10 Ilumbu hya saba*, Yisu akalongese mutso a nzo lisambulu yi Bayudaayo. 11 Ka hwaba huuna mukaasu mumosi wu livupu lilibi lavidi ipiha umata bilima kuumi na poombo. Nde aba wabaandama, na a hakabwetwala unonoho ve. 12 Bu Yisu hamoni mukaasu mowuna, ateeli nde na aleeli: «Mukaasu, we miyoboho mu ipiha hya we.» 13 Yisu asuusala nde myoho, mawasa-mawasa, mukaasu anonihi na nde ayusi Nzambi.

14 Ka mukuutu mumosi a nzo lisambulu yi Bayudaayo abahi kesi bu Yisu habeelusi mubeedu mu ilumbu hya saba. Na nde aleeli huli konge a baatu: «Huli bilumbu bisamunu bi baafwana mu usala. Baayani hu ubuha nyutu mu bilumbu mo biina, ka a mu ilumbu hya saba ve!» 15 Pfumu afutili huli nde: «Benu banga muwala! Na mu benu, ilumbu hya saba, ubaakondo unyangula ngombe a nde, buuve buuru a nde mutso idiili hi biboodi, mu ubita nde hu uyanywisa nde mamba? 16 Ka mukaasu mo wunuuwu, wuli mwaana a Abrahami, wu Saatana haba hamihada umata bilima kuumi poombo, a hwafwana mu uyobolo nde mu ilumbu hya saba ve?»

17 Bu Yisu haleeli buuna, baboho ba nde boosi baamoni tsonyi, na konge a baatu yaba na kinya mu tooni a ma muyusu ma nde hakasa.