1 Ilumbu imosi, Yisu akasambila ŋa mbuha mosi. Bu nde hamani, muyihi a nde mumosi ni uleele nde: «Pfumu, longese bisu usambila Nzambi, we bu Yowani halongisi bayihi ba nde.» 2 Yisu ni uleele bo: «Ŋa benu libaasambila, baaleelaani bu:

"Taata,

nyaha nduhi a we bakiinza,

nyaha Ipfumu hya we hibaaya!

3 Byudya bya bisu bya pasi tsuhu,

va bisu loloyi.

4 Nyahula masumu ma bisu,

we bu bisu ka libaasa kolo-kolo,

huli baa bubaavaanga bisu ma mabi,

kaakala bisu mu ukoto mu ma mabi."»

5 Yisu abweleele bo: «Buhuli muutu mumosi mu benu li na mbaahi, na nde yamono nde hu hahati a busi na uleele nde: "Mbaahi a me, soombese me mapa matatu. 6 Mu tooni ati, mumosi mu bambaahi ba me miimata hu mudyenge miya huli me, me andi na hi me upa nde ve." 7 Na tso wu uli hu hati a nzo futili mbaahi a nde: "A kwamisa me ve, bunuubu munywa a nzo baamiidibuha, bisu a baana ba me laaka tolo, me a utwala usuuha mu uyava we mapa ve." 8 Me ndeele benu, nde a huteleme mu uyava nde mo mu tooni bumbaahi bwa bo ve. Ka nde sa ateleme mu tooni mukebudu a nde, na nde sa ava nde byosi bi nde ali na byo nzala.

9 Na me ndi mu undeele benu: Vondwaani, na benu sa liyaka; sahaani, na benu sa lisoolo; doodwaani, na sa badibula benu munywa a nzo. 10 Mu tooni ati, pasi nde wu ubaavondo, ubaayaka; woosi wu ubaasaha, ubaasoolo; bu baadibula munywa a nzo huli wu li mu udoodo. 11 Ki taata ŋa hati la benu, tso mwaana a nde li mu uvondo nde tswi, nde uva nde taadi na myangala myosi? 12 Buuve tso nde vondi nde ki, nde sa ava nde ngeenge? 13 Ni mu buuna, tso benu baa lili banga bubi, benu li yaabi uva baana ba benu bisiha bibibwe. Tandisini a Taata wa hu yulu, buni nde hu uveleva Livupu la Ngidi huli boosi ba bali mu uvondo nde lo!»

14 Yisu abingi tengo li laasiidi muutu mumosi buduka. Bu tengo laapali, muutu mo ayambili, na konge a baatu yaba hutso a kimuhili. 15 Ka bakima ŋa hati la bo baaleeli: «Mu matwala ma Belesebuli, pfumu matengo, nde ubaabinga matengo!» 16 Na, bakima mu umese nde, mu utehele nde mweto. Bo baakasaha iliimbu hya kimuhili hi hyumata hu yulu. 17 Ka Yisu bu haba hayaba matsimi ma bo, nde ni uleele bo: «Pasi ipfumu hi baatu bali na buraandu ŋa hati la bo, hi baafwa mu utsamuha; manzo ma hyo ni ubaasyengomono ŋa yulu a mana. 18 Tso Saatana kabuhi na nde mo, ipfumu hya nde utwala ukwilala ve. Ka benu lili mu uleele ti me umbambinga matengo mu tooni a Belesebuli wu ubaava me matwala. 19 Tso mu mbuli me umbambinga mo mu Belesebuli, ka bayihi ba benu, na ubaava bo matwala mu ubingasa mo? Ni mu buuna, bayihi ba benu sa baba bo mwakulu baatsundisi baa benu. 20 Ka tso mu matwala ma Nzambi me ndi mu umbinga matengo, Ipfumu hya Nzambi ka hyamiiyato natee huli benu.

21 Bu muutu nga mifudi na bilwanili bya nde ubaakeelese nzo a nde, bya mu nzo a nde byosi bili ŋa mbuha ya tsiki. 22 Ka tso muutu wu aluta nde mifudi yalwanisa nde na biingili nde, nde sa apatula nde bilwanili byosi bi nde abeedi hasa hiitu. Na nde sa apatula bya nde byosi na ukaba byo. 23 Woosi wu avele itwadi na me li muboho a me. Woosi wu aveleyakumbasa me mu ukuukaha baatu, nde li mu utsala.

24 Ŋa livupu lilibi limiipala mu muutu, lo libaayene yayuhu mu mambuha ma kumu a nzala, mu usaha ivumili. Bu lo livelibaha ivumili, lo ka ubaaleele: "Me ka ufutaha hu nzo yi me apali mu yo." 25 Ŋa lo lufutaha hu nzo mooyina, lo sa libiisa nzo yi baakombolo, yi baavanga bubwe. 26 Na lo libaayene mu uyavolo mavupu ma mabi tsambu makima ma maluta lo bukanyi, na lo libaayafutaha na mo. Mo mabaakoto mu nzo na ukwilala muuna. Na idiingu hya tsyelele hya muutu mo wunuuwu hibaafula pasi na hyatsomi.»

27 Ŋa Yisu hakaleele buuna, mukaasu mumosi afulihi ŋa hati la konge a baatu: «Kinya yili na mukaasu wu abuta we na wu anywisi we mabeelo!» 28 Ka Yisu afutili: «Kinya homo yili na ba bali mu uyuha mambu ma Nzambi na baa bubaasalila mo.»

29 Bu makonge ma baatu maakakula mu muvanga a Yisu, nde abweleele: «Baatu ba tungi moli, bali baatu bababi. Bo bali mu usaha iliimbu hi humweese ti Nzambi ni wu atsindihi me. Ni mu buuna, a busiila bo iliimbu ikima ve ŋa yulu a hi mumbihuli Yonasi. 30 We bu Yonasi haba iliimbu huli bisu Niniive, ni buuna ka, Mwana a Muutu sa aba iliimbu mu baatu ba loloyi. 31 Mu ilumbu hya tsundusu, mutumi wu mukaasu hu tsi a Sude uteleme ŋa busu bwa baatu ba tuungi mo liniili, na ukese bo. Nde huusa buuna, mu tooni ati nde amati hu matsi ma maafulala lala ŋa toto. Nde uya mu uyaayuha mambu ma maaluula mu tsiki ma mutumi Soolomo. Ka ŋaniiŋa huli na nde wuuna wu aluta Soolomo. 32 Mu ilumbu hya tsundusu, baatu ba Niniive sa bateleme ŋa busu bwa baatu ba tungi moli, na sa bakeese bo. Mu tooni ati baatu ba tsi a Niniive baasobi mbiili a bo, mu tooni a ndongisili a Yonasi. Ka ŋaniiŋa huli na nde wuuna wu aluta Yonasi!

33 A huli na muutu wu ubabaangisa mwinda mu ususa nde ŋa mbuha yi yasweme ve, buuve hutso a poonzi. Ka bubaasuusa nde ŋa isuusili hya nde hi hyasyenoho, mana babali mu ukoto mu nzo, bamono liyalala. 34 Diisu la we lili mwinda a nyutu a we. Tso diisu la we lili polo, nyutu a we yoosi yili hutso liyalala; ka tso diisu la we lili li laabeele, nyutu a we yili hutso a piipidi. 35 Ni mu buuna, baakele, mana liyalala li lili mu we a liyilasa we busi. 36 Bumosi ka, tso nyutu a we yoosi yili hutso liyalala, hwavele inama imosi hutso a piipidi, yo yoosi sa yiba hutso liyalala. Nyutu a we, sa yiba we bu mwinda huyalusa we mu liyalala la nde.»

37 Bu Yisu hamani uyambila, Mufarisi mumosi avondi nde mu uyadya huli nde. Yisu akoti na atsahili mu udya ilaambu hi itwadi. 38 Mufarisi akimuhi bu nde hamoni ti Yisu a haswahi myoho ve tswamina mu udya. 39 Pfumu ni uleele huli nde: «Mono buni benu lili, benu Bafarisi: benu libaaswaha mu utsyemese imbadi hi mambuungu na bikoombe bya benu, ka hutso mitima mya benu hwaluula mu nzala uyiba na ma mabi. 40 Benu a lili na buyedi ve! Bee Nzambi wu avanga mbadi a havanga ka hati ve? 41 Ni mu buuna, baavaani biyaha bisiha biina bi bili hutso mambungu na bikoombe bya benu. Na byosi sa biba bi byatsyeme huli benu.

42 Lingebe huli benu Bafarisi! Mu tooni ati, benu libaava Nzambi ikuuku hya kuumi-kuumi hya bi benu libaakuna hutso matsyehe ma benu we lenge, banduungu baa mbala, na paa misooso mya pila mu pila. Ka benu li baatimba mbiili yimbwe na litondo la Nzambi: biina ti ni bisiha bya tsiki bi benu lafwana usalila, hwavele uvusaana bina. 43 Lingebe huli benu Bafarisi! Benu laatondo bitsiha bi byafula umonehele mu manzo ma masambulu ma Bayudaayo. Benu ubaatondo ti baava benu mabwehe ma maaluta butsitu ŋa miisu ma baatu. 44 Lingebe huli benu! Mu tooni ati benu lili we bidunda bi baaveletsikaha, na baatu bu baasumaha ŋa bubaadyata byo hwavele uyaba.»

45 Ngeele mikele mumosi ni uleele Yisu: «Mulongisi, ŋa we li mu utoyo buuna, we paa bisu li mu utuha!» 46 Yisu afutili: «Lingebe ka huli benu bangeele baa mikele! Benu libaakwiha baatu mipfuna mi myaleme mu ubita. Ka mipfuna mo miina benu mwakulu a libaabembe myo mu ukumbasa bo mu utsyete tso mu mulembo a benu mumosi ve. 47 Lingebe huli benu! Mu tooni ati benu libaatuunga mangila ma mimbihuli, mimbihuli mi bataata baa benu baadubi. 48 Ni buuna benu lili mu umweese ti benu lili mu usilasa mavaanga ma bakaaha ba benu. Mu tooni ati bo baadubi mimbihuli, na benu, benu lili mu utuunga mangila ma myo. 49 Ni mu buuna Nzambi mu bungeele bwa nde aleeli: "Me tsa tsindaha bo mimbihuli mya me, na biluumbi bya me. Baatu sa baduba bakima ŋa hati la bo, na sa batsuta bakima." 50 Ni mu buuna, baatu ba taangu yi, Nzambi ukwiha bo mupfuna mapasi ma lipfu li mimbihuli myosi umata pangili a tsi. 51 Nzambi ukwiha bo mupfuna umata lipfu la Abeli natee la Zakariya, wu baadubi ŋa hati la diiku la tsuhili bungodu na nzo a Nzambi. Eeye, me ndi mu utsilasa benu, baatu ba taangu yi sa bafuta mapasi ma, mu tooni mapfu moma. 52 Lingebe huli benu, milongisi mi mikele! Mu tooni ati benu lamaasa tsaafi a ndibulili munywa a nzo a nzaabili: benu mwakulu a libaakoto ve, na benu libaakala ukoto huli boosi ba bali na nzala ukoto.»

53 Ŋa Yisu hapali mu nzo mo yiina, milongisi mi Mikele na Bafarisi baabahili nde kesi yi mifudi. Bo baabwi mu uva nde byuhu mu misamu mya pila mu pila. 54 Bo baatehili nde myeto mu uyehele usoolo dyaambu lilibi mu ma nde hakaleele.