1 Humbisa a maana, Yisu akataangila misyenge na mala. Huuna nde akalongese na uyabisa Musamu wu Mubwe wu Ipfumu hya Nzambi. Biluumbi bya nde kuumi na byole byaba na nde. 2 Hwaba ka na bakaasu ba baabeeluhi mu mavupu ma mabi, na mu mabeedu ma pila mu pila, bo ka baaba na nde. Mariya muusi Magadala, wu Yisu hapalisi matengo tsambu mu nde, aba ka na bo. 3 Mukima Zana mukadi a Kuza, ikanga-koome hya nzo a Eloode, mukima ka Suzaana, na bakima ba baakahwadisa Yisu na bayihi ba nde mu mbahili yi bo baaba na yo.

4 Bu konge a baatu yinene yi yamaati hu pasi musyenge, ya yadiinga Yisu, nde atiidi bo kuma moyi: 5 «Hwaba na muutu mumosi wu ayeni hu ngundu a nde hu unyanza muhunu. Bu nde hakanyanza mbutu, mbutu yina yabwidi mu musoho, baadyati yo, na banyunyi baadiidi yo. 6 Mbutu kima yabwidi ŋa yulu a manya. Mbutu bu yameni, mitswihala myakanyi mu tooni ati a myabahi mamba ve. 7 Mbutu kima yabwidi hutso bangamba, bu byakuli itwadi, bangamba baaswekimisi mitswihala. 8 Ka mbutu kima yabwidi hunaa ŋa toto a mbolese. Bu yameni, na yabuti mbutu kama kama.» Na Yisu asyenuli ndaha: «Muutu nga matswi ma uyuha, ayuha!»

9 Bayihi ba Yisu baafuuli nde mbindulili a kuma mo yiina. 10 Yisu aleeli huli bo: «Huli benu Nzambi amiiva bungodu bu uyaba matswehi ma Ipfumu hya nde. Ka huli baatu bakima, me ndi mu unzabisa bo mo mu makuma, mana

"Tso bo baatala, bo umono ve,

na tso bo baayuha, bo utsikaha ve✝."»

11 «Mbindulili a kuma mo yiniiyi: muhunu ni mambu ma Nzambi. 12 Mbutu yi yabwidi mu muvanga a musoho, ni baatu ba bali mu uyuha mambu ma Nzambi. Ka Mukuyi ubayamaasa mo mu mitima mya bo, mana bo bavelesa hiitu na bavelefuuha. 13 Mbutu yi yabwidi ŋa yulu a manya, ni baatu babali mu uyuha mambu ma Nzambi na babaayaka mo na kinya. Ka bo a bali na manganzi ve, imiinu hya bo hili hya taangu yi keehe. Ŋa taangu lobese, bo bamiitimba byosi. 14 Mbutu yi yabwidi ŋatso matsyende, ni baatu ba bubayuha mambu ma Nzambi. Mu mambu ma idiingu hya bo ma we minyongi, busina na makinya ma tsi, bibaakwamisa bo mana bo bavelebuta mbutu yi yayele. 15 Titswene, mbutu yi yabwidi ŋa toto ya mbolese, ni baatu baana ba bubaayuha mambu ma Nzambi. Bo ba baakaanga mo mutso mitima mi mibwe na mya mbuli. Mu mukonono a bo, bo bali mu ubuta mbutu.»

16 «Muutu a hubabaangisa mwinda mu uswehe nde hutso itehili, buuve mu ususa nde hu tsina a taangi ve. Ka bubaasuusa nde ŋa isuusili hya nde hi hyasyenoho, mana baatu ba bu ukoto mu nzo bamono liyalala. 17 Ka pasi isiha hi hyasweme, sa himonehele ŋa liyalala. Na moosi ma maaswemene, sa mayabaana. 18 Ni buuna, baakebaani bu benu libaayuha misamu. Mu tooni ati, sa babwese uva huli woosi wu amiibaha. Ka huli wu avele na isiha, tso bi nde hamiisa hiitu mu ubaha, sa bapatula.»

19 Ngu a Yisu na baana ba ngu a nde baayidi hu uyamono nde, ka a baamoni nde ve mu tooni a konge a baatu. 20 Ni mu buuna, baatu baayabisi Yisu: «Ngu a we na baana ba ngu a we bali hu mbadi, na batondi umono we.» 21 Ka Yisu afutili bo: «Ngu a me na baana ba ngu a me, ni baana boosi ba bubaayuha mambu ma Nzambi na baa bubaasalila mo.»

22 Ilumbu himosi, Yisu akoti mu bootehe na bayihi ba nde. Nde aleeli bo: «Tswendaani hu simu lina la dyanga.» Buuna, bo baayeni. 23 Bu bo baakayene mu bootehe, Yisu abwamini tolo. Bu baaba mu dyanga, masulubete, ifula hi mifudi hyayabwa. Bootehe laluuli mu mamba na bo baaba mu pasi yi lipfu. 24 Bayihi bayasusaha ŋa pedu a Yisu, na baaleeli: «Mulongisi! Mulongisi! Bisu likwi!» Yisu asuuhi, apamini ifula na mapo. Ifula na mapo byakulimini, na byasiidi «swi». 25 Buuna, Yisu aleeli bayihi ba nde: «Imiinu hya benu, ka hya hyo?» Ka bo baamoni tsisu na kimuhili, na bo baakalelesene: «Ki pila a muutu wu, wu ubaatuma ifula na mapo bibaayuhala nde?»

26 Yisu na bayihi ba nde, bu baasabuhi dyanga la Ngalili te hu simu lina, bo baayato hu itaanzi hya Ngelaseneya. 27 Bu Yisu hakasutaha mu bootehe, muutu mumosi mu musyenge mo wuuna wu matengo maaba maamilwata, ayabwana na nde. Umata beleve, nde a hakabwelwata bikutu ve. Nde a hakabwetsahala hutso a nzo ve, ka ndulu hu mapembe.

28,29 Ka mataangu ma malahi, tengo moli laakakaanga nde. Ni mu buuna, mu uliha nde mu ubaayene, baaba bakuta nde mapanga na uhada nde bitali mu miilu. Ka nde akabaakese byo. Tengo lakabaabita nde hu kumu a nzala. Bu muutu mo hamoni Yisu, nde ayami, na nde ayabwa ŋa miilu mya Yisu. Yisu atumi tengo mu upala mu muutu mo wunuuwu. Muutu mo aleeli mu mifudi myosi: «Bisu a we ki tooni, Yisu Mwana a Nzambi a Pungu? Kolo-kolo a we, a hakwamisa me ve.»

30 Yisu afuuli nde: «Nduhi a we na?» Nde afutili: «Nduhi a me "konge".» Nde hafutili buuna mu tooni ati, konge matengo yaba yakoto mu nde. 31 Mihisi mo miina myayayini Yisu mana nde aveletuma myo mu uyene hu mbeenge ya doheselee*. 32 Ka ŋa pedu a ŋana, hwaba na konge yinene yi bangulu yi yaba mu udya ŋa yulu isyelo. Matengo mayayini Yisu mu uva mo muswa mu ukoto mutso bangulu mo baana, nde asiingisi mo. 33 Buuna matengo maapali mu bahala mo lina, na maayakoto mu bangulu. Na konge bangulu yoosi, yayabungamana hu tsina isyelo natee hutso a dyanga, na yadyami «ndwi».

34 Bakeelisi babangulu bamono ma maavyohi, baabati, na baayayabisa musamu hutso musyenge mo na mu mala. 35 Baatu bubaayidi hu yamono ma maavyohi, bo bato ŋa Yisu haba, baamoni muutu wu matengo maapali mu nde. Nde aba atsahala ŋa miilu mya Yisu, nde aba alwata bubwe, matsimi ma nde mafutihi ŋa mbuha. Bu bo baamoni nde, bo baaba na boomo. 36 Ba baamoni ma maavyohi, baayabisi bo buni nga matengo hayobihi.

37 Ni mu buuna, bisu Ngelesaneya boosi baabahi boomo bu bulahi. Na baayavondo Yisu mu utahuha na bo. Nde abwekoto mu bootehe na afutihi. 38 Muutu mo wu ayobihi mu matengo, afuuli Yisu tso nde utwala uyene na nde. Ka Yisu afutili na aleeli nde: 39 «Futaha hu nzo a we, na yayabisa moosi ma Nzambi amiisiila we.» Na muutu mo ayeni mu uyayabisa mu musyenge woosi ma Yisu hasiidi nde.

40 Bu Yisu hayafutaha, konge yinene yayaki nde, mu tooni ati boosi baakakeele nde. 41 Na bahala limosi nduhi Yayiro wu aba mukuutu a nzo lisambulu yi Bayudaayo ayidi. Nde ayabwa ŋa miilu mya Yisu, na avondi nde mu uyene hu bwa nde. 42 Nde haleeli buuna, mu tooni ati, liviingu la mwaana a nde wu mukaasu, wu aba tungi la kuumi na bilima byole, aba ŋa lipfu. Bu nde haba mu dwe huuna, konge a baatu yakavinyala nde.

43 Hwaba na mukaasu nga bubeedu bu makila: makila maakapuuha nde hwavele ukanya umata bilima kuumi na byole. Na nde amani bya nde byosi huli babuhi, ka tso mumosi mu bo a habeelusi nde ve. 44 Nde ayasusaha ŋa mbisa a Yisu, na abembi tsoso ikutu hya nde. Mu mawasa, makila ma nde maakanyi. 45 Na Yisu aleeli: «Na mibembe me?» Bu boosi baakatuna, Peetelo aleeli nde: «Mulongisi, ni konge yi yadiinga we yili mu uvinyala we matsyelo moosi.» 46 Ka Yisu afutili: «Muutu mibembe me. Me mimono ti mufudi mipala mu me.» 47 Bu mukaasu mo wunuuwu hamoni ti nde a hakibwesweme ve, nde ayasusaha na likamba, na abwi ŋa miilu mya Yisu. Na ŋa busu bwa baatu boosi, nde ayabisi tooni yi nde habembi Yisu, na buni nde habeluhi kidumana. 48 Yisu aleeli nde: «Mwana a me, imiinu hya we hi mifuuhasa we, yene mu hyenze.»

49 Bu nde hakatoyo, muutu mumosi amati huli mukuutu a nzo lisambulu yi Bayudaayo, ayidi na ayaleele: «Mwana a we mikwa, nyaha ubwekwamisa mulongisi.» 50 Ka Yisu bu hayuhi buuna, aleeli Yayiro: «A haba na boomo ve! Sa ndulu hiitu mu Nzambi, na nde sa afuuha.»

51 Bu Yisu hayato hu nzo a Yayiro, nde a hasingisi pasi muutu mu ukoto na nde ve. Ka ndulu Peetelo, Yowani na Yaki, na taata na ngu a mwaana baakoti na nde. 52 Baatu boosi baakalila na baaba mu lingebe mu tooni a mwaana. Ka, Yisu aleeli: «A lilila ve, nde a hakwa ve, ka nde tolo ali.» 53 Na bo baakakwede nde, bo baaba baayaba ti nde amiikwa. 54 Ka Yisu akaangi mwaana mu hoho, na aleeli mu mifudi: «Mwana a me, teleme!» 55 Muvumu a mwaana ayafutaha: mu mawasa mwaana asuuhi na atelimi. Yisu atumi mu uva nde byudya. 56 Ngu na taata a mwaana baakimuhi hu unzuhisini, na Yisu alihi bo mu uveleyabisa pasi muutu ma maavyohi.