1 <<Ni káwa hwà pà zū kwɛ́, mazyi Shidɔ ú hwà'ni kwɛ́ yɔ̀. 2 Dizyi Shidɔ yi hwà'ni kwɛ́ li zukponu sáyìna yiiyi waa ni hwà wándówànati ní lá, kà wúwàmbàwú zukponu waa ni mbà wu wándówànati wa'u lá, waa wa kà hwoi mbà wuni wa'u ní. 3 Áyɛ̄ sá waa o pi yi wya wúwàtítíntíì wàdó yiifu áyīzú ngoyī'o lá, ma yi wyà àgbólófyī wàdó yiifu áyīzú'u lá yi wúzu yɔ̀ ní? 4 Mamánī waa o pi yi zɛ̀ yí ngoyī'o la, <Mamgba ḿ lò'o wúwàtítíntíì dó yiifu áyīzú'u lá tɛ̄zūmyɛ̄,> waa áyīzú wuo gɛ̀ bā àgbólófyī dó yii fu'a lá ní? 5 Áwo ndógyɛ́! Kàpyɛ̀ lò àgbólófyī wàdó yiifu áyīzú'u lá tɛ̄zūmyɛ̄ pùnū, mazyi ó pi wyabe nyɛnyɛ wàlò wúwàtítíntíì wàdó yiifu yīzú ngoyī'o lá tɛ̄ zumyɛ ní.

6 <<Ni kálò wú wànyɛnyɛ lò yí bɛ́ yɔ̀, dizyi wa hwoi vēkà ishina té'ni ma hwoi tɛ̄'ni fɔ́. Ni ká lò tángúdē'ni tá hwā luma pyɛ̀ yɔ̀, dizyi wálò bá hwoi té ní, ma hwoi vēkà ishina té'ni wàtɛ̄'ni fɔ́.

7 << Ni ma hwoi vá, Shidɔ yi yí'ni, ni ma hwoi hwāzú, ni hwoi fyò, ni ma hwoi dávo yii nūkyɔ́, Shidɔ yi pò nūkyɔ́ yí'ni. 8 Sásá pà wàma vá Shidɔ yi yí'u; sásá pà wàma hwāzú u yi fyò, sásá pà wàma dávo yii nūkyɔ́, Shidɔ yi pò nūkyɔ́ yí'u. 9 Adā wànī hwoi fu'ni waa ángo'a ma vá wúzyī, waa u yi yí'u gɔ́ ní? 10 Kwɛɛ u ma vá zyé waa u yi yí'u wúsù ní? 11 Kwā yiiyi waa áwúsáàsá'ni bɛbɛ lá, ni yì yiiyi waa ni hwoi yí zyē'ni wúwàsàsà lá. ni hwoi gà la, Ada'ni wàyii dɔ lá yi yí wándó wàhwoi vá'u lá wúwàsàsà kà yɔ̀ ní?

12 <<Yimamala ni sá panku wú waa ni hwoi fú wásá'ni lá, dizyi mamá waa Àdɔ̀ Musa wa áwándówyapyɛ̀ tà ní.

13 <<Ni zū nūkyɔ́ wàpyíìpyí kàfu. Dizyi nūkyɔ́ wàya ndōpyù yáàyá, nyàshɔ wàzu ya fu'a yi nyàshɔ wàkpéndé, ápanku wàzu hwoi ya fu'a lá ndàbè. 14 Dedee nūkyɔ́ wàzu ya dò nwú wàgbógbó pyiipyi, nyàshɔ wàzu ya fu'a kàdì, ápanku wàzu hwoi ya fu'a lá ndàbè yɔ̀.

15 <<Ni pà dini wa áwándówyapyɛ̀ àwu zyígé, wàdó hwoi fu gàhwɔ̄ dɛ̀ bē hwoi dò'ni lá, dedee waa nwú'wa sáyìna vyìvyìjɔ̄ wàbā púpù lá. 16 Ni hwoi yìkyà'wa yiibe wú waa wa hwoi sá lá. Ni hwoi nwá ngyì zyàbā yiibe sé yɔ̀, ni hwoi nwá ngyì gbánkòlò yiibe sé yɔ̀. 17 Kà mamá waa sásá fyī wàsàsà lá yi nwā ngyì wàsàsà ní, dedee āfyī wà wàbɛbɛ, kà yi nwā ngyì wàbɛbɛ. 18 Āfyī wàsàsà yi nwā ngyì wàbɛbɛ yɔ̀, āfyī wàbɛbɛ yi nwā ngyì wàsàsà yɔ̀. 19 Sásá fyī wàma nwā ngyì wàsàsà yɔ̀ ní, wálò'u gé tá hwā pyù. 20 Yimamala ni hwoi yìkyà áwándówyapyɛ̀ àwu zyígé yiibe wú waa wa hwoi sá lá.

21 <<Gba yi sásá wándó wàhwoi bá'm la, <Adando, Adando,> lá hwoi kàfu chɔ̀ wàyii dɔ lá ní yɔ̀, dedee ákèké wándó wàhwoi sá wú waa Adā'm wàyii dɔ lá yi fú mazyi wásá lá, gbaa hwoi kà fua ní. 22 Dédēwaa nyunu wàhwàkwɛ́ yi bē lá, ápanku ndàbè hwo zɛ̀ yí'm la, <Adando, Adando! Yiifu zyì'u zɛ̀ chɔ̀ Shidɔ, wa zyì'u i ká zyɔ̀ buu zumyɛ ma sá wúgbashu!> 23 Yiibeli m ngyi zɛ̀ yí'wa la, <M yì'ni ló yɔ̀. Ni dàdɔ yii be wa'm yiiní lá, áwándó sá wúwàbɛbɛ!>

24 <<Yimamala sásá pà wàma fá zyí'm ma sá wú waa m zɛ̀ lá ní, u yi sáyìna ándókyíyá wàmyī tá'a yii ishina gɔ́ lá. 25 Àfyù tā, alape lò mwɛ̀, áwɔ̀ sā gbakpo lò ishina té bé táli. Dedee u gba hwó yɔ̀, ishina wa myī'u yii ishina gɔ́ lá. 26 Dedee sásá pà wàma fá zyí'm ma sá wú waa m zɛ̀ lá yɔ̀ ní, u yi sáyìna ákyɔ̀ panku lá wàmyī tá'a yiishina chīchɔ́ lá. 27 Àfyù tā, alape lò mwɛ̀, áwɔ̀ sā gbakpo lò ishina té bé tá li, átá kwèkwè yii zyoku ma lò hwó sásá!>>

28 Waa Yesu lò zyí hwoila zɛ̀bwā lá, àgbashu lò panku pà yiibe wútàtà'a, 29 dizyi u tà'wa wú sáyìna ándó wàbā gbā, gba sáyìna áwándó tà Dɔ̀ Musa lá yɔ̀.