1 Bu Yisu hamani uleele mambu mo maniima mosi huli baatu ba baababaadiinga nde, nde ayeni hu musyenge a Kapernahumi. 2 Huuna, hwaba na mukuutu a kama li masadaadu, wu aba na musalili mumosi wu nde haba hatondo. Musalili mo wuuna abeedi na ubeele hwa ŋa pedu lipfu. 3 Bu nde hayuhi tsangu a Yisu, nde atsindihi mwaana kabu li bakuutu ba Bayudaayo, mana bayalembesene nde mu uyabeeloso musalili a nde. 4 Bo baayato ŋa hwaba Yisu, baayayini nde: «Ufwani ti ni we uva bahala moli likumbasa, 5 mu tooni ati, nde atondo tsi a bisu. Nde ni wu atunga nzo a bisu yi lisambulu.»

6 Yisu ayeni na bo. Bu bo batoodi bebele na nzo mukuutu mo, nde atsindihi bambaahi ba nde huli Yisu mu uleele nde: «Pfumu, amono nzuhu ve mu tooni ati, me andi wakuha ti we koto mu nzo a me ve. 7 Ni mu buuna, me wu aveleyelemene pelinza me mwakulu mu uyamonehele na we. Ka leele dyaambu limosi, na musalili a me sa abeeloho. 8 Mu tooni ati, me mwakulu ndi hu tsina lituma li bakuutu ba me. Ka me kaka na masadaadu hutso lituma la me, na me undeele huli mumosi mu bo: "Yene!" – Na nde yeni. Na huli mukima: "Yanga!" – Na nde yidi. Huli muviha a me, me undele: "Sa bu!" – Na nde siidi.»

9 Yisu ayuha mambu mo maana, nde asilisi mukuutu masadaadu. Nde akinguhi huli konge yi yakaduukala nde, na aleeli: «Me ndeele benu, tso hu Isereli, me a hamoni imiinu hya pila moyi ve.» 10 Bambaahi baa mukuutu bafutihi hu nzo a nde, na baayabiisa musalili a nde amiibeeloho.

11 Ilumbu hi hyaduuki, Yisu ayeni hu musyenge wa nduhi Nayini. Bayihi ba nde na konge yinene baakayene na nde mu nzila. 12 Bu nde hatoodi bebele na musyenge, nde abwani konge a baatu yi yakayadiiha mwaana mukwili. Mwana mo aba livingu la bahala. Bisu bula ba banzuhisini baakaduukala ngu a mwaana.

13 Pfumu amoni mukwili na aluuli mu lingebe mu nde, na aleeli: «Nyaha ubwe lila!» 14 Titswene, nde ayasusaha na abembi kasu. Ba baakabita yo baatsikimi. Nde aleeli: «mupfudu-mbahala! Me tumi we, teleme!» 15 Na mwaana wu akwa atsahili, abaandihi utoyo. Yisu afutili nde huli ngu a nde. 16 Bu baatu baamoni maana, boosi baakiinzi na bayusi Nzambi. Bo baakaleele: «Mumbihuli wu munene mimonele ŋa hati la bisu. Nzambi miyakumbasa baatu ba nde.» 17 Musamu mo wunuuwu atsaamuhi itaanzi hya Yuda hyoosi, natee mu mala ma ibiingi hina hyoosi.

18 Bayihi ba Yowani baayabisi nde moosi ma makavyoho. Yowani ni uteele boole ŋa hati la bo. 19 Nde ni utsindaha bo huli Pfumu mu ufula: «We ni Masiya wu afwana uya, vo bisu lafwana ukeele mukima?»

20 Bo bato huli Yisu, bo ni uleele nde: «Yowani Mutondihi mitsindaha bisu huli we mu ufuula we bu, "We ni Masiya* wu afwana uya, vo bisu lafwana ukeele mukima?"» 21 Ka mu taangu mo yiina, Yisu abeelusi baatu ba banzuhisini: babeedu, bikata, na banga mavupu ma mabi. Na nde abeelusi ka binzimana bi bilahi.

22 Yisu afutili bo: «Ya yabisaani Yowani ma benu limiimono, na ma benu limiiyuha. Binzimana bili mu umono, bikata bili mu uteleme na uyene, banga bwatsi bali mu utsyeme, bikwa-matswi bili mu uyuha, babaakwa bali mu usuuha, na biyaha bili mu uyuha musamu wu mubwe. 23 Kinya yili na muutu wuna wu uvelebwisa imiinu hya nde mu tooni a me.»

24 Biluumbi bya Yowani bu byafutihi, Yisu abwidi mu utoyo mu tooni a Yowani huli konge a baatu: «Benu hima layatala hu kumu? Litsotso li ifula hili mu unyingasa? 25 Ka benu na laayamono? Muutu walwata bikutu bibibwe? Naana! Ba bubaalwata bikutu bibibwe na babali hutso busina, ubaatsahala hutso bibaanga bi batumi. 26 Ka na benu laayamono? Mumbihuli? Eye, me ndeele benu, wa luta paa mumbihuli. 27 Yowani, nde wuna wu baasonehe:

"Mono, me tsa tsindaha iluumbi hya me hu busu bwa we,

mu uvangila nzila a we.✝"

28 Me ndeele benu ti ŋa hati la baatu a huli wu alutaala Yowani ve. Ka wuli ikenyi mu Ipfumu hya Nzambi, alutaala nde. 29 Baatu boosi, na paa bakaambi ba limandu baayuhi ndongisili a Yowani. Bo baasilisi ti Nzambi li wakuha, na baayaki tondihili a Yowani. 30 Ka Bafarisi na milongisi mi mikele baanyasuli hwa bo litondo la Nzambi, na baabisi tondihili a Yowani.

31 Baatu ba taangu moyi, na baana me utwala ufwanisa bo? Bo na baana baafwanina? 32 Bo baafwana we baana ba bangebe ba baatsahala ŋa saandu, ba bali mu utelesene na bali mu uleele: "Bisu lafulili benu munzololo, benu a laakini ve! Bisu layimbili benu nyimbu yi ikwili, benu a laalili ve." 33 Bu Yowani Mutondihi hayidi, nde lipa udya ve, nde malamu unywa ve, na benu lili mu uleele: "Tengo lamilwata nde." 34 Mwana a muutu miiya. Nde li mu udya, nde li mu unywa, na benu lili mu uleele: "Monwaani bahala moli, nga mubaka na ikolo-mbungu! Nde wu, mbaahi bakaambi ba limandu na baatu banga masumu." 35 Ka baatu ba bubaadyata we buhuli tsiki a Nzambi, bu baamweese imbuli hya tsiki mo yiina.»

36 Mufarisi mumosi atsihi Yisu mu uya dya huli nde. Yisu akoti mu nzo Mufarisi, na atsahili ŋa metse. 37 Mu musyenge mowuna, hwaba na mukaasu mumosi wu imbembo. Nde ayaabi ti Yisu aba mu udya mu nzo Mufarisi. Nde abehi itutu hya alabati* hi hyaluula mu nyafi. 38 Na nde avyohi Humbisa a Yisu bebele a miilu mya nde, abaandihi ulila. Matsanga ma nde maabolisi miilu mya Yisu, na nde akombili myo mu naanga a nde. Nde abumbi miilu mya Yisu, na ayitili myo nyafi. 39 Mufarisi wu ateeli Yisu mu udya amono buuna, aleeli hutso mutima a nde: «Tso muutu mo wunuuwu beedi mumbihuli wa mbuli, kini nde kiyaba na li mukaasu wu mibembe nde, na mbiili a nde. Nde kiyaba ti mukaasu mo wunuuwu imbembo ali.»

40 Yisu afutili huli Mufarisi: «Simoni, me na dyaambu li uleele we.» Simoni afutili: «Eye Mulongisi, leele lo.» 41 Yisu ti: «Baatu boole baaba na mukanu a muutu mumosi. Watsomi aba asombo biteesi maakama mataanu (500) ma makuta*. Waboole aba asombo biteesi maku mataanu ma bakuta. 42 Ka bu baaveli na bakuta baa ufuta, musombisi asiidi bo kolo-kolo na anyahuli mukanu a bo. Mu ma we matsimi, na mu bo baboole nde hafula utondo?» 43 Simoni afutili: «Me tsimi, ni wu mukanu hafulala bunene.» Yisu afutili nde: «We miikese dyaambu bu hwafwana.»

44 Titswene Yisu akinguhi huli mukaasu, na aleeli huli Simoni: «We li mu umono mukaasu mo wunuuwu? Bu me koti mu nzo a we, we a vidi me mamba ma uswaha miilu mya me ve. Ka mukaasu mo wunuuwu swahi miilu mya me mu matsanga ma nde, na nde kombili myo mu naanga a nde. 45 We a buumbi me ve, ka nde, umata bu me anzakoto, nde a hakolo mu ubaaviva miilu mya me ve. 46 We a tsatsili me maadi hu yulu mutswe a me ve, ka nde puhili nyafi mu miilu mya me. 47 Ni mu buuna, me ndeeli ti nde miyaka linyahula li masumu ma nde ma malahi, mu tooni ati nde mweesi litondo li lilahi. Ka huli wu bali mu unyahula hole, ubamweese litondo la hole.»

48 Na Yisu aleeli huli mukaasu: «We miyaka linyahula li masumu ma we.» 49 Baatu ba baaba ŋa metse bu baayuhi maana, baakalelesene mu mitima mya bo: «Nde wu na! Wuli mu uyehele unyahula paa masumu?» 50 Ka Yisu aleeli huli mukaasu: «Imiinu hya we hi mifuuhasa we, yene mu hyenze.»