Sahu li ikanga-koome nga upfuta
1 Yisu atiidi sahu mo linili huli bayihi ba nde: «Isina imosi hyaba na ikanga-koome. Baayakese hyo ŋa busu bu isina ti nde ubaabiyasa busina bwa nde. 2 Isina ni uteele musalili a nde na uleele: "Ki mambu me ndi mu nzuha mu nduhi a we? Mweese me tsalili a we, mu tooni ati we a ubweba muswehi bisiha bya me ve." 3 Ikanga-koome atsimi hutso mutima a nde: "Pfumu a me ka mu umaasa me mu isalu. Me buni utsa? Me a ndi na mifudi mi myakuha musala tooto ve. Me tsamba na tsonyi mu usa musohi. 4 Me nzaabi bu me utsa! Me tsa paanga ma musa ti, Humbisa hu bamiimaasa me mu isalu, baatu ba baayaka me mu manzo ma bo."
5 Nde ni utsiha mumosi mumosi, mu boosi ba baaba baasombo isiha huli pfumu a nde. Nde aleeli huli watsomi: "We kwe asombo huli pfumu a me?" 6 Nde afutili: "Kama li mingungu mya maadi ma oliive." Ikanga-koome mo ni uleele nde: "Mono muhanda wa tsiingili mukanu, tsahala mawasa na sonehe maku mataanu." 7 Nde abweleele huli mukima: "Ka we, we kwe asombo?" Nde afutili: "Kama li basaahu baa mbutu." Musalili aleeli nde: "Volo muhanda wa tsiingili mukanu a we, sonehe maku poombo." 8 Pfumu asilisi ikanga-koome nga upfuta mu ma nde havangi na lisuunga. Mu tooni ati baatu ba tsi moyi buyedi bwa pangili a mambu, bele buyedi bwa baatu ba liyalala ve.»
9 Na Yisu abwebwese: «Na me, me ndeele benu, salilaani busina bu upfuta mu uvanga bumbaahi na baatu. Mana bu busina mo bufwa, bambaahi bayaka benu hutso manzo ma mu ukwilala bilima na bilima. 10 Muutu nga imbuli mu mwa bisiha bibikeehe, nde li ka na imbuli mu bisiha bibinene. Muutu nga upfuta mu bisiha bibikeehe, nde li ka na upfuta mu bisiha bibinene. 11 Ni mu buuna, tso benu a lili na imbuli mu busina bu upfuta ve, na uva benu busina bwa mbuli? 12 Na tso benu a lili na imbuli mu hi hyabaha mukima ve, na uva benu bi bili bya benu mo?
13 Musalili tso mumosi utwala usalila bapfumu boole ve. Nde sa abelele mumosi na utondo wuna. Buuve, nde sa akatita mu mumosi na urokolo wuna. Benu utwala usalila Nzambi na mbongo ve.»
Mty 11.12-13; 5.31-32; Mlk 10.11-12