9 Hu mbisa a tsuuhili a nde ŋa ngwali yi ilumbu hi limiingu, Yisu ateehili umonehele huli Mariya musi Magadala, wu nde haabingisi matengo tsambu16.9 Yow 20.14,16; Luk 8.2 . 10 Nde ayayabisa huli ba baabeedi na Yisu. Bo baaba mu bukwili na baakalila. 11 Ka bu bo baayuhi mukaasu mu uleele ti Yisu moonyi ali, na ti nde miimono nde, bo a baasiidi mukaasu imiinu ve.
12 Titswene, Yisu amonihili mu ifwaani ikima huli bayihi boole, ba baaba mu nzila mu uyene hu bula bumosi16.12 Luk 24.13 . 13 Bo baayafutaha mu uyabisa huli bayihi bana, ka a baasiidi imiinu mu bo kaka ve.
14 Hu tsyelele, Yisu amonihili huli bayihi bakuumi na mumosi, mu taangu yi baaba ŋa meetse. Nde asyembi bo na mifudi mu pelili a bo imiinu na mu bunono bu mitima mya bo, mu tooni ati, bo a baasiidi imiinu huli ba baayabisi bo ti Yisu moonyi ali ve16.14 Luk 24.36; Yow 20.19; 1Ko 15.5 . 15 Titswene, nde aleeli bo: «Yenaani mu tsi yoosi, mu uyayabisa Musamu wu Mubwe huli bivaangu bya Nzambi byosi. 16 Pasi muutu wu usa imiinu na wu buutondehe, sa ayoboho. Ka muutu wu uvelesa imiinu sa babelese. 17 Monwaani biliimbu bya kimuhili bi byukaaba na ba buusa imiinu: mu nduhi a me, bo buubingasa matengo, bo buuyambila mandaha ma manyatihi; 18 bo buukaanga bataadi, na tso bo banywidi isiha hi hyutwala ubita bo hu lipfu, hyo a hyumweese bo pasi ve. Bo buusuusala babeedu myoho, na babeedu buubeeloho.»
19 Hu mbisa uleele bo buuna, Pfumu Yisu baabiti hu yulu, na atsahili ŋa mbahala a Nzambi. 20 Na bayihi baayeni mu uyayabisa Musamu wu Mubwe matsyelo moosi. Pfumu akasala na bo, na akasilasa imbuli hya mambu ma bo baakayabisa, mu biliimbu bya kimuhili bi bo baakasa.]