1 Wa mbà Yesu yii gá àwu Betalami yii Yahudiya, yiifu dédēwaa Hirudus yi ku lá. U gba nashɔ yɔ̀, áwánù wándó wàyì chí lá gbá zū zúdɔ ya Urushelima 2 ma mbyēshé la, <<Ángotā waa wa mbà lò yi kà ku Áwáyahuda lá yii be wàni ní? I wya chí'a dédēwaa u dà ya dɔ yii zúdɔ lá, i bē mazyi í wá'u.>>

3 Dédēwaa Aku Hirudus fá mamá lá, u lò kà fu bēbèwàwèwè, kà mamá wa nɔ́nɔ̄ yii Urushelima dúdú wa'u. 4 Hirudus lò áwádakumbwa wàshuwɔ̀ wa wándó tà Dɔ̀ Musa bándɛ̀ gbàyi ma mbyē'wa shé la, <<Yii be wàni waa wa hwoi mbà Kristi ní?>>

5 Wa zɛ̀ yí'u la, <<Yii fu gá àwu Betalami yii Yahudiya, dizyi áwú waa ándówyapyɛ̀ tā lá gbaa hwoi nì,

6 <Betalami wàyii zyoku Yahuda lá,

áwo gba zōnwū kā yiifu gáwàshūwɔ̀ wàhwoi sáchɔ̀ yii Yahuda lá ní,

yii fu'u waa dóshī zū yi zumyɛ ní,

ándó wàyi kó panku'm Isrela lá.>>>

7 Yimamala Hirudus lò áwápàkyù wàzu zúdɔ lá bándɛ̀ kyómá gbàyi mazyi ú yì nyunu pwá waa chí pwèzū lá yiibe'wa. 8 Yiibeli u chō'wa chɔ̀ ya Betalami ma zɛ̀ la, <<Ni ya hwāzú ngo lá myɔ̀myɔ̀, mazyi dédē waa ni ma wya'u ní, ni yí'm yìnɔ̀ mazyi ḿ ya wá'u dúdú.>>

9 Niki waa wa lò zyí fá bwā lá, wa ya'wa, yii nyàshɔ'wa, wa wya chí waa wa wya'u yii zúdɔ lá lò kɛ́pyɛ̀ gbógbó ya sāli yii bē waa ngo yiiní lá. 10 Dédēwaa wa wya chí li lá, wa mbònwú kà mbònwú buu. 11 Wa lò kà futá ma wya ngo wa yī'a Maryamu lá, wa kàli ma wá'u. Yiibeli wa lò gúmà'wa pòfā ma sá'usɔ̀ àshɔ́wànyànyà, wa àmbwò kòfyī waa wa hwoi wè pyù nūfyì vyāàvyā lá, wa àbyù kòfyī wànūfyì kwɛ́nkwɛ́n lá.

12 Yiibeli wa lò kàsɛ̄ zū nyàshɔ zukɛ̄kɛ̄ ma ya'wa zyoku ndō'wa, dizyiwaa Shidɔ lò vo bwà'wa yiifu ndó mazyi wá ká kàsɛ zū bé Hirudus gɛ̀ yɔ̀ lá.

13 Niki waa wa lò ya'wa lá, ángochɔ̀ Adando pwèzū Yusufu ní yiifu ndó ma zɛ̀ la, <<Hirudus yi hwāzú ngo lá mazyi ú lò'u bwā. Yimamala dàdɔ, lò ngo lá wa yī'a lò mazyi ni lò shè ya Masar, ni shí beli gbógbó m ma zɛ̀ yí'o la, ni kàsɛ pùnū.>>

14 Yimamala Yusufu lò dàdɔ, ma lò ngo lá wa yī'a lò súnɔ̀ ya Masar, 15 ma shí beli gbógbó Hirudus lò hu. Áwú lá kwò mamá mazyi áwú waa Adando zɛ̀ zū nū ándówyapyɛ̀ lá, ú lò kà byɛ̀, u zɛ̀ la, <<M lò ngo'm bándɛ̀ zumyɛ yii Masar.>>

16 Dédēwaa Hirudus lò yìnɔ̀ la, áwándó wàzu zúdɔ byè'uni lá, àbɔ̄dú waa u lò sáàpá ní. U yínū mazyi wá bwā zyētíìfyí wánù wàhwoi fu Betalami wa gáwàtiti wàbàbà wa'u lá sásá, dà zū ishina wándó dɛ ipyɛ bē zyoku, u lò wú lá sá mamá dizyi ádédē waa u dò yiibe áwápàkyù ishina ápwèzu chí lá.

17 Áwú lá hwā zyí waa Jeremiya ándówyapyɛ̀ zɛ̀ lá lòkà zyíbyɛ̀, u zɛ̀ la,

18 <<Apanku fá huna kito yii Rama,

ákito kishèshè àwu nwútòtò.

Rahila gbaa yi shèki ishina zyē'a ní,

u nghà la, wáká pé'u yɔ̀,

dizyi zyē'a hwo hu.>>

19 Niki waa Hirudus lò hu lá, ángochɔ̀ Adando pwèzū Yusufu ní yiifu ndó yii Masar 20 ma zɛ̀ la, <<Dàdɔ, lò ngo lá wa yī'a lò mazyi ni kàsɛ̄ ya zyoku Isrela, dizyi áwándó wàhwoi hwāzú ngo lá wàbwāàbwā lá hwo hu ló.>>

21 Yimamala Yusufu lò dàdɔ, ma lò ngo lá wa yī'a lò ma hwo kàsɛ ya zyoku Isrela.

22 Dedee dédēwaa Yusufu fá la, Akilayus zyīfí dā'a Hirudus ma lò kà ku àwu Yahudiya lá, u lò kàzī wàya beli. Wa bwà'uvo yiifu ndó lá, u lò dányà ya vozyoku Galili 23 ma ya shí fu gá zū zyī la, Nazaret. Yimamala áwú waa áwándówyapyɛ̀ zɛ̀ lá lò kà zyíbyɛ̀, zɛ̀ la, <<Wa hwoi bá'u la, Áwánazaret.>>