1 Yi beli Yesu zɛ̀ yi abe panku wa áwátu'a lā: 2 << Áwándótà Dɔ̀ wu Musa wa Áwáfaris shí yiishina dù wu Musa. 3 Yimamala, ni hwoi zɛ̀ndɛ̀ wa wā ni hwoi sá wú sásá waa wa hwoi zɛ̀ yí'ni lá yɔ̀. Dedee ni kà sá wú waa wa hwoi sá lá yɔ̀,dizyi wa hwoi sá wu waa wā hwoi zɛ̀ lā yɔ̀. 4 Wa hwoi chá panku wúchɛ́ wàndabɔ, dedee wa hwoi sá wuzukponu wà sázá'wa ní yɔ̀.

5 Sásá wu waa wa hwoi sá lá hwoi wu zú mazyi panku wā wya: Wā hwo vyù wa fā wu zyí Shidɔ tā yi dɛ bà mopyɛ̀ wa, ma hwoi dɛ nú vo wúchɛ́ wa; 6 Wa shó gwá yi be dùdù wā shó wa shí dù yi táwàkwāshī; 7 wa hwoi shó mazyi wā tá'wamángbá yii tí, wa hwoi fú panku wa bá wa la, <Áwándótàwú.>

8 << Ni káwa zɛ̀ndɛ̀ mazyi wá bá'ni la, <Áwándótàwú> yɔ̀, dizyi ni ba Ndótàwú zukponu, ni hwoi zyēyī. 9 Yii bēèmyɛ̄ ni káwa bá pazukponu la < ada > yɔ̀, dizyi Ada ni zukponu waa ni bā ni, u yii dɔ. 10 Ni káwa zɛ̀ndɛ̀ mazyi wá bá'ni la, <ndótàwú>yɔ̀, dizyi Ndótàwú ni zukponu, gbaa yí Ndótɛpa mánì. 11 Ándó wàshuwɔ̀ yiifu'ni kā lá lò yi kà nyà. 12 Dizyi ándó wa yi lò shinadɔ wā lò'u yi kwá kàsɛ, ándó wa ma kwá di'a kàsɛ̄ wa lò'u yi lò yi ya dɔ.

13 << Àfyì wuni yi bɛbɛ mamáni ní, áwuni wándótà Dɔ̀ wu Musa wa Áwáfaris! Áwuni wándó sábɛfù! Ni lò nūkyɔ́ wàya ndō chɔ̀ wàyii dɔ lá chù yii zú panku, áwuni vodini hwoi kà fu yɔ̀, kwɛɛ mazyi ni pi me wándó wàhwoi ngā mazyi wa kà fu lá ní yɔ̀! 14 Àfyì wuni yi bɛbɛ mamáni ní, áwuni wándótà Dɔ̀ wu Musa wa Áwáfaris! Áwuni wándó sábɛfù! Ni hwoi zyī wúchɛ́ àwu áwáwàki, ni kà hwoi jāndɛ̀ wàgwɔ́ɔ̀gwɔ̄ mazyi panku wa wya'ni. Yimamala wa hwoi tà'ni fyì wàbɛbɛ buu lá.

15 <<Àfyì wuni yi bɛbɛ mamáni ní, áwuni wándótà Dɔ̀ wu Musa wa Áwáfaris! Áwuni wándó sábɛfù! Ni hwoi kye ya benashɔ ma kà hwoi kyānú dizyi ni dò pazukponu wàyi mbyā beshí'a shí, nyunu u ma mbyā beshí'a, ni lò'u kà pà wàbɛbɛ kā'ni.>>

16 << Shàmákɛ̀ló yi wu ni, áwábòzú! Ni zɛ̀ lā, ándó wa ma dàki wā Táwàwáshidɔ, u tà wuzukponu yɔ̀; dedee pazu ma dàki wa shɔ́wànyànyà wa yiifu Táwàwáshidɔ, ákidàdàli yi pà'u.> 17 Awuni, àkyɔ̀ bòzú! Wàni yi washuwɔ kā ni: ashɔ́wànyànyà, kwɛɛ Táwàwáshidɔ gbaa lò shɔ́wànyànyà kà wú wà nyɛnyɛ ni? 18 Ni kà mbyā wà zɛ̀ la, <Ándó wa ma dàki wa gwùdù, u gbaa yi wuzukponu yɔ̀; dedee pazu ma dàki wa sɔ̀wàsáàsá wàyii ishina gwùdù li, ákidàdàli yi pà'o. 19 Awuni bòzú! Wàni yi washuwɔ ni: asɔ̀wàsáàsa, kwɛɛ agwudu gbaa lò asɔ̀wàsáàsa yi kà wu wànyɛnyɛ ni? 20 Yimamala, wándó wa ma dàki wa gwūdù u dàki wa'u wa wú wàhwoi ishina gwūdù sásá lá. 21 Waa wándó wa ma dàki wa Táwàwáshidɔ dàki wa'u wa wándó wa shí yi táwàwáshidɔ la. 22 Áwándó wa ma dàki wa dɔ dàki wa àdù wu Shidɔ wa ándó wà yi shí ni lá.

23 <<Shàmákɛ̀ló ni, áwándó tàdɔ wu Musa wa Áwáfaris, áwándósábēfu! Ni hwoi yi zū yiifu ide wúsásá wa ni hwoi dò lá. Dedee wu wa sàsà wa hwoi fu dɔ la ni me'wa ní, zyèwú wúzyī wà nūfyìkwenkwen wa ákpɔ̄kɔ̄ wàshìshì. Dedee ni nghà wa sá . 24 Awuni bòzú! Ni hwoi shā shishi zu fú gè lape dedee ni hwoi ma wenārī.

25 << Shàmákɛ̀ló ni, áwándótà Dɔ̀ wu Musa wa Áwáfaris, áwándósábēfu! Ni hwoi tō niki gè, ma hwoi me fu'a wa wu waa ni pà wa gba wa shóshódì. 26 Áwáfaris wándó wa zū mbélā bwàbwà! Ni kɛ́pyɛ̀ lò fu gè tō, mazyi niki'a u lò yúùyú.

27 <<Shàmákɛ̀ló ni, áwándótà Dɔ̀ wu Musa wa Áwáfaris, áwándósábēfu!! Ni hwoi sáyìna mbélā waa wā lò tō mombo,wàsàsà yi myɛ̄ dedee yiifu'a pùkē panku wàhuuhu ma nàázē gbaa mwɛ̀ fu'a ni. 28 Awuni dedee hwoi mamá, panku hwoi wya ni yi myɛ sáyìna panku wa sàsà dedee ni hwoi wándó sá bɛfù, ni kà bā nwúwàbɛbɛ. 29 <<Shàmákɛ̀ló ni, áwándótà Dɔ̀ wu Musa wa Áwáfaris, áwándósábēfu! Ni hwoi myī mbélā yi wándówyàpyɛ̀ ma lò mbélā wándó wàbā byɛ̀ mbya sàssà. 30 Ni kà zɛ̀ la,< Í ngaa zɛ̀ la i hwoi ni dédēwaa áwádako'i hwoi ni lá ní, i hwoi bwā wándówyàpyɛ̀ yɔ̀> 31 Tama ni tà la, ni hwoi zyēdē wándó wa lò wándówyàpyɛ̀ bwā lá. 32 Ni lò wú wàbɛbɛ dako'ni sábwā

33 << Awuni wusu hwoila! Wusu wàbā kyà! Ni hwoi sá mamánī ma hwoi kà pyù yɔ̀ ní? 34 Yimamala, m ngyi chō wándówyàpyɛ̀ wa wándó wàbā yìyì wa wándótàwú. Wándó wànati'wa ni hwo'wa hwoi bwā ma kà hwo'wa hwoi dábà bé fyī, wándó wànati ni hwoi gyógá'wa wa yō yiifu táwàkwashī, ma hwoi ká be'wa ni àgá wa gá. 35 Áwú waa ni sá lá, àfyì àwu wándó wàhwoi gbàdà ma yì wúzu yɔ̀ waa ni bwā lá yi tòli yiishina'ni dà zu ábwāàbwā Abila wa Zakariya ngo Berekiya, wándó waa ni hwo'wa bwā yii yiyɔ́ táwàwáshidɔ wa gwūdù lá. 36 M ngyi zɛ̀ yí'ni zyíbyɛ̀, sásá fyì wú wàhwoila hwoi tòli yiishina panku wàtama.

37 <<Awuni Urushelima, Urushelima, ni hwo wándówyapyɛ̀ bwā ma kà tá wándó waa Shidɔ chō'wa chɔ̀ bē dò ni lá gɔ́, m shó mazyi m bá zyē ni ndɛ̀ gbayi nashɔ, yiiyi wa kwu hwo zyē'a kwazɔ̄ dó sàvo'a lá, dedee ni zɛ̀ndɛ̀ yɔ̀. 38 Wya, pazukponu yi ndō ni yɔ̀. 39 M ngyi zɛ̀ yi ni, ni hwoi wyam gɛ̀ yɔ̀ ni ma nghà wa zɛ̀ la, < Avosɔ̀ yi wu ándó wà yi bē yiifu zyì wu Adandō lá> >>