13 Ilumbu mo hina, bayihi boole baakayene hu bula bumosi nduhi Emawusi. Taha mu uto hu musyenge a Yeruselemi, mangunga moole mu dwe la miilu. 14 Bo baakalelesene mu misamu myosi mi myabwidi. 15 Bu bo baakalelesene na baakatsotso mambu mo, Yisu nde mwakulu ayidi bebele na bo na apfuuti nzila na bo. 16 Bo baakamono nde, ka Nzambi asi bo muyungu ti bo baveledihula nde. 17 Yisu afuuli bo: «Benu ki mambu lili mu utsotso mu nzila?» Bo baatsikimi na baamweesi lingebe la bo. 18 Mumosi mu bo, nga nduhi a Kelopasi, akaali nde: «Mu boosi ba bali mu Yeruselemi, ndulu ni we dimbili ma mamiivyoho bilumbu mobiinibi?» 19 Yisu ti: «Mo ka ki mo?» Bo baafutili nde: «Ma maabwa mu tooni a Yisu, musi Nazareti, nde beedi mumbihuli a Nzambi wu matwala. Nde amweese mo mu mavaanga na mu mambu ŋa busu bwa Nzambi na ŋa busu bwa baatu boosi. 20 Bakuutu ba bangaanga ba Nzambi na batumi ba bisu, baayehuli nde, batsundisi nde natee hu lipfu, na baakomini nde ŋa kuruwa. 21 Bisu likasa hiitu ti nde ni wu kiiyobolo Isereli. Ka ŋa yulu a maana moosi, loloyi ka bilumbu bitatu umata bu maana mosi maabwa. 22 Ŋa hati la bisu mwa bakaasu hakwe, bali mu uleele mya kimuhili. Ni mbuli: bo baayeni hu ngila a nde ŋa hati a ngwali, 23 ka bo a baamoni mvumbi a nde ve. Bo baayafutaha, baayayabisa bisu ma bo baamoni mu imono-miisu. Mu imono-miisu mo, bapofi baayabisi bo, ti nde moonyi ali. 24 Bakima ŋa hati la bisu, baayeni hu ngila. Bo baamoni mambu moosi we bu bakaasu baayabisi. Ka uto ti Yisu, bo a baamoni nde ve.»

25 Buuna Yisu aleeli bo: «Baatu ba baavele buyedi, na banga matsika mu usa imiinu mu moosi ma mimbihuli mya Nzambi myayabisi! 26 Beedi hwafwana ti Kristo a maamono pasi, tswamina Nzambi ayusa nde?»

27 Na nde abinduli bo mambu moosi ma baasonehe mu nde mu Muhanda a Ngidi woosi, umata mu mabuuku ma Moose natee mu mabuuku moosi ma mimbihuli. 28 Bu bo baatoodi bebele na bula bu bo baakayene, Yisu asiidi we wu uvyoho bula mo buuna. 29 Ka bo baayayiini nde na uleele: «Ba na bisu, mu tooni ati, ilumbu hi mikulamana na butsuhu bwaka bebele.» Nde akoti mu uba na bo. 30 Nde atsahili ŋa metse na bo, nde avoli lipa, asambili na asyemi lo. Titswene nde abukili lo na aviidi bo lo. 31 Buuna, miisu ma bo maadibumi na bo baadihuli Yisu. Ka nde adimbili ŋa busu bwa bo. 32 Na bo baalelisini: «Bisu laamono kinya we mbaahu hutso mitima mya bisu, ŋa nde akayambilanga na bisu mu nzila yoosi. Bisu laamono ka kinya ŋa nde akabindulanga bisu Mabasonehe ma Ngidi.»

33 Bayihi baboole baa, baatelimi mawasa-mawasa, baafutihi hu Yeruselemi. Na bo baayabiisa biluumbi kuumi na imosi bi byaba byakuukama na bakima. 34 Bayihi baboole, baaleeli bo: «Ni mbuli! Pfumu amiisuuha ŋa hati la babaakwa. Ni mbuli! Nde miyamonehele huli Simoni.» 35 Bo mwakulu baaviidi ikuumbu mu ma bo baamoni mu nzila, na buni bo baadihuli Yisu mu taangu a kabili lipa.✝