1 Ngeele Tehofile, baatu ba banzuhisini basonihi moosi ma maavyohi ŋa hati la bisu. 2 Baatu mo baana ba baasonihi mambu mo maana, bo bali bambangi umata mbandu. Bambangi mo baana, baakituhi basalili ba baakalongese mambu ma Nzambi. 3 Ni mu buuna, hufwani huli me kaka mu usonehele we mambu we bu mo maavangimi umata beleve, humbisa a hu me atsahi mo mu bukuhu. 4 Me tsiidi buuna, mana we yaba imbuli hya ndongisili yi we ayaki.

5 Mu taangu a Eloode mutumi a tsi a Yuda, hwaba na ngaanga a Nzambi wu baakateele Zakariya. Nde aba wu a kabu li bangaanga ba Nzambi la Abiya. Mukadi a nde wu baakateele Lisabeti, aba wu imbisa hya Aroni. 6 Bo baboole baaba baasungama ŋa busu bwa Nzambi, na baakaduukala mikele mya Pfumu na tumili a nde we bu hwafwana. 7 Ka bo a baaba na mwaana ve, mu tooni ati Lisabeti aba inguma, na bo abeedi aka binunu.

8 Ilumbu imosi, Zakariya akasa isalu hya nde hi bungaanga bwa Nzambi, ŋa busu bwa Nzambi, mu tooni ati aba bilumbu bya kabu la bo mu usala. 9 We bu hwaba ipfu hi isalu hi bangaanga ba Nzambi, batiidi ngodo* mu usoolo nde mu ukoto mu nzo a Pfumu, na mu utsuha paha a tsulu yimbwe.

10 Mu taangu yi Zakariya hakatsuha bungodu bwa paha a tsulu yimbwe, baatu ba banzuhisini baaba mu usambila Nzambi hu mbadi. 11 Mu taangu mo yiina, pofi a Pfumu ayamonehele ŋa busu bwa Zakariya. Pofi mo aba ateleme ŋa mbahala a diiku la paha a tsulu yimbwe. 12 Bu Zakariya hamoni pofi, nde akimuhi na aluuli mu boomo.

13 Ka pofi aleeli nde: «Zakariya, a baa na boomo ve. Nzambi miyuha lisambulu la we: Mukadi a we Lisabeti ubutala we mwaana wa bahala, na we uluha nde nduhi Yowani. 14 Buuna Yowani uba huli we dyaambu la kinya yindahi, na musangu. Mu tooni a mbutili a nde, ba banzuhisini bu umono kinya. 15 Nde uba wu munene ŋa busu bwa Pfumu. Nde a hunywa vinye ve, tso pasi malamu ma mu ubaakolese ve. Nde uluula mu Livupu la Ngidi, ubaandiha mutso a moonyi a ngu a nde. 16 Ni nde Yowani, wu ubwefutala bisu Isereli ba banzuhisini, huli Pfumu Nzambi a bo. 17 Nde uyene ŋa busu bwa Nzambi mu livupu na mifudi bi mumbihuli Eliya. Nde unongese mitima mi bataata na mya baana. Nde ufutala baatu ba baaveleyuhala Nzambi, mu uba ba baasungama. Na nde uvanga ibaandu hya Pfumu hi hyafwana.»

18 Zakariya aleeli huli pofi: «Buni me umono imbuli? Mu tooni ati, me na mukadi a me, laaka binunu.» 19 Pofi afutili nde: «Me ni Ngabiyeli, wu ubaateleme ŋa busu bwa Nzambi mu ukumbasa nde. Nzambi miitsindaha me mu umohese we, na uyabisa we musamu mo wunuwu, wu mubwe. 20 Ka bu we velisa hiitu ti mambu ma me nde li we mu uvangama, we uba iduka. We a ubwetwala uyambila ve, natee mu ilumbu hi mo mu uvangama. Mambu mo maniima mu uvangama mu taangu yi yafwana.»

21 Mu taangu mo yiina, baatu baakakeele Zakariya, na baakimuhi bu nde hadiingi mu nzo a Nzambi. 22 Bu hapali mu nzo a Nzambi, nde a hatwali uyambila na bo ve. Ka nde akavese bo, na nde akwilili buduka. Na bo baayaabi ti nde amoni imono-miisu mu nzo a Nzambi. 23 Bu bilumbu bya nde bi isalu hya Pfumu byafwidi, nde afutihi hu nzo a nde.

24 Mwana taangu bu yavyohi, mukadi a nde Lisabeti abahi yimi. Mukadi mo, aswemi mu batsungi bataanu, na akaleele: 25 «Mono ma Pfumu hamiisiila me. Mu taangu yi, nde miisukasa ma maakamweese me tsonyi ŋa busu bwa baatu boosi.»

26 Bu yimi la Lisabeti laakuhisi batsungi basamunu, Nzambi atsindihi pofi wa nduhi Ngabiyeli hu Nazareti, musyenge a Ngalili. 27 Nde atsindihi pofi huli nuumba yi baakateele Mariya. Nde aba mutangula a Yosefi, muutu wu imbisa hya pfumu Davidi. 28 Pofi akoti huli nde na aleeli: «Bwehe! Ba mu kinya mu tooni ati, Pfumu amiisa we hyese, na nde li na we.» 29 Mariya bu hayuhi mambu mo maana, akimuhi hu unzuhisini na akafuula hutso mutima a nde: «Ki pila a bwehe bwa bunuubu?»

30 Pofi aleeli Mariya: «A baa na boomo ve! Mu tooni ati, we miibaha hyese ŋa busu bwa Nzambi. 31 Mono, we ubaha yimi, we ubuta mwaana wa bahala, na we uluha nde nduhi Yisu. 32 Nde uba wu munene, na bu ukaateele nde Mwana a Nzambi a Pungu. Pfumu Nzambi uva nde itsiha hi ipfumu hya Davidi, kaaha a nde. 33 Nde utuma ŋa yulu ibaandu hya Yakobi mu bilima na bilima, Ipfumu hya nde a hyufwa ve.»

34 Mariya aleeli huli pofi: «Buni mambu mo maniima mu utswiha? Mu tooni ati, me a hanzaba bahala ve!» 35 Pofi afutili nde: «Livupu la Ngidi lu ukulamana ŋa yulu a we, na matwala ma Nzambi a Pungu mu ufuuha we mu posi a mo. Ni mu buuna, mwaana wa ngidi wu bu ubuta, sa bateele nde Mwana a Nzambi.»

36 «Mono, Lisabeti ikuta hya we kaka amiibaha yimi, mu ubuta mwaana wa bahala hu bununu bwa nde. Nde wu baakateele inguma, yimi laaka batsungi basamunu. 37 Mu tooni ati, Nzambi a baakondo dyaambu ve.»

38 Mariya aleeli: «Me ndi musalili a Pfumu wu mukaasu. Nyaha mambu ma we mavangama ŋa yulu a me.» Ka buuna, pofi asiisi nde.

39 Mu matsuhu mo maana, Mariya atelimi na ayeni mawasa hu musyenge wu bisyelo wa Yuda. 40 Ni huuna nde hakoti mu nzo a Zakariya, na asuuli Lisabeti. 41 Mu taangu yi Lisabeti hayuhi bwehe bwa Mariya, mwaana anyingimi mutso a moonyi a nde. Lisabeti aluuli mu Livupu la Ngidi, 42 na afulihi mu mifudi: «Nzambi asyeme we hwafula bakaasu boosi, na mwaana wu we ubuta li wu baasyeme. 43 Buni hutwala uba ti ngu a Pfumu a me aya huli me? 44 Me ndeeli buuna mu tooni ati, mu taangu yi me nzuhi bwehe bwa we mu matswi ma me, mwaana nyingimi mu kinya mutso a moonyi a me. 45 Kinya yili na we mukaasu wu siidi hiitu, ti Pfumu sa avangimasa ma nde hayabisi we.»

46 Titswene Mariya aleeli:

«Muvumu a me yusa Pfumu,

47 na livupu la me lili mu kinya mu Nzambi, Muyobili a me.

48 Mu tooni ati, nde amiisusa miisu

ŋa yulu musalili a nde wu mukaasu wu akulamana.

Eye, bunuubu, baatu ba matungi moosi bu ukaaleele me:

nga hyese.

49 Mu tooni ati, Nzambi nga Matwala miisa me mavaanga mamanene.

Nduhi a nde yili ya ngidi.

50 Kwili lingebe a Nzambi, yi baaba taangu yoosi mu matungi na matungi.

Nde ubaava yo huli boosi ba bubaakiinza nde.

51 Nde miimweese mifudi mya hoho hwa nde.

Nde miitsala boosi ba babeedi na matsimi ma isaayi mutso mitima mya bo.

52 Nde miikulamasa banga matwala ŋa yulu makiti ma bo ma ipfumu,

ka nde miisyenolo banga bulembo.

53 Banga nzala, nde miiywatisa bo mu ma mabwe,

ka miifutala bisina myoho bunyanga.

54 Nzambi amiiyobolo Isereli musalili a nde,

a havusana baa bubaasalila nde ukwila lingebe ve.

55 Ni mu buuna, Nzambi hamisa nzuhisini huli bakaaha ba bisu,

huli Abrahami na imbisa hya nde mu bilima na bilima.»

56 Mariya atsahili huli Lisabeti batsungi bebele na batatu, na nde afutihi hu bula bwa nde.

57 Tangu Lisabeti yi ubuta bu yatoodi, nde abuti mwaana wa bahala. 58 Tungi la bula, na baatu ba ibaandu hya Lisabeti, baayuhi ti Pfumu amweesi kwili a nde lingebe huli nde. Na bo baasangili itwadi na nde.

59 Bu mwaana hakwasi bilumbu pombo, baatu baayidi hu ukete nde. Bo baakatondo uteele nde mu nduhi a taata a nde, Zakariya. 60 Ka ngu a nde aleeli: «Naana, bu uteele nde: Yowani.» 61 Bo baabisi na baaleeli nde: «Mu ikuta hya we, a huli na muutu nga nduhi mo yiina ve.» 62 Na mu biliimbu, bo baafuuli taata a nde Zakariya, mu uyaba ki nduhi nde atondi uva mwaana. 63 Zakariya avondi itini hya baya mu usonehe, na nde asonihi: «Nduhi a nde: Yowani.» Na baatu boosi baakimuhi.

64 Mawasa-mawasa, ndaha a nde yadibumi. Zakariya akatoyo na uyusa Nzambi. 65 Baatu boosi ba ibingi mo hiina baaba na boomo, na baa itaanzi hi bisyelo bya Yuda, baakayambila mu tooni a moosi ma maabwidi. 66 Boosi ba baakayuha maana, baakakeelese mo hutso mitima, na baakaleele: «Imwa-mwana mo hinihi na hu uba?» Hoho hwa Pfumu mu mbuli, hwaba ŋa yulu a nde.

67 Zakariya, taata a Yowani, aluuli mu Livupu la Ngidi na abihuli bunuubu:

68 «Muyusu huli Pfumu Nzambi mabuli ma Isereli,

mu tooni ati, nde ayidi mu uyobolo baatu ba nde.

69 Na bu nde abehili bisu Muyobili nga matwala, wu imbisa hya Davidi,

musalili a nde.

70 Ni maana ma nde hayabisi mu minywa mi mimbihuli mya nde mya ngidi,

umata matangu ma maavyohi.

71 Nde asiidi nzuhisini ti, nde uyobolo bisu mu myoho mi baboho ba bisu,

na mu matwala ma babali mu ubelele bisu.

72 Nzambi amweesi kwili a nde lingebe huli bakaaha ba bisu.

Na nde ayibwili moonyi mu nzuhisini a nde ya ngidi.

73 Ni mulabu wu nde halabi huli Abrahami, kaaha a bisu.

74 Nde ayobili bisu ŋa myoho mi baboho ba bisu,

mana bisu libaasalila nde hwavele a boomo,

75 napa mu bungidi na butsiitsa bu bwafwana mu nde.

Bisu libaasalila nde mu bilumbu byosi bi idiingu hya bisu.

76 Na we, mwaana a me, bu uteele we mumbihuli a Nzambi a Pungu,

mu tooni ati, we uteehele Pfumu mu uvangila nde nzila,

77 mu uyabisa baatu ba nde ti nde uyobolo bo, mu umaasa masumu ma bo.

78 Nzambi a bisu usa buuna,

mu tooni bunene bu lingebe la nde.

Litondo mo liina lu uba we ŋa nyangu ubaapala hu yulu, na umwedeme ŋa yulu a bisu.

79 Nde kaka uyalusa ba bali mu pipidi na mu posi lipfu,

mana babita bisu mu nzila a hyenze✝.»

80 Ka Mwana akakula na uhwada mu livupu la nde. Nde akatsahala hutso a kumu, natee ilumbu hi nde hayamonehele ŋa busu bwa bisu Isereli.