1 Mu ilumbu imosi hya saba, Yisu akataangila matsyehe ma masangu*. Bayihi ba nde baakakoolo mivoovo mi masaangu. Bu bo baakabuula na uhololo mo mu myoho mya bo, bo baakadya masangu. 2 Mwana a kabu li Bafarisi laaleeli bo: «Mu hima benu lili mu uvanga mi baaliha usa mu ilumbu hya saba?»

3 Yisu afutili bo: «Benu a lataanga ma mutumi Davidi hasiidi bu haba na nzala, nde na baatu ba nde ve? 4 Nde akoti mu nzo a Nzambi, avoli mapa ma baayeholo huli Nzambi, adidi mo na aviidi ka huli bambaahi ba nde. Mapa mo maana, muutu mukima a hali na muswa mu udya mo ve, ka ndulu bangaanga ba Nzambi.» 5 Yisu aleeli huli Bafarisi mo baana: «Mwana a muutu li Pfumu a saba.»

6 Ilumbu ikima hya saba, Yisu akoti mu nzo lisambulu yi Bayudaayo, na abwi mu uyihasa. Muuna, hwaba na bahala limosi li kaka la mbahala laaba lavolo. 7 Milongisi mi Mikele na Bafarisi baakatala Yisu mu umono, tso nde ubeeloso muutu mu ilumbu hya saba. Bo baakasa buna mu usaha buni bo bubahila nde tooni. 8 Ka Yisu aba ayaba matsimi ma bo. Nde ni uleele bahala li kaka la mbahala laaba lavolo: «Teleme, na baa ŋa, ŋa hati la baatu.» Bahala laatelimi na laaba ŋana. 9 Na Yisu aleeli bo: «Me ndi mu upfuula benu, huli na muswa mu ilumbu hya saba mu uvanga lilibwe buuve lilibi; mu ufuuhasa muvumu a muutu tso mu unyambasana nde?» 10 Yisu atali bo boosi, na aleeli huli bahala: «Laba kaka la we!» Nde ni usa buuna, na kaka la nde ni ubeeloho. 11 Ka milongisi mi mikele na Bafarisi baakwidi kesi, na ubaalelesene ma bukutala Yisu.

12 Mu taangu yina, Yisu avaati isyelo mu uyasambila, na asambili Nzambi butsuhu bwosi. 13 Bu busi bwakiidi, nde ateeli bayihi ba nde boosi na asooli kuumi na boole ŋa hati la bo, nde aviidi bo nduhi biluumbi. 14 Manduhi ma bo: Simoni wu nde haluhi Peetelo, Andele muhehe a Simoni, Yaki, Yowani, Filipo, Batolomayi, 15 Mataayi, Toma, Yaki mwaana a Alafe, Simoni nga kuumbu mu Zelote*, 16 Yude mwaana a Yaki, na Yuda Isikaryoti wu asumbisi Yisu.

17 Yisu bu hakakulamana isyelo na bayihi ba nde, nde atsikimi ŋa mbuha mosi yi idede ŋa hwaba konge yinene yi bayihi ba nde. Hwaba ka na baatu ba banzuhisini ba baamati hu itaanzi hyoosi hya Yuda, hu musyenge a Yeruselemi, na baa misyenge mya Tiilo na Sidoni mi myaba mu muvanga mubu. 18 Baatu mo baana baayidi mu uyuha nde, na mana nde abeeloso bo mu mabeedu ma bo. Baatu ba mavupu ma mabi maakakwamisa, baabeeluhi. 19 Baatu boosi baakasaha ubembe Yisu, mu tooni ati matwala mamosi maakapala mu nde na maakabeeloso bo boosi.

20 Yisu atali bayihi ba nde, na aleeli:

«Kinya huli benu biyaha,

ipfumu hi mayulu hili hya benu!

21 Kinya huli benu baa lili na nzala mu taangu yi,

ka benu sa liywata!

Kinya huli benu baa lili mu ulila taangu yi,

benu sa lisyebe!

22 Kinya homo huli benu tso baatu bali mu ubele benu, bali mu unyasula benu, bali mu utuha benu na ubaakusa benu, mu tooni a Mwana a muutu. 23 Mu ilumbu mo hina, baani mu kinya na mwesaani musaangu mu ukina, musyendo wu munene li mu ukeele benu hu yulu. Ni buuna bakaaha ba bo baakakwamisa mimbihuli.

24 Tsyembili huli benu bisina,

benu laamitswamina ukaanga mbombisili a benu!

25 Lingebe huli benu baa lamikuha mu byosi taangu yi,

benu sa libaha nzala!

Lingebe huli benu baa lili mu usyebe taangu yi,

benu sa liba mu bukwili na benu sa lilila!

26 Lingebe huli benu tso baatu boosi bali mu utoyo bubwe mu benu, ni bumosi ka bakaaha ba bo baakaleele mu mimbihuli mi mapfuta!»

27 Benu baa lili mu uyuha me, me ndeele benu bu: tondwaani baboho baa benu; baasaani lilibwe huli ba bali mu ubelele benu. 28 Syemaani ba bali mu usinga benu; sambilaani Nzambi mu ba bali mu ukwamisa benu. 29 Tso muutu teti we lipali mu tama la mbahala, bwetehele nde kaka tama lina. Muutu avolo iyunga hya we, a liha nde mu uvolo ka simiisi a we ve. 30 Pasi muutu wu uvondo we iloho, va nde hyo. Na tso muutu voli hya we, a kaamba nde hyo ve. 31 Ma benu litondi ti bakima bavangila benu, vaangaani bumosi ka huli bo.

32 Tso benu libaatondo ndulu baa bubaatondo benu, ki tsalu benu luubaha? Banga masumu ka babaatondo baa bubaatondo bo. 33 Na tso benu libavangila lilibwe ndulu huli baa bubaavangila benu lilibwe, ki tsalu benu luubaha? Banga masumu bomo ka bali mu usa buuna. 34 Na tso benu libasombese huli bo baana ba benu libaakeele ti bafutala benu, ki tsalu benu libaakeele? Banga masumu ka bubasombesene bomo na bomo, mana mumosi afutala wuna bi iteesi mo hina. 35 Ka baatondwaani baboho baa benu, baasiilaani bo ma mabwe, baasombesaani hwavele ubaakeele ti bafutala benu. Buna musyendo a benu sa aba wu munene. Benu sa liba baana ba Nzambi a Pungu, mu tooni ati nde li wu mubwe huli banga nyinga na banga bukanyi.

36 «Kwilaani lingebe we bu Taata a benu haluula mu kwili lingebe. 37 A litsundasa ve, mana Nzambi a hatsundasa benu ka. A lisyembe ve, baasaani bana kolo-kolo, mana Nzambi asa benu ka kolo-kolo. 38 Vaani, na Nzambi sa ava benu. Sa basyeholo hyetso hi hyafulala, hi hyakomo hutso bihode bya benu. Mu tooni ati Nzambi sa afutala benu hyetso hi benu libaava bambaahi.»

39 Yisu abweleele bo kuma moyi: «Bee inzimana utwala ubita inzimana na nde? Naana! Inzimana utwala ubita inzimana na nde ve; bo baboole sa babwa hutso iyuna. 40 Musalili a haluta pfumu a nde ve. Ka pasi musalili wu ayiha sa aba we pfumu a nde. 41 Mu hima we li mu umono isyesyele hi hili mutso a diisu la mwaana a ngu a we, hwavele utala kuunzi li lili mutso a diisu la we? 42 Buuve, buni we utwala uleele mwaana a ngu a we: "Nyaha me maasa isyesyele hi hili mutso a diisu la we!" Ka we mwakulu mutso a la we na kuunzi? We nga muwala, maatswamina umaasa kuunzi li lili mutso a diisu la we, titswene we mono bubwe mu umaasa isyesyele hi hili mutso a diisu la mwaana a ngu a we.

43 A huli na muti wu mubwe, wu ubaabuta mbutu yimbi ve. A huli na muti wu mubi, wu utwala ubuta mbutu yimbwe ve. 44 Mu tooni ati, pasi muti ubayabaana mu mbutu a nde. A bubaakoolo bafiinge mu yulu matsyende ve. Bumosi kaka, utwala ukoolo mbutu a vinye mutso miti mi ifundi ve. 45 Muutu wu mubwe ubamweese mavaanga ma mabwe ma mali hutso iswehili hi ibwe hi hili mu nde. Muutu wu mubi ubamweese mavaanga ma mabi ma mali hutso mutima a nde. Munywa a muutu ubapalisa mambu ma maluula hutso iswehili hi ibi hi hili mu nde.

46 Mu hima benu libaateele me: "Pfumu! Pfumu!" – Na benu a libaayuhala me ve? 47 Me tsa mweese benu naana muutu wu uya huli me hafwanina, wu ubaayuha mambu ma me na usalila mo. 48 Nde li mu ufwanina na muutu mumosi wu atunga nzo a nde. Muutu mowuna avahi hu hati a tsina natee hu manya, atelimisi yene* ŋa yulu a manya. Mu ilumbu hi nzali haluli, nyamba yayidi, mamba maayabwa mu nzo na mifudi. Ka nyamba a yatwali unyingasa nzo ve, mu tooni ati, baatungi yo bu hwafwana. 49 Ka muutu wu ubaayuha mambu ma me, hwavele usalila mo, nde afwanina na muutu wu atunga nzo hwavele utelemese yo ŋa yulu a manya. Mu ilumbu hi nzali haluuli, nyamba bu yabwidi mu nzo, mu mawasa, yo yabwidi, na "yatsamuhi tsaa".»