abrahami kaaha a bisu, aviidi nde ikuuku imosi mu kuumi hi bisiha bi nde haavoli huli ba nde haabiingili mudiingu. 5 Kaahu, ba imbisa hya Levi, ba bali bangaanga ba Nzambi, bali na muswa we bu hu li tumili Mikele, mu ubaavondo ikuuku imosi mu kuumi, huli buli li Isereli ba bali baana ba ngu ba bo ba tsi mosi, na ba baapala mu imbisa hya Abrahami✝. 6 Melekisedeki a haabeedi wu imbisa hya Levi ve, ka nde abahi ikuuku imosi mu kuumi huli Abrahami, mu bi nde haabahi. Titswene, nde asyemi wu ayaki malahi ma Nzambi. 7 Ka bisu utwala usa paha ve ti, muutu wu ubaasyeme, alutahala muutu wu bamiisyeme. 8 Ba imbisa hya Levi, bangaanga ba Nzambi baakayaka ikuuku imosi mu kuumi hya mu bisiha bya bo, bo bali baatu ba buukwa. Ka mu Melekisedeki, ikuuku mo hiina himiikinguha huli muutu wu li moonyi, we bu Mabasonehe mali mu usilasa lo. 9 Hu mbisa, utwala mu uleele ti, ŋa Abrahami haafuti ikuuku imosi mu kuumi hi bisiha bya nde, Levi kaka afuti byo, nde wu imbisa hya nde hibaayaka ikuuku imosi mu kuumi hya byosi. 10 Tso bu baaba kini a baabuti Levi ve, nde abeedi aka mutso makila ma kaaha a nde Abrahami ŋa Melekisedeki haayabwana Abrahami.

11 Mikele mi baaviidi huli buli li Isereli, myaaba myaasiingama ŋa yulu isalu hi bungaanga bwa Nzambi hya buli li Balevi. Tso isalu hi bo baakasa hyaaba hyakuha, kini a hwakiiba tsoongo ve ti, ngaanga a Nzambi wu lisobosono na batsomi, amonehele mu mulongo a Melekisedeki, ka a mu ikulu hya Aroni ve. 12 Tso isalu hi bungaanga a Nzambi himiisobo, Mikele kaka myaafwana usobo. 13 Na Pfumu a bisu, wu mambu mo maniima maahwama mu nde li wa buli likima, li pasi muutu kini a haasiidi isalu hi bungaanga a Nzambi ŋa diiku li bungodu ve. 14 Hwayabahana bubwe ti, Pfumu a bisu baabuti mu buli la Yuda, li Moose haavelileele dyambu tso limosi ŋa nde haatoyili mu bangaanga ba Nzambi.

15 Dyambu mo lili mu umweese paayalala ti: ngaanga a Nzambi mukima wu amonihili, afwanina na Melekisedeki. 16 Nde a haakituhi ngaanga a Nzambi we bu hu li matumili ma mabuli ma baatu ve. Ka nde akituhi ngaanga a Nzambi mu matwala ma moonyi wu avele na tsukusu. 17 Mu mbuli, Mabasonehe mali mu usilasa lo:

«We li ngaanga a Nzambi wa taangu yoosi,

mu mulongo a Melekisedeki✝.»

18 Eye, bubaafwinzala mukele a tsomi, mu tooni a bu nde haamiivolo, buuve bu tsoongo a nde yaamiifwa. 19 Mikele mya Moose a myaabehi pasi isiha hu usupaha ve. Ka bisu a benu laamiibaha hiitu hi hyafulala bubwe, na mu hyo, bisu lili mu ususaha ŋa pedu a Nzambi.

20 Titswene, hu li na mulabu a Nzambi. Bakima baakituhi bangaanga ba Nzambi, hwavele na mulabu a pila mo yiina. 21 Ka Yisu, baabyalisi nde ngaanga a Nzambi hu tsina mulabu, ŋa Nzambi haaleeli nde:

«Pfumu alabi mulabu,

na nde a haasobi kesili a nde mwakulu ve:

"We li ngaanga a Nzambi wa taangu yoosi✝."»

22 Ni mu buuna, Yisu ni muutu wuuna wu li kaka mutaasili a nzuhisini yi yaafulala bubwe.

23 Hu li na lisobosono likima: bangaanga ba Nzambi baaba ba balahi, mu tooni ati, lipfu laaba ikahu mu ukwilala mu isalu hya bo. 24 Ka Yisu li moonyi taangu yoosi, na isalu hi bungaanga a Nzambi hya nde, hili hya taangu yoosi*! 25 Ni mu buuna, nde utwala uyobolo nzyeni baatu ba buususaha huli Nzambi mu nzila a nde. Mu tooni ati, nde li moonyi taangu yoosi mu ubaasambila Nzambi mu tooni a bo. 26 Yisu kaahu ni mukuutu bangaanga ba Nzambi, wu bisu laaba na nde nzala. Wu avele na ipiha, wu avele na lisumu, baatahuli nde na banga masumu, na baasyenuli nde hu hati a yulu hu mayulu. 27 Nde a hali we bakuutu ba bangaanga ba Nzambi bakima ve: nde a hali na nzala ubaava bungodu pasi ilumbu ve, hati a tsomi mu masumu ma nde mwakulu, titswene, mu ma baatu. Nde aviidi bungodu mo buuna va limosi, ŋa nde haayehuli nyutu a nde mwakulu. 28 Mikele mya Moose mibaabyalisa bakuutu ba bangaanga ba Nzambi, mu baatu ba baavelesupaha. Ka mulabu a Nzambi, wu nde haalabi ŋa mbisa Mikele, ubaabyalisa we mukuutu bangaanga ba Nzambi, Mwana wu baasyenuli mu musupuhunu a nde wa taangu yoosi.