1 Yii niki Nyunu Wànghànwū, apúpúnɔ̀ wu nyunu wàkɛ́pyɛ̀, Maryamu wa zu Magdali wa Maryamu zu ya mazyi wa wya mbélā.

2 Yiibeli, zyókù júùjú, dizyi ázéchɔ̀ wu Adando tòli zu dɔ , ma ya mbélā , ma lò gɔ gā dɔ ma shí shina'a. 3 Apwèzu'a sáyìna zúkwáàkwá, átúkpá'a mòmbò sáyìna mbwòfyɔ̄. 4 Áwándósèdì hwo kàzi wa dì'wàjɔ̄ɔ̀jɔ̄ ma kwèkwè hwo kà sáyìna kwā. 5 Ázéchɔ̀ zɛ̀ yí wáwà la,<< Ni káwa sázī yɔ̀, dizyi m yìnɔ̀ la ni hwoi hwāzú Yesu waa wa lò táfyī 6 U yi maa yɔ̀; u dà'a dɔ ló, sáyìna yiiyi waa u zɛ̀ lá. Bē mazyi ni wya bē waa wa lò'u náni lá. 7 Yimamala, ni ya mɔ̄mɔ̄ mazyi ni zɛ̀ yi áwátu'a la, <U dàdɔ yi bé ki ló ma kɛ́pyɛ̀ yí'ni ya'a Galili. Ni hwoi wya u yi bē li.> M lò zɛ̀ yi ni mánì.>>

8 Yiibeli, wáwà li me mbélā ní mɔmɔ, wa hwo kàzi dedee wa mbònwú, ma shìshɔ̀ ya zɛ̀ yi áwátu'a. 9 Yiibeli Yesu gbàyi wā wā. Ma zɛ̀ la, << Ni mgbangye>> Wa bē dò'u, ma lò'u bá hwápà ma wá'u. 10 Yimamala, Yesu zɛ̀ yi wa la, << ni ká wa kàzī yɔ̀. Ni ya mazyi ni zɛ̀ yi zyēyī m la wa ya Galili; wa hwoi wya m yi beli. >>

11 Dédēwaa wáwà lá hwoi nyàshɔ hwoi yāàyā lá, wándósèdì wanati ya fu gá ma zɛ̀ yí adakumbwa wàshūwɔ̀ sásá wú wàkwò lá. 12 Dédēwaa áwádakumbwa gbàyi wa wácha ma lò nūmá, ma yi ndósèdì banji buu, 13 ma zɛ̀ yi wa la, << Ni zɛ̀ la, < Áwátu'a bē súnɔ̀ ma lò u lò dédēwaa i hwoi náná la.> 14 Ázyí la ma fè bé dóshī, i hwoi wa u yi zɛ̀zyí ni kà hwoi dò >> 15 Yimamala, wándósèdì li lò banji li pà ma sá wu wa zɛ̀ yi wa la. Mamá waa wa gbòtà zyī li gbógbó ba nyunu wa zyìná.

16 Yiibeli, àtú kwazɔ̄ idezezu ya Galili, ma né gā be waa Yesu zɛ̀ yi wa la wa ya la. 17 Dédēwaa wa wya u la,wa wa u; dedee wanati táwàshú. 18 Yibeli Yesu bē dò wa ma zɛ̀ la, <<Wa hwō sásá gbā wà hwoi dɔ wa bēèmyɛ̄ la yi'm. 19 Yimamala, ni ya bé panku yii bē sásá mazyi ni lò'wa hwokà tú, ni sá'wa batisma yiifu zyì Dā, wa Ngo, wa Nidi Wànyɛ̄nyɛ̄, 20 ni kà tà'wa mazyi wá zɛ̀ndɛ̀ wúsásá waa m yí'ni nū wà sá lá. Ami gɛ̀ wa'ni hwoi dùdù gbɛ̀n, gbógbó dédē lò yi kɛ̀ .>>