Yowani Mutondihi akalongese baatu hutso a kumu a nzala
1 Hwaba ilima hya kuumi na bitaanu, hi Kayisaali Tiberiyu haba mutumi matsi moosi ma Looma. Ponse Pilaato aba mutumi a tsi a Yuda, mu ilima mo hiina. Eloode aba pfumu itaanzi hya Ngalili, na mwaana a ngu a nde Filipo, pfumu itaanzi hya Iturya na Takonita. Lisanyasi aba pfumu itaanzi hya Abilena. 2 Ane na Kayifa baaba bakuutu ba bangaanga ba Nzambi. Mu taangu mo yiina, Yowani mwaana a Zakariya aba mutso a kumu a nzala. Nzambi ayabisi nde mambu ma nde. 3 Ni mu buuna, Yowani hataangili itaanzi hyoosi hya Yolodani, nde akata ibila: «Sobwaani mbiili, Yakaani tondihili mana Nzambi anyahula masumu ma benu.»
4 Ni we bu baasonehe mu muhanda a mumbihuli Esaya:
«Yiniiyi ni ndaha a muutu wuuna wu li mu uta ibila mu kumu a nzala:
"Vangimasaani nzila a Pfumu,
suungahaani misoho mya nde! 5 Kisalaani mitsundu myosi,
syengaani bisyelo na bitukidi bikituha bidede.
Suungahaani manzila ma maatengeme,
na syengaani misoho mi milahi mi mabaku.
6 Buuna baatu boosi bu umono liyobolo la Nzambi3.6 Esa 40.3-5."»
7 Konge a baatu yayidi huli Yowani, mana nde atondehe bo. Nde akaleele huli bo: « Benu ibaandu hi bapili, na alongese benu mu ubata kesi a Nzambi? 8 Ni mu buuna, butaani mbutu yi yukaata imbangi ti benu limisobo mbiili a benu. Na a lilelesene mu mitima mya benu ve ti: "Bisu lili na taata a bisu Abrahami." Ka me ndeele benu ti, mamanya mo maniima, Nzambi utwala ukitusa mo baana ba Abrahami. 9 Pa pibi bamiivangimasa mu ukwanga muti mu manganzi. Ni mu buuna, pasi muti wu uvelebuta mbutu yimbwe, bu ukwanga nde na ubwaha nde hu mbaahu.»
10 Konge a baatu yakafuula nde: «Bisu hima lafwana usa?» 11 Nde afutili bo: «Nyaha muutu wu uli na biyunga byole, akaba imosi huli wu avele na hyo. Na wu uli na byudya, akabila bana.»
12 Hwayidi kaka bakuukihi ba limandu, mana batondehe bo, na bo baafuuli Yowani: «Mulongisi, bisu hima lafwana usa?» 13 Nde aleeli bo: «A linono bibyafulala ŋa yulu a bi baava benu muswa ve.» 14 Masadaadu kaka maayafuula nde: «Ka bisu kaka, hima lafwana usa?» Nde aleeli bo: «A lipatula mbongo a muutu ve, a lileele dyaambu li upfuta mu muutu ve, ka baatalaani ndulu pfuta a benu.»
Yowani Mutondihi ayabisi wuna wu uli mu uya
Mty 3.11-12; Mlk 1.7-8; Yow 1.24-28
15 Baatu bu baaba mu ukeele na hiitu hyoosi, boosi baakafulasana byuhu bo mwakulu hutso mitima mya bo, tso Yowani ni Masiya. 16 Yowani afutili huli boosi: «Me, me ndi mu utondehe benu mu mamba. Ka, wu uli mu uya, afulala me matwala, na me a handi tso wu akuha mu uba muviha, mu unyangula midi mi bikodi bya miilu mya nde ve. Nde wuuna utondehe benu mu Livupu la Ngidi na mu mbaahu. 17 Nde li na iyengese hya nde ŋa hoho, mu ukahula mbutu na biimbu. Nde ukukaha muhunu hutso iswehili hya nde, ka nde utsuha biimbu hu mbaahu yi yuuveledima.»
18 Yowani akayabisa Musamu wu Mubwe huli konge, na uva bo kwadisili kima yindahi.