1 Dédēwaa Yesu lò wú tàbwā lá, u zɛ̀ yí áwátu'a la, 2 <<Ni yìnɔ̀ lá, Àdùdù Wàkyānú nàti nyunu ipyɛ, mazyi wá lò Ngo Panku ndavo yí wa lò'u dá bà bé fyī.>>

3 Yiibeli, áwádakumbwa wàshūwɔ̀ wa áwácha kwazɔ yii súkpà Kayafas wàyi Adākúmbwá wàshuwɔ̀ kā lá, 4 ma bwābɔ̄ wàlò Yesu pà kyómá mazyi wá lò'u bwā. 5 <<Wa zɛ̀ la, i hwoi sá'u yiifu dédē wàsá dùdù yɔ̀, kwɛɛ nwázuyɔ̀ ápanku be hwoi dà pyáwàsáàsá.>>

6 Yesu yii Betani yii ndō Siman, ándó wà bā wútòtò dìwànyànyà ndii lá. 7 Yesu yiifu wúzyī wàzyīìzyī, àwàzu gbá bē dò'u wa ángo kwɛ̀ mwɛ̀mwɛ̀ wa byù wànufyì kwénkwén, bā banji buu, ma lò wè'u shina.

8 Áwátu wyà mamá lá, àpúpù lò'wa pà. Wa mbyēshé la <<Áyɛ̄ sá wu fyìwàsáàsá mamá ní?>> 9 <<Wángaa lò byù wàkwénkwén lá kpátí wa banji wàbuu, ma lò yí áwándóchɛ̀!>>

10 Yesu yì zyí waa wa hwoi zɛ̀ lá, yimamala u zɛ̀ yí'wa la, <<Áyɛ̄ sá waa ni hwoi sá àwàlá gìdìgìdì ní? Áwú wàsàsà waa u sá'm ní. 11 Áwándóchɛ̀ wa ni hwoi dùdù gbɛ̀n, dedee ámì wa ni hwoi shí gbɛ̀n yɔ̀. 12 Àbyù wànūfyì kwénkwén waa àwàlá lò wè'm dì lá, u lò'm dì mbyā wàzyìzyì ní. 13 Tàma m ngyi zɛ̀ yí'ni zyíbyɛ̀ la, sásá bē waa wa ma ya dádɔ̀ shévyā wàsàsà lá yii ní, ápanku hwoi jāsā wa shéwàvyāàvyā ishina wú waa àwàlá sá lá, àdenmyɛ sásá yi kyé'u.

14 Yiibeli, yiifu áwátu idezepyɛ lá, ápazu'wa waa wa bá'u la, Yahuda Iskarioti lá, ya dò áwádakumbwa wàshūwɔ̀ 15 ma mbyē'washé la, <<Nyunuwaa m ma lò Yesu pà yí'ni, áyɛ̄ waa ni hwoi yí'm ní?>> Yiibeli wa hwɛ̀ kobo shɔ́wàmòmbò idizuzede ma lò yí'u. 16 Dà zū nyunu li, waa Yahuda yi hwāzú nyàshɔ wàlò Yesu ndāvo yí'wa ní.

17 Yiifu nyunu wàkɛ́pyɛ àwu Dùdù wàzyī wúzyī wàbā yist yɔ̀ lá, áwátu bē dò Yesu ma mbyē'ushé la, <<Ābē wànī waa o yi fú í mbyā wúzyī Dùdù Wàkyānú yí'o yii ní ní?>>

18 Yesu zɛ̀ yí'wa la, <<Ni ya dò pàzu yiifu gáwàshūwɔ̀, mazyi ni zɛ̀ yí'u la, <Ándótàwú zɛ̀ la, Ádédē'a lò bē bà dì, áhu wa áwátu'a hwoi zyī wúzyī Dùdù Wàkyānú yii ndō'o.> >> 19 Yimamala, áwátu sá wú waa Yesu zɛ̀ yí'wa lá, ma lò wúzyī Dùdù Wàkyānú sá.

20 Ànyíìzɔ́, Yesu lò shíli wa áwátu'a wàzyī wúzyī. 21 Wa hwoi fu wúzyī wàzyīìzyī, Yesu gbá zɛ̀ la, <<Yibyɛ̀ ápazu'ni lò'm yi kpátí.>>

22 Ánwú áwátu hwo bɛbɛ lá wa jāsā'u wa shéwàmbyēèmbyē zū-zū la, <<Yibyɛ̀, Adandō, o wya sáyìna mi yɔ̀?>> 23 Yesu zɛ̀ yí'wa ndɛ̀ ní la, <<Ápà wàwa'm yi dóvozɔ yiifu gè lá gbaa lò'm yi kpátí ní. 24 Ngo Panku lò yi hu sáyìna yiiyi waa Āfā zyí Shidɔ wàtāàtā zɛ̀ la, u lò yi hu lá, dedee áfyì wàbɛbɛ yi wu pà wàlò Ngo Panku yi kpátí lá! Wá ngaa ká mbà pàli yɔ̀ ní, ú ngaa yi pà'utáshì ní yi kā ní!>>

25 Yiibeli Yahuda, ándójāzyí, zɛ̀ la, <<Yibyɛ̀, Andótàwú, o yi wya sáyìna ámì yɔ̀?>>

Yesu zɛ̀'undɛ̀ ní la, <<O lò zɛ̀.>>

26 Wa hwoi fu wúzyī wàzyīìzyī, Yesu gbá lò bùbùrù zū, ma tá Shidɔ mamgba, ma téká-téká yí áwátu'a, ma zɛ̀ la, <<Ni pà mazyi ni zyī; àdì'm gbaa yiinì.>>

27 Yiibeli u kà lò gè zyàbā, ma tá Shidɔ mamgba, ma lò yí'wa, ma zɛ̀ la, <<Ni wa, sásá'ni. 28 Àzyàbā lá yi sà'm àwu nūwàgéègé Shidɔ wa panku'a. Àsà'm yi nyámbyɛ́ dizyi wàgbā panku ndabe zyɔ̀ wúwàbɛbɛ'wa. 29 M ngyi zɛ̀ yí ni, m ngyi wā zyàwā lá gɛ̀ yɔ̀, gbógbó bà nyunu lá waa m wa'ni hwoi wā zyàbā wàpyoo yii Ndōchɔ̀ àwu Dā'm lá. 30 Yiibeli waa wa chòvyū wàngyā Shidɔ lá, wa támyɛ ma ya shina gā àwu fyī Oliv.

31 Yiibeli, Yesu zɛ̀ yi wa la,<< Asunɔ la sásá ni hwoi shè ma hwoi me'm ní dizyi u táàtá:

<< < M ngyi dá ndópyōdɛ̀ li,

dɛ̀ li hwoi shànyá. >

32 Dedee nyunu waa m ma dà zu ki, M ngyi kɛ́pyɛ̀ yi ni yi ya Galili. >>

33 Bitrus zɛ̀ la, << Nyunu nɔ́nɔ̄ ma chēzyí la wa ba yi o yɔ̀, M ngyi chēzyí yɔ̀.>>

34 Yesu zɛ̀ la, << M ngyi zɛ̀ yi ni zyibyɛ̀, asunɔ wa yi la, gbógbó gogorokwu u dá kitó, o yi ngha'm bá isā.>>

35 Dedee Bitrus zɛ̀ la, << U ma pà waa m lò hu wa'u, m ngyi nghà'u yɔ̀.>> Sásá áwátu wànati zɛ̀ mamá.

36 Yiibeli, Yesu ya bezu dùdù wa áwátú zyī la Getsemani, <<Ni shí maa mazyi ḿ gbòkyā ya jāndɛ̀ yii be wàmú.>> 37 U ya wa Bitrus wa zyē Zabadi ipyɛ, ánwú'a lò bɛbɛ wa bēbèwàwèwè. 38 Yibeli, u zɛ̀ yí'wa la, <<Ánwú'm wàlò tòtò kādɔ lá, nàtī tí ú lò'm bwā. Ni shí maa mazyi ni ká náná yɔ̀ wa'm dùdù.>>

39 U kyē ya pyɛ̀ tímá ma lò zú bē zyoku ma jāndɛ̀ la, <<Ada'm, o ma shó, o lò'm ki lá yi kōlòdɔ kà! Dedee ká sá wu nwúm yɔ̀, sá wu nwú'u.>>

40 Yiibeli, u kàsɛ bē dò áwátu ápà isa ma wya'wa hwoi náná, ma mbyē Bitrus shé la, <<Mamánī waa áwuni pà isa wa'm hwoi náná yɔ̀ àwu áwà zukponu kà yɔ̀ ní?>> 41 Ni ká náná yɔ̀ wa ndɛ̀wàjāàjā ishina ni ká kwò fu pɛ́wàmbàmbà yɔ̀. Ánidi yi fú, dedee àdì lò zāhwɔ̄.>>

42 Yesu kà mbyā wà kàsɛ bá wàhwāpyɛ̀ ma jāndɛ̀ la, <<Ada'm, nyunuwaa ki lá ma lò yi lòdɔ yɔ̀, m lò yi hu kɛ́nkɛ́n ní, sá wú waa nwú'u yi shó lá.>>

43 U kà mbyā wàkàsɛ ma wya áwátu hwo náná, dizyi ázú'wa hwo ndàbɔ̀ wa ná. 44 Yesu kà mbyā wà me'wa ní ma ya'a, ma jāndɛ̀ bá wàhwāsā, ma yi zɛ̀ wú waa u zɛ̀ kyaa lá.

45 Yiibeli u kàsɛ bē dò áwátu ma zɛ̀ yí'wa la, <<Bà tàma ni hwoi náná ma kà hwoi nghànwū? Ni wya! Dédē lò bē waa wa lò Ngo Panku yi kpáti yí wándó sá wúwàbɛbɛ ló. 46 Ni dàdɔ mazyi í ya. Ni wya, ápà wàlò'm yi kpátí lá gbaa yiinì!>>

47 Yesu yiifu zyíwàzɛ̀zɛ̀ kin Yahuda wàyi panku zū yiifu áwátu idēzepyɛ̀ lá gbá pwèzū. Wa panku ndàbè wa kwɛ́wàgwɔɔgwɔ hwoi vo'wa wa kùtɛ̀, áwádakumbwa wàshūwɔ̀ wa wácha gbaa chō'wa bē ní. 48 Andó wàlò'u kpátí lá kɛ́pyɛ̀ lò tà bèpanku sāli la, <<Ápà waa m ngyi tá mamgba nū wàgwàzɔ̄ wa'u má, ni lò'u pà!>> 49 Yahuda ndafa ya dò Yesu ma zɛ̀ la, <<Ánwúkwòli ú shí wa'u, Ándótàwú,>> ma tá mamgba nū wàgwàzɔ̄ wa'u.

50 Yesu zɛ̀ yí'u la, <<Abugɛ, sá wú waa o bē yiishina'a lá mɔ̄mɔ̄.>>

Yiibeli, wa kyēkyū bà Yesu ma lò'u pà. 51 Ápazu yiifu wándó wàhwoi dùdù wa Yesu lá gbēnwà kwɛ́wàgwɔɔgwɔ'a ma lò nyà Adakumbwa wàshuwɔ̀ kā lá chùchú kè.

52 Yesu zɛ̀ yí'u la, <<Lò kwɛ́wàgwɔɔgwɔ'o dó fu fyā'a, dizyi sásá pà wàyi lò kwɛ́wàgwɔɔgwɔ lá, yi huki kwɛ́wàgwɔɔgwɔ. 53 Ni wya sáyìna m ma bá Adā'm ndɛ̀ wàsázá'm, yiibebeli u yi chō ázyēchɔ̀ wàhwoi ndūkɛ̀ lá kāgbá idezepyɛ bē yí'm kà yɔ̀ ní? 54 Dedee m ma sá mamá, áwú waa Āfā zyí Shidɔ wàtāàtā zɛ̀ la, u lò kà kɛ́n mazyi ú kwò lá sáni ma pi lò yi kà yi byɛ̀ ní?>>

55 Yiibeli Yesu zɛ̀ yí bèpanku la, <<Ni zumyɛ̄ wa kwɛ́wàgwɔɔgwɔ wa kùtɛ̀ ma lò'm pà sáyìna m ngyi vyú? M gɛ̀ shí Táwàwáshidɔ ma yi tàwú gbɛ̀n, dedee ni pà'm yɔ̀. 56 Dedee sásá wú wàhwoila kwò mamá mazyi ú lò wú waa áwándówyapyɛ̀ tā hwoi fu Āfā zyí Shidɔ wàtāàtā lá kà zyí byɛ̀.>>

Yiibeli, sásá áwátu me'u ní ma hwo shè.

57 Áwándó wàlò Yesu pà lá, lò'u chá ya dò Kayafas, Ádākúmbwá Wàshūwɔ̀ kā lá, yiibe waa áwándó tà Dɔ̀ Musa wa wácha gbàyi hwoi ní lá. 58 Dedee Bitrus lò bē ní yii bēnashɔ, gbógbó kà táwàhwàkwɛ̄ wàyi ndō Ádākúmbwá Wàshūwɔ̀ kā lá. U kàfu táwàhwàkwɛ̄ ma shí wa áwándókó nūkyɔ́ mazyi ú wya wú wàbē yi kwò lá. 59 Áwádakumbwa Wàshūwɔ̀ wa wácha sásá hwāzú zyí wàté Yesu ní mazyi wá dò lò'u bwā. 60 Dedee wa dò zyí zukponu yɔ̀, kwā waa panku ndàbè zumyɛ̄ ma gézyígé dó'u lá. Wàkɛ̄ɛ̀kɛ̄ ápà ipyɛ zumyɛ 61 ma zɛ̀ la, <<Apà lá zɛ̀ la, < M lò Táwàwáshidɔ àwu Shidɔ yi hwó ma mbyā'u yi myī yiifu nyunu isa kà.> >>

62 Yiibeli, Ádākúmbwá Wàshūwɔ̀ kā lá dàdɔ sādɔ ma mbyē Yesu shé la, <<O bā ndɛ̀wàzɛ̀ ishina zyí waa wa té'o ní lá? 63 Dedee Yesu bà'andɛ̀.

<<Ádākúmbwá Wàshūwɔ̀ kā lá zɛ̀ yí'u la, << Yì zyì Shidɔ wàzyoo, nyunuwaa o ma yi Kristi, Ángo wu Shidɔ ní zɛ̀ yí'i.>>

64 Yesu yí ndɛ̀ zɛ̀ la, << Yimamala, o lò zɛ̀. Dedee m ngyi zɛ̀ yí'ni sásá lá, Dà zū maa ya pyɛ̀, ni hwoi wya Ángo Panku shí vonzyī Ándó wàbā gbā lá yi tòli zū fu bèhwā yii dɔ!>>

65 Yibeli, Ádākúmbwá Wàshūwɔ̀ kā lá túkpá'a yà ma zɛ̀ la, <<U chō Shidɔ tè! I gba hwoi fú wándó wànati wàhwoi zɛ̀zyí yiishina'a gɛ̀ yɔ̀! Ni fá tè waa u chō Shidɔ tàma la! 66 Áyɛ̄ waa ni wya ní?>>

Wa yí ndɛ̀ zɛ̀ la, u sá wúwàbɛbɛ ma vyā wa ki.>>

67 Yiibeli, wa chɛ́chɛ́ wè'u zú ma dá'ubwà, áwándó wàtá'u pitá lá 68 zɛ̀ la, <<Zɛ̀ wú wàyi kwò yii pyɛ̀ lá yí'i, O ma yi Kristi ní! Zɛ̀ ndó wàdá'u bwà lá!>>

69 Bitrus shí yii myɛ̄, yii fundō táwàhwàkwɛ̄, àwàzu wàyi sákolo wa Ádākúmbwá Wàshūwɔ̀ kā lá gbá bē dò'u ma zɛ̀ la, <<Kwā wo dedee wa Yesu wàzu Galili lá hwoi dùdù.>>

70 Dedee Bitrus chēzyí yii pyɛ̀'wa sásá la, <<M gbā yì wú waa o yi zɛ̀zyí yiishina'a lá yɔ̀.>>

71 ma zumyɛ̄ támyɛ yii nūkyɔ́ wàkàfu, àwà zukɛ̄kɛ̄ wàkà yi ndó sákolo wya'u ma zɛ̀ yí panku wàhwoi beli lá la, <<Ápà lá wa Yesu wàzu Nazaret lá hwoi dùdù.>>

72 Bitrus kà mbyā wàchēzyí, ma dàki la, <<M gba yì pà lá yɔ̀!>>

73 Gbámá, wándó wàsā hwoi beli lá gbē diwa bà Bitrus ma zɛ̀ yí'u la, <<Yibyɛ̀, o yi pazu yiifu'wa, dizyi ázyízɛ̀zɛ̀'o lò'o fù!>>

74 Yiibeli, Bitrus yi hwa dia nūli ma yi dàki la, <<M gba yì pà li yɔ̀!>>

Yiibebeli gogorokwu gbá dákito, 75 Bitrus gbá kyé zyí waa Yesu zɛ̀ yí'u lá la, <<Gbógbó gogorokwu ú dákito, o yi chēzyí bá isa la, o yì'm yɔ̀.>> Yimamala Bitrus zumyɛ̄ ma jāsā wa kiwàshèshè.