Yisu bamiibelese mu lipfu
13 Pilaato akungi bakuutu ba bangaanga ba Nzambi, bakuutu ba Bayudaayo na baatu boosi. 14 Nde aleeli bo: «Benu limiibehele me muutu mo wunuuwu na uleele ti, nde li mu utsindahala baatu mu uvelesiingala lituma la tsi. Ka me mwakulu miipa nde byuhu, ŋa busu bwa benu, na me a hamono tooni mu nde, mu moosi ma benu lili mu ukese nde ve. 15 Eloode ka, a hamoni tooni mu nde ve. Nde miifutala bisu nde. Mu mbuli, muutu mo wunuuwu a hasa pasi dyaambu li nde hubaha kesili yi lipfu ve. 16 Ni mu buuna, me utuma batete nde bikooti, humbisa me unyahula nde.»
[ 17 23.17 Pilaato haleeli buuna, mu tooni ati pasi mukungi a Paake, nde akabanyahula kondaayi imosi.] 18 Bo baafulihi boosi mu itwadi: «Duba muutu mo wunuuwu, na nyahula bisu Barabasi!» 19 Barabasi baakotisi kondaayi mu tooni midingu mi myabwidi hutso musyenge, na bu nde hadubi muutu. 20 Pilaato abweleele huli konge a baatu, bu haba na tsimi yi unyahula Yisu. 21 Ka konge yoosi yafulihi: «Komene nde ŋa kuruwa! Komene nde ŋa kuruwa!» 22 Pilaato abweleele leele li matatu: «Ki dyaambu lilibi nde hasa? Me a hamono tooni yi bu uduba nde ve. Ni mu buuna, me utuma batete nde bikooti, humbisa, me unyahula nde.» 23 Ka bo baasinzifulaha mu mifudi, na ubaavondo ti bakomene Yisu ŋa kuruwa. Na ufulaha hwa bo hwabiingi. 24 Pilaato avoli kesili yi ukuhasa litondo la bo. 25 Nde anyahuli wuna wu bo baakavondo. Ni wu abeedi mu kondaayi mu tooni midingu mi myabwidi hutso musyenge, na bu nde hadubi muutu. Pilaato ayehuli bo Yisu mu usa litondo la bo.
Mty 27.31-44; Mlk 15.20-32; Yow 19.17-27