1 Yiibeli Nidi wànyɛ̄nyɛ̄ lò Yesu lò ya sáchɔ́ mazyi Ápawàbɛbɛ ú mbà'upɛ́. 2 Nikiwaa Yesu sá nyunu idipaipyɛ, àsúnɔ̀ idipàipyɛ mazyi wúzyī yɔ̀ lá, ámbɔ̄ lò kāgbá'adɔ. 3 Yiibeli Ápawàbɛbɛ bē dò'u ma zɛ̀ la, <<Nyunuwaa o ma yi Ngo Shidɔ ní, yí gɔ́ hwoila nū mazyi wálò kà wúzyī.>>

4 Yesu zɛ̀'undɛ̀ ní la, <<Ázyí Shidɔ wàtāàtā zɛ̀ la, <Ápanku yi gbā wa wúzyī wàzyīìzyī tànwú'a yɔ̀, dedee u yi fú sásá zyí wàyi zumyɛ yii nū Shidɔ lá.> >>

5 Yiibeli Ápawàbɛbɛ lò Yesu lò ya Urushelima, Àgáwàshuwɔ̀ Wànyɛnyɛ lá, ma lò'u chá ya sā bē wà yii dɔdɔ kā lá yii ishina táwàwáshidɔ, 6 ma zɛ̀ yí'u la, <<Nyunuwaa o ma yi Ngo Shidɔ ní,>> <<nwà ya zyoku, dizyi Ázyí Shidɔ wàtāàtā zɛ̀ la,

<Shidɔ yi yí ázyēchɔ̀'a nū ishina'o,

wálò'o yi pà wa vo'wa,

mazyi bá'o ú káwa dá bé gɔ́ yɔ̀.> >>

7 Yesu zɛ̀'undɛ̀ ní la, <<Dedee ázyí Shidɔ wàtāàtā kà zɛ̀ la, <Káwa mbàwya Adando Shidɔ'o yɔ̀.> >>

8 Yiibeli, Angyefu lò Yesu lò ya ishina gā ya dɔdɔ ma tà'u chɔ̀ wàhwoi denmyɛ sásá lá wa áhwɛ̀ waa wa bā lá. 9 Ma zɛ̀ yí'u la, <<Sásá wúwàhwoila m lò yi yí'o, nyunuwaa o ma kàli ma wá'm.>>

10 Yesu zɛ̀'undɛ̀ ní la, <<Dàdɔ yii maa, Ápawàbɛbɛ! Ázyí Shidɔ wàtāàtā zɛ̀ la, <Wá Adando Shidɔ'o, mazyi ó sá kolo yí'u tànwú'a.> >>

11 Yiibeli Ápawàbɛbɛ me Yesu ní, ázyēchɔ̀ be dò'u ma sázá'u ní.

12 Dédēwaa Yesu fá la, wa lò Yohana pà hwā fu táfyì lá, u lò dàdɔ yii Yahudiya ya Galili. 13 U gba sāli yii Nazaret yɔ̀, ma ya shí Kapernaum, àgá wàbàbà wa núkù Galili lá, yii vozyoku Zebulun wa Naftali. 14 Áwú lá kwò mamá mazyi ázyí Ishaya ándówyapyɛ̀ zɛ̀ lá, ú lò kà zyíbyɛ̀, yi zɛ̀ la,

15 <<Áwuni panku wàshí hwoi zyoku Zebulun wa zyoku Naftali,

wàyii nyàshɔ wàya núkù, yii zyɛ̄ Jodan,

wa Galili, azyoku pànku wàhwoi Áwáyahuda yɔ̀ lá!

16 Apanku wàshí hwoi bēwàsèfē lá

hwoi wya bēyá wàshuwɔ̀.

Áwándó wàshí hwoi zyoku wàsèfē àwu ki lá bēyá yi té jā'wa.>>

17 Dà zū dédē lá Yesu vyō dɔ̀wàdáàdá'a, yi zɛ̀ la, <<Ni vekà me wúwàbɛbɛ'ni ní, dizyi àchɔ̀ wàyii dɔ lá lò bē bàdì!>>

18 Yiiyi waa Yesu yi kyēkyū bàbà yii núkù àwu Galili lá, u wya zyēyī ápà ipyɛ hwoi wándópàzyé, Siman waa wa bá la, Bitrus lá, wa ngoyī'a Andrawus, hwoi pà zyé yii núkù wa kyɛ́lɛ́bɛ́. 19 Yesu zɛ̀ yí'wa la, <<Ni bē'm ní, mazyi ḿ tà'ni yiiyi wa hwoi pà panku lá.>> 20 Yiibebeli wa me kyɛ́lɛ́bɛ́'wa ní ma lò be'u ní.

21 U kyēkyū ya pyɛ̀ ma wya zyēyī zukɛ̄kɛ̄ ipyɛ, Yakubu wa Yohana ázyē Zebedi. Wa hwoi fu kɔ̀'wa wa ada'wa Zebedi, ma hwoi mbyā kyɛ́lɛ́bɛ́'wa. Yesu bá'wandɛ̀, 22 yiibebeli wa me kɔ̀'wa ní wa ada'wa ma lò bē'u ní.

23 Yesu lò zyoku Galili kyē sásá, yi tàwú hwoi táwàwáshidɔ, yi dádɔ̀ Shévyā Wàsàsà ishina Chɔ̀ Shidɔ, ma yi dàgba panku wàbā ādōdì kɛ̄-kɛ̄kɛ̄ wa wútòtò lá. 24 Ashévyā ishina Yesu kà zyoku Siriya sásá, apanku hwo wándó wàhwo tòwú sásá lá bē yí'u, wa wándó waa ādōdì kɛ̄-kɛ̄kɛ̄ hwoi tà'wa fyì lá, wa wándó wàfá vyā dì yɔ̀ lá, wa áwándó wàbā zyɔ̀, wa wándó wàhwoi pà kpíìkpíì, wa áwándó wàhu zédì, Yesu lò'wa dàgba sásá. 25 Apanku ndàbè be'uni zū Galili, wa gá ídē, wa Urushelima, wa zyoku Yahudiya, kà wa wándó wàhwoi zyɛ̄ Jodan lá.