1 Yesu bā áwátu’a idezepyɛ̀ ndɛ̀ ma yí’wa gbā wàká nidi wàbɛbɛ mazyi wa dàgba sásá wútòtò wa wándó wàfá vyā yɔ̀ lá.

2 Àzyì wánù idezepyɛ̀ hwoila gbaa hwoi nì: ándó wàkɛ́pyɛ̀, yi Siman (waa wa bá’u la, Bitrus) wa ngoyī’a Andrawus, Yakubu yi ngo wu Zebedi, wa ngoyī’a Yohana, 3 Filip wa Batolomi, wa Tomas, wa Matu hwoi wándó pà gba, wa Yakubu ngo wu Alfaus, wa Taddaeus; 4 wa Siman Ndó wàshó gá’a, wa Judas ndó wàlò Yesu kpáti lá. 5 Apanku idezepyɛ̀ hwoila Yesu gbò’wa chɔ̀ ma bwà’wa vo lá, <<Ni káwa kà fu panku wàhwoi Áwáyahuda yɔ̀ lá, ni káwa kà fu gá zukponu àwu Samariya yɔ̀. 6 Ni ya bé dɛ̀ àwu Áwáisrela wàhwo mìzyɛ̀ lá. 7 Ni ya mazyi ni dádɔ̀ zyí Shidɔ yí’wa la, <Achɔ̀ wàyii dɔ lá lò be bà’izɔ ló.> 8 Ni lò wándó wàfá vyā yɔ̀ lá dàgba, ni yí wándó wàhuuhu wá dàdɔ, wándó wà bā wútòtò gàhwɔ̄ dì, ni lò’wa dì tō, ni ká zyɔ̀ zumyɛ. Nùchɔ̀ waa ni dò ní, nùchɔ̀ waa ni kà hwoi yí ní. 9 Ni káwa pà shɔ́wànyànyà kwɛɛ shɔ́wàmòmbò kwɛɛ shɔ́dìmwú ni lò dó dì’ni yɔ̀; 10 ni káwa ya kyu lá wa ndú yɔ̀, kwɛɛ wúkɛ̀ ipyɛ̀ yɔ̀, mazyi ni pi ya wa tābá kwɛɛ kutɛ̀ yɔ̀; dizyi ápà wàyi sá kolo lá, yi dāhwɛ wúzyī wa be wàná ní yii bé wándó waa u yi sá’wa kolo lá yɔ̀. 11 Sásá gáwàshuwɔ̀ kwɛɛ gáwàti waa ni ma kàni ní, ni hwāzú panku wàbā byɛ̀ mazyi ni shí wa’u gbógbó bà nyunu waa ni kà hwoi me beli ní lá. 12 Nyunu waa ni ma hwoi kà ndō ní, ni zɛ̀ la, <Anwúkwòli ú shí wa’ni.> 13 Nyunu waa ndōli ma pà’ni kyù ní, anwúkwòli’ni ú shí ní; nyunu waa wa ma pà ni kyù yɔ̀ ní, ni yí nwúkwòli’ni ú kàsɛ be dò’ni. 14 Sásá pà wàma pà’ni kyù yɔ̀ kwɛɛ ma nghà wà fá zyí’ni ní, ni lò mwú bá’ni dáàdá dédēwaa ni ma hwoi zumyɛ yiifu ndōli kwɛɛ yiifu gáli. 15 M ngyi zɛ̀ yí’ni zyíbyɛ̀ la, nyunu wà hwàkwɛ́ Shidɔ yi wyashishi Sodom wa Gomorra yi kā panku wàhwoi gáli lá ní. 16 M ngyi gbò’ni chɔ̀ hwoi zumyɛ sáyìna dɛ̀ wàhwoi fu vyìvyìjɔ lá, yimamala ni lò kà wándó zúbyɛ sáyìna wusu, ni lò kà wándó wà hwoi hwā zyí yɔ̀ sáyìna ndàkpò.

17 <<Ni pà di’ni wa panku, dizyi wa lò ni hwoi chá ya pyɛ̀ wacha’wa ma hwoi gyógá’ni wa yō yii táwàkwāshī’wa. 18 Kà yiishina zyí’m, wa hwoi chá’ni hwoi ya pyɛ̀ áwádoshi wa áwáku, mazyi ni zɛ̀zyí wàsàsà yí’wa wa wándó wàhwoi wá wúhwɔ̀ lá. 19 Nyunu waa wa ma lò ni pà, ni káwa wèbēbè la, áyɛ̄ waa i hwoi zɛ̀ ní kwɛɛ i hwoi zɛ̀ zyí li mamáni ní yɔ̀. Dizyi nyunuli ma be, ni hwoi dò wú wàzɛ̀zɛ̀, 20 dizyi áwuni gbaa hwoi zɛ̀ zyíli ní yɔ̀, Anidi Ada’ni gbaa yi zɛ̀ zyíli yi zu nū’ni ní.

21 <<Angoyī lò ngoyī yi lò yí wa lò’u yi bwā, ada dedee lò ngo’a yi lò yí; ázyē dedee hwoi dà shinagba wa wándó wàmbà’wa lá ma yí’wa lò wa hwoi bwā. 22 Sásá panku hwoi zé’ni yiishina’m, dedee ápà wàma sāli gbakpo gbógbó ya nyunu wàkenū ní, u yi dò nwàzū. 23 Nyunuwaa wa ma tà’ni fyì yii be waa ni hwoi ní lá ní, ni lò shè ya bezu kɛkɛ. M ngyi zɛ̀ yí’ni zyíbyɛ̀ la, gbógbó ni lò gá Isrela tabilika bwā lá, Ango Panku yi be.

24 <<Atú yi kāgbá ndo wàyi tà’uwú lá yɔ̀, ànyà yi kāgbá wàsendo’a yɔ̀. 25 U lò sā gyegye mazyi tú ú lò kà sáyìna ndó wàyi tà’uwú lá ló, ànyà ú lò kà sáyìna wàsèndo’a. Nyunu waa wa ma lò wàsendo bá la, Bilzebub ló, apanku wàhwoi fu ndō lá wa hwoi bá’wa zyì wàbɛbɛ kā mamá!

26 <<Yimamala ni káwa sázī yɔ̀. Dizyi áwú wàchùchù waa wa lò’u yi pò yɔ̀ lá yiiní yɔ̀, áwú wàyùyò waa wà hwoi yìnɔ̀ yɔ̀ lá yiiní yɔ̀. 27 Áwú waa m ngyi zɛ̀ yí’ni yiifu fēsè lá, ni zɛ̀ nyitò; áwú waa m ngyi zɛ̀ kyókyó yii chùchú’ni lá, ni lò dádɔ̀ yii shitónā. 28 Ni káwa sázī wándó wà lò dì yi bwā ma hwoi bwā nwú kà yɔ̀ lá yɔ̀. Nyemgba ni sázī Shidɔ wàyi zyìchù nwú wa dì yii ndō pyù lá. 29 M zɛ̀ la, ányī wàtítíìntí ipyɛ̀ gbaa yi banji wàtítíìntí ní yɔ̀? Dedee yiifu’wa zukponu ma kwèkwè yii zyoku Ada yi yìnɔ̀. 30 Kwā zyí ishina’ni sásá hwɛ̀hwɛ̀. 31 Yimamala ni káwa sázī yɔ̀; áhwɛ̀’ni kāgbá wu nyī buu.

32 <<Sásá pà wàma tà di’a yii pyɛ̀ panku la, u yi wum, ami dedee m ngyi tà’u yii pyɛ̀ Ada wà yii dɔ lá. 33 Sásá pà wàma gɛ̀ kà nghà’m yii pyɛ̀ panku ní, ami dedee m ngyi nghà’u yii pyɛ̀ Ada wàyii dɔ.

34 <<Káwa gàzyíhwɛ̀ la, m be mazyi bēèmyɛ̄ ú dò nwúkwòli ni yɔ̀mbo. Aayì, anwúkwòli waa m chá be ní yɔ̀, m be wà hwāzyí. 35 M be mazyi

<<ázyēwánù wálò da’wa hwāpyɛ̀ wa zyí,

ázyēwáwà wálò yī’wa hwāpyɛ̀ wa zyí,

áwáwà àwu zyē wálò áwáyī àwu nù’wa hwāpyɛ̀ wa zyí,

36 dizyi àwàzé panku yi zu fu ndō’a.>

37 <<Áwándó wàshó da’wa wa yī’wa kā’m lá, gba kē wàhwoi áwátu’m yɔ̀, áwándó wàshó ngo’wa wàwūnù kwɛɛ ángù’wa wàwūwà kā’m lá, gba kē wàhwoi áwátu’m yɔ̀, 38 áwándó wàkōlò fyī’wa ma be bákyū’m ní yɔ̀ lá, gba kē wàhwoi áwátu’m yɔ̀. 39 Áwándó wàhwoi ngā mazyi wá kó nwú’wa lá, hwoi sáfyì nwú’wa, dedee wándó wàsáfyì nwú’wa ishina’m lá, hwoi dò nwú wàgbógbó.

40 <<Apà wàma zɛ̀ndɛ̀ wa’ni ní, u zɛ̀ndɛ̀ wa’m mánì, ápà wàma zɛ̀ndɛ̀ wa’m ní, u zɛ̀ndɛ̀ wa ándó wàgbò’m be lá mánì. 41 Apà wàma zɛ̀ndɛ̀ wa ándówyàpyɛ̀ ishina u yi ndówyapyɛ̀ lá ní, u yi dò sɔ̀ wu ndówyapyɛ̀. 42 Apà wàma yí pàzukponu ágè lape wàtashuma yiishina wa hwoi áwátu’m lá ní, m ngyi zɛ̀ yí’ni zyíbyɛ̀, u yi sáfyì yɔ̀.>>