1 Yesa o nani, Yesu e raga ringichaga na tonge to Galili, e yado e ringichiya bando o tonge to Yahuda ba, zwam Yahudawa a kudage a hone ek. 2 Begenje be bukoki be Yahudawa henda be nya kore. 3 pa ahuwa a Yesu ange na eb, mashinge pani nai o kore tonge to Yahudiya, aswabo a bune nebe ma a hya enk a iyahyani a gab on shi. 4 Ai, aza bone bwashi enk swenya shi bukudage a daki enk a boba, shi bo on iri enk ani, to, se oma chibane wo ato duniya a bu daki>> 5 Zwam ko ahuwa Yesu ma a yado na eb ba.

6 Pa Yesu chen yek, gagu numi o shiu ba katomo, ama gahi ko hwane gagu nuhi ne. 7 Oza dama ato duniya o mai wunje, ama gyam ab on wonje, zwam na zwama enk ato duniya ashi a mugu. 8 Gahi de e kore begenje bini. Gyamwa koro yanzu ba, zwam gagu numi ushiu ba katomo.>> 9 Na Yesu e zwama yek nani, pa eb e zhikitagi na tonge to Galili.

10 Na shihuwa she Yesu a karige begenje beni henda, pa Yesu e kore, swenya, ama ba sabchiya ba. 11 Ato tuwaga a Yahudawa ab ke yingyaga ek wo begenje bini a be zwammagaa, << Yesu e yo pa?>> 12 Udubu uni oraga shaga tage o Yesu swenya, ato mai a be zwammagaa, << Yesu ishi bot bura̱.>> Ato mai henda a be zwammagaa, << A'a, ai, Yesu e raga pwatumaga ato.>> 13 Ama aza bone bo shiu taaje o Yesu sabchiya zwam ryansa re a tuwaga a Yahudawa.

14 Ab na so begenje ba un pa Yesu e esh rihuga re menga e be chibaga. 15 Yahudawa ashi iyahyani a irini, ab ange << Inga ta bot bote buzhe eherangago nani, hingyana henda, etabo koya ba?>>.

16 Pa Yesu nyange naba, << E chibagano nimi e shere wo bone bona tuma. 17 Kuchi bone bo kudage bushi ene e onhon o kudage bwa daku ne zwama ene e gyam on chibaga e sher bando onhon ko henda na on chibaga na mahonre na mami. 18 Kuchi bone bo on, chibaga na mahonre ma bob, bukudage bo hi e dan edanduwa e reto rebob wo ato. Ama bone bo on gembo e dan edanduwa e bone bo tuma boik, bushi bot bo mahinda, aza henda nagu o mahinda wo boba. 19 Ba Musa o me pa esapo e Onhon ba? kuchi nanani aza bot bone bo on getaga aika bando nuhi. zwam nya gahi on gembo o kana hono?>>.

20 Udubu owato o chane Yesu, << Bo yo na upher shir, ga bwa bo hono gab?>> 21 Yesu e chane udubu owato nyange, << Nashiu iyahyani ink, pa gahishi iyahyani. 22 Musa owange na gahi e shagi awo nahi kachiya, kona obushi o Musa ba tun na shikaka nashihi oyo nani, nani gahi shagi awo nahi a tware kachiya taba na oho mugeta mo tandare. 23 Shi a shagiu bwa bo tware kachiya oho mugeta mo tandare zwam a ta hada hadoba a Musa, zwam nya gahi on hoge so shir na gyam zwam na rumugiu bot bote kuchi oho mugeta mo tandare? 24 Eta shera hadoba na e hya e risha ama na mahinda>>.

25 Pa ato ink na urushalema ange, << Ashe, ba bot buni bushi bot bo ato tuwaga a Yahudawa a on yingyaga a hone boik ba? 26 Hingyana! Eragash taaje sabchiya, a zwamo na Yesu konyaba! Owashi henda ato tuwaga a Yahudawa a dagi nezwama bot bone bushi Botʻbwakimga? 27 Bot buni kam, tudaki bando bob bo sher, ama gagu o Botʻbwakimga bo mahinda bwa koro, aza bone bwa daku wo bob bo shere ba.>>.

28 Ta Yesu e zwam na rihuga re menga, e dande begwabo nyange, << Ena daki gyam, e daki henda wo gyam yo? Na kurwa na mahonre na mami ba. Buchi bone bo natuma henda bushi bot bwa yajiya. E daki boik ba, 29 Ama gyam daki boik, zwam na sher bando bob, bob ne henda bone bo na tuma.>>.

30 Na Yesu e hwagi zwammagaa iri ni, pa ato tuwaga a Yahudawa a kudage a huma Yesu, ama aza bone bo da̱ru ek ko bukombe ek ba, zwam gagu o eb ushiu ba katomo. 31 Ama kuchi nanani bando udubu uni azhe ato dinya ana a tane so na Yesu, a be zwammagaa, << Gagu Botʻbwakimga bwa kore, bwashi iyahyani hyange na bot buni?>>.

32 Na parisiyaw a hoge udubu owato a be shi kamawungura zwam Yesu nani, pa ato tuwaga a Pristochi na Parisiyawa a tuma hadogari a huma Yesu. 33 Pa Yesu nyange naba, << Gagu chimu o sa yo gatu na gahi, katomo e maringe bando bone bo na tuma. 34 Nyema yingyaga, ama nyana hyaba, zwa e pwa koro wo gyam yo ba.>> 35 Pa a tuwaga a Yahudawa ama zwama,<<Pa eb nya kore wo gatwa pwa hi ek ba? Yesu nya kore pa tonge to Hiliniyawa pane pa ato nati Yahudawa a be chibaga yek? 36 Nya Yesu e on ne zwamo ene <Nya o mungewa namumi ama nyana hyanaka ba, pa gyam yo henda e pwa kore ba?

37 Ab namani, oho o akundaga o Begenje, wato, oho a tuwaga o beganje, pa Yesu e mashinge yesane, e dande begwabo dinya nyamge,<<Kuchi bone bo on hoge tu'oware to mani bo kore bo su. 38 Kuchi bone bo tane so na gyam, ta nasi owange,<Bando Yesu ne hajaba a mani ma muhondo ma shiryage.>> 39 Yesu e zwame nani bando uhunchi, one o ana atane so bando e a cheu, zwam har nare a pano uhunchi ba katomo zwam a pa Yesu eshindu e dan edanduwa eb ba katomo.

40 Ato yink Taaba hoge taaje uni bando udubu pa ab ange, <<Tamahinda bone buashi butuma bote bo Onhon!>> 41 Ato mai henda ange, <<Bone bushi Botʻbwakimga!>>.

Ama ato mai henda ange, << Botʻbwakimga bwa kore wari na tonge to Galili! 42 Ba Nasi owange Botʻbwakimga bushi ibenchi e Dauda ba, shi'undu she Dauda o shani>> 43 Pa kama undagaga o mashinge bando ato na reto re Yesu. 44 Ato yinka a kudago a huma Yesu, ama aza bone bo da̱ru ek.

45 Na ato e gitago a maringe wo ato tuwaga a pristochi na pariyawa pa yeka kaba ato e getago ane ab tuma, nezwama,<<Zwamanya gahi koro na Yesu ba?>> 46 Pa ato e getago a chane ange,<<Aza bone bo pwashi taaje ta bot buriya!>> 47 Pa ato tuwaga apristochi na pasiyawa ange,<<Ap, eme wariyasumu gahi kumba? 48 Ashe, azhe bot bando a tuwaga ko pariyawa bone bo tano so na Yesu? 49 Ama udubu uni o dakiwa̱ hadoba a musa, ai, yeka yo na yinu yo wo Onhon!>> 50 Nikodimu henda ene e yo taba na Yesu eyo na so waba henda, nyange naba, 51 <<Ashe, hadoba nati a raga paraga buto tun a hogo na yinu bob ba, a daku henda ene bob bushi ba?>>.

52 Pa parisiyawa na a tuwaga a chane Nikodamu nezwama, <<Gab ma bushi Bagalile, hirangya shitak she Onhon bwahya̱ nezwama aza butuma bumaya bone bwa shire na Galili.>>.

53 Pa koga bo maringe yaba bob.