1 Yisu asuuli miisu, nde amoni bisina bi byakasuusa bungodu bwa bo mu itunga hi bungodu hi hyaba hutso a nzo a Nzambi. 2 Nde amoni ka mukaasu, mukwili wu iyaha wu ayasuusa mwa bakuta boole. 3 Na nde aleeli: «Mu mbuli, me ndeele benu, mukwili wu iyaha mo wunuuwu vidi hwaluta bana boosi. 4 Ka baatu mobaniba boosi, baayasuusa tsyetsyengu busina bwa bo. Mukwili mo wunuuwu hutso buyaha bwa nde, suusi byosi bi nde abeedi na byo mu uba moonyi.»

5 Kabu la baatu laakatoyo mu tooni a nzo a Nzambi. Bo baamoni bubwe bwa yo, bu baaba bayolo yo mu mamanya ma talu na bisiha bi baakava bungodu huli Nzambi. Ka Yisu aleeli:

6 «Hubusu, bi benu lili mu umono bi, a husaala tso manya limosi ŋa yulu a manya ve. Byosi sa batsala.»

7 Bo baafuuli nde: «Mulongisi, ki taangu mambu mo maniima mu utswiha na ki iliimbu humweese bisu ti mambu mo maniima mu utswiha?» 8 Yisu afutili bo: «Kebaani, muutu a hapfuta benu ve. Mu tooni ati ba banzuhisini bu uya mu nduhi a me, na ubaaleele: "Ni me Masiya!" – Na "Tangu yamito." Ka a liduuka bo ve. 9 Ŋa benu luyuha tsangu midiingu na miyungu, a liba na boomo ve, mu tooni ati misamu mo miina myafwana umavangama. Ka yina kini a ni tsukusu a tsi ve.» 10 Na Yisu abweleele: «Baatu ba tsi mosi sa balwanisa baatu ba tsi kima, na baatu ba ipfumu imosi sa balwanisa baatu ba ipfumu ikima. 11 Toto sa yinyingama mu mifudi, na mu bitaanzi bi bilahi, sa uba na limbunga na mabeedu ma tsisu. Sa huba ka na misamu mya tsisu, na biliimbu bi binene bi umonehele hu yulu.

12 Ka tswamina mambu mo maana mavangama, sa bakaanga benu, sa batsuta benu. Sa bayeholo benu hu tsundusu mu manzo ma lisambulu ma Bayudaayo. Sa babwaha benu mu kondaayi. Sa babita benu ŋa busu bu bapfumu na lituma la tsi mu tooni a nduhi a me. 13 Sa huba huli benu nzila yi uta imbangi mu nduhi a me. 14 Yaabaani li: benu a lu utehele uvangimasa ma benu lu uleele mu ukalila nyutu a benu ve, tso ki mambu benu luupalisa ve. 15 Me mwakulu upa benu mambu na tsiki mana muutu tso mumosi ŋa hati li bambeene ba benu, avelesa paha na uleele ti benu na mapfuta. 16 Bataata na bangu ba benu, baana ba ngu ba benu, baakedi ba benu, ikuta na bambaahi ba benu, buusuumbasa benu, na buuduba ba balahi mu benu. 17 Baatu boosi sa babelele benu mu tooni a me. 18 Ka tso linanga limosi li mutswe a benu a luudimbala ve. 19 Hwadaani! Ni mu mukami a benu, benu luyobolo moonyi a benu.»

20 «Ŋa benu luumono mabundu ma balwani ma midiinga musyenge a Yeruselemi, benu sa liyaba mu taangu mo yiina, ti utsala hwa yo huka bebele. 21 Buuna, baa bu uba hu itaanzi hya Yuda, nyaha bo babata hu yulu bisyelo. Boosi ba bu uba hutso musyenge a Yeruselemi nyaha bo bapala na batahuha hu lala. Boosi ba bu uba mu mala, nyaha bavelekoto mu musyenge. 22 Bilumbu mo biina sa biba bilumbu bi Nzambi husyembe bisu Yeruselemi. Moosi Mabasonehe ma Ngidi sa matswiha. 23 Ni lingebe huli bakaasu banga mayimi, buuve banga a baana ŋa beelo mu taangu mo yiina. Mu tooni ati, baatu ba tsi sa bakoto hutso lingebe, na kesi a Nzambi sa yibwa ŋa yulu a baatu mobana. 24 Sa baduba bo mu basabila, buuve sa babita bo hu buviha mu matsi moosi. Mabuli ma matsi makima sa mayabyalila Yeruselemi, natee bu taangu tumili a mo yi usuka.

25 Sa huba na biliimbu bya kimuhili hutso a taangu, hutso a tsuungi na hutso bamvwelele. Mabuli ma matsi makima sa maaba hutso a tsisu na munyongo, mu tooni a kele a nyamba yi yili mu umata hu tsyelo mibu. 26 Ba banzuhisini sa bakoto mu ikolili mu tooni a ma muubwa ŋa toto yoosi, mu tooni matwala ma mu nyingama hu mayulu. 27 Humbisa, sa bamono Mwana a muutu mu uya hutso mayidu na matwala na muyusu a nde woosi. 28 Na bu misamu mo minimi myubaandiha uvangama, hwadaani mu teele na suulaani mutswe, mu tooni ati liyobolo la benu lika bebele.»

29 Nde abweta bo sahu mo linili: «Monwaani muti a fiinge, tso pasi muti. 30 Bu benu luumono ti miti mika mu ufula makaya, benu limiyaba ti taangu yimbwe yika mu uya. 31 Ni bumosi ka, bu benu luumono bisiha mo biina mu uya, yaabaani ti Ipfumu hi mayulu hika bebele. 32 Me ndeele benu mu mbuli, tungi la baatu mo linili a bukwa boosi ve, na mamoosi sa matswiha. 33 Yulu na toto sa bidimbala, ka mambu ma me a mundimbala ve.»

34 «Liba likanda! A lilemese mivumu mya benu mu mikungi ve, mu udya, mu ukolo malamu na mu tooni minyongo mu mya idiingu mohi ve. Tso likuhisi maana, ilumbu mo hina sa hipadumasa benu, 35 we mweto. Mu tooni ati hyo sa hibwa ŋa yulu a baatu ba ŋa toto yoosi. 36 A libwamina matolo ve, sambilaani taangu yoosi. Lisa buuna mana benu libaha mifudi mu upala mutso a moosi mamali mu uya, na uyamonehele mu tele ŋa busu bwa Mwana a muutu.»

37 Bilumbu byosi ŋa nyangu, Yisu akalongese mu nzo a Nzambi. Butsuhu nde akayene hu isyelo hya Olive hu nde hakabaaba butsuhu boosi. 38 Na baatu boosi, ŋa hati a ngwali, baakayene hu litandala la nzo a Nzambi mu uya duukala ndongisili a nde.