1 Mu taangu mo yiina, Kayisaali Angustu, pfumu a itaanzi hya Looma, apalisi mukele mu usa litangu la baatu mu toto yoosi ya Looma. 2 Litangu mo liina aba ni latsomi, li laatswihi mu taangu yi Kirinyusi haba pfumu a itaanzi hya Siriya. 3 Mabuli moosi maakayene hu usonehe manduhi ma bo, muutu-muutu hu bula bwa nde. 4 Yosefi kaka ayeni hu musyenge a Nazareti hu tsi a Ngalili. Nde ayeni hu musyenge a Betelemi hu tsi a Yuda. Nde hasiidi buuna, mu tooni ati nde aba muutu a bula mo buuna, na musi ibaandu hi mutumi Davidi. 5 Nde ayasonehe nduhi buna a Mariya mutangula a nde. Mariya aba na yimi.

6 Bu bo baaba huuna, taangu a Mariya yi ubuta yatoodi. 7 Nde abuti mwaana a nde watsomi wa bahala. Nde apoti nde tsanda na alaasi nde mu idiili hi biboodi, mu tooni a bu baavelibaha itini mu nzo a byenyi.

Konge yinene yi bapofi 8 Mu tsi mo yiina kaka, hwaba na bakeelisi ba biboodi ba baakakiilala mu bwadi, mu ubaakeelese biboodi bya bo. 9 Buuna, pofi a Pfumu ayamonehele ŋa busu bwa bo, na muyusu a Pfumu ayadiinga bo mu liyalala. Bo baabahi boomo bu bulahi. 10 Ka pofi aleeli bo: «A liba na boomo ve, ka me miinza mu uyabisa benu Musamu wu Mubwe wa kinya yindahi mu baatu boosi: 11 Loloyi, hu bula bwa Davidi, bamiibutala benu Muyobili, ni nde Kristo, wu uli Pfumu. 12 Ka monwaani iliimbu hi baaviidi benu: Benu sa lisoolo mwaana ikenyi wu baapoto tsanda, baalaasa mu idiili hi biboodi.»

13 Na mu mawasa, konge yinene yi bapofi ba hu yulu, baapfutini na pofi mowuna. Baakayusa Nzambi na baakaleele:

14 «Muyusu huli Nzambi hu hati mayulu,

na hyenze ŋa toto huli baatu ba nde hatondo.»

15 Bu bapofi baatahuhi na bo mu ufutaha hu yulu, bakeelisi babiboodi baalelisini: «Ni tswendaani natee hu Betelemi na limonwaani ma maamiibwa, we ma Pfumu hayabisa bisu a benu.» 16 Bo baayeni huuna mu mawasa, na baamoni Mariya, Yosefi na imwa-mwana baaba baalasa hutso idiili hi biboodi. 17 Bu baamoni imwa-mwana, bo baayabisi ma baleeli bo mu imwa-mwana mo hinihi. 18 Baatu bu baayuhi ma bakeelisi babiboodi baakaleele, bo baakimuhi. 19 Mariya akayibwala moonyi mu maana moosi, na akatsima mo hutso mutima a nde.

20 Bakeelisi babiboodi baafutihi mu ubaayusa na ubaakiinza Nzambi mu moosi ma bo baayuhi na baamoni, we bu pofi hayabisi bo.

21 Bu mwaana hakuhasi bilumbu pombo, baaketi nde, na baaluhi nde nduhi Yisu, we bu pofi haateeli nde, tswamina ngu a nde abaha yimi.

22 Bu ilumbu hya tsyemili hyatoodi, Yosefi na Mariya baayeni hu Yeruselemi. Bo baayamweese Yisu ŋa busu bwa Pfumu, we bu huli mukele a Moose. 23 Ni we bu baasonehe mu mukele a Pfumu: «Pasi mwaana watsomi wa bahala, nde li wa ngidi ŋa busu bwa Pfumu✝.» 24 Titswene, bo baayava bungodu bu makunda moole, buuve mabembe moole, we bu mukele a Pfumu ubaatuma.

25 Hu musyenge a Yeruselemi hwaba na muutu mumosi, nduhi a nde Simeyoni. Nde aba wu asungama na nga likiinzu ŋa busu bwa Nzambi. Nde akakeele muutu wu Nzambi hafwana utsindaha mu uyobolo bisu Isereli, na Livupu la Nzambi laaba ŋa yulu a nde. 26 Lo laayabisi nde ti tswamina nde mu ukwa, nde afwana umamono Kristo wu Pfumu hutsindaha.

27 Livupu la Ngidi laabiti Simeyoni hu litandala la nzo a Nzambi. Na babuti ba Yisu, baabiti nde mu ukuhasa ma bafwana usa mu nde, we bu huli mukele. 28 Simeyoni avoli mwaana mu myoho mya nde, afutili matondo huli Nzambi:

29 «Bunuubu, Pfumu, ni nyaha musalili a we ayene mu hyenze, we bu huli nzuhisini la we.

30 Ka miisu ma me ma miimono liyobolo la we,

31 li we avangimasa ŋa busu bwa baatu boosi.

32 Liyalala mu uyalusa matsi,

na muyusu ibaandu hya we, Isereli✝.»

33 Mambu ma Simeyoni hakaleele, maakimusi taata na ngu a Yisu. 34 Simeyoni asyemi bo na aleeli Mariya ngu a Yisu: «Mwana mo wunuwu miiya mu ubwisa na mu utelemese ba banzuhisini mu Isereli. Nde uba iliimbu hya Nzambi, ka baatu bu unyanza nde. 35 Matsimi ma mitima mi milahi mu uyabaana. Na we mo, mutima a we umono pasi we muutu wu sabila amiikotelele.»

36 Ŋa litandala la nzo a Nzambi, hwaba kaka na mumbihuli mumosi wu mukaasu, nduhi a nde Ana. Nde aba mwaana a Fanweli, wa buli la Azeri. Nde aba amiinuna. Nde avyosi bilima tsambu na mulumi a nde. 37 Ŋa mbisa ŋana, nde asaali bukwili. Nde atoosi maku pombo na bilima bina (84). Ana a hakatahuha na nzo a Nzambi ve, na nde akasalila Nzambi butsuhu na nyangu, na udya ikaandi mu usambila. 38 Bo baayato bikuma mu ngunga yi Simeyoni hamani uyambila, nde kaka ayusi Nzambi na ayambili mu Yisu, huli boosi ba baakakeele liyobolo la Yeruselemi.

39 Bu Yosefi na Mariya baamani ukuhasa moosi, we bu huli mukele a Pfumu, bo baafutihi hu Nazareti musyenge a bo, hu tsi a Ngalili. 40 Mwana akakula na akahwada. Nde aba aluula mu nzaabili, na hyese hya Nzambi hyaba na nde.

41 Pasi ilima, babuti ba Yisu baakayene hu musyenge a Yeruselemi hu mukungi a Paake. 42 Bu Yisu hakuhisi kuumi bilima byole, bo baakumi hu mukungi we bu huli ipfu hya bo. 43 Bu mukungi hafwidi, bo baakafutaha. Ka Yisu asaali hu Yeruselemi, hwavele ngu a nde na taata a nde uyaba. 44 Bo baakatsima ti nde aba na bakaanga ba nde mu nzila. Bo baasiidi muyilala mumosi mu nzila mu ubaasaha nde ŋa hati li ikuta na bambaahi ba bo. 45 Bu baavelimono nde, bo baafutihi hu Yeruselemi na ubaasaha nde.

46 Ni humbisa bilumbu bitatu, bo baayasoolo nde hu litandala la nzo a Nzambi. Huuna, nde aba atsahala ŋa hati li milongisi, mu ubaayuha bo na ubaava bo byuhu. 47 Boosi ba baakayuha nde baakakimuha mu buyedi bwa nde na bu nde hakafutala byuhu. 48 Bu babuti ba nde baasooli nde, bo baakimuhi. Na ngu a nde aleeli nde: «Mwana a me, mu hima we vaangi la pila yiina huli bisu? Mono, bisu a taata a we lili mu usaha we na boomo.»

49 Yisu afutili bo: «Mu hima benu lili mu usaha me? Benu liyaabi ti me apfwana ubaaba mu nzo a Taata a me.» 50 Ka bo a baatsikihi ma Yisu hakaleele bo ve. 51 Titswene nde afutihi na bo hu Nazareti na nde akayuhala bo bubwe. Ka ngu a nde akakeelese misamu myosi hutso mutima a nde. 52 Na Yisu akakula mu nzaabili na mu mutele. Nde akamweese kinya huli Nzambi na huli baatu.