1 Dédēwaa Yesu lò tòli zū ishina gā bē zyoku lá, ápanku ndàbè lò bē'uni. 2 Ápà zū wàbā wútòtò gàhwɔ̄ dì lá bē kàli lò zú bē zyoku yii pyɛ̀'a, ma zɛ̀ la, <<Adando, o ma shó ní, lò'm dàgba.>>

3 Yesu ndāvo gwà'udì ma zɛ̀ la, <<M shó,>> Yesu zɛ̀ la, <<Lò yúùyú!>> Yiibebeli wútòtò gàhwɔ̄ dì'a lò kɛ̀. 4 Yiibeli Yesu zɛ̀ yí'u la, <<Fá! Káwa zɛ̀ yí pazukponu yɔ̀. Dedee ndāfā ya dò ádākúmbwá mazyi ú wya'o, kà ishina mazyi ánɔ́nɔ̄ ú zɛ̀ndɛ̀ la, wútòtò lò kɛ̀bwā lá, ya kúfà sáyìna yiiyi waa Dɔ̀ Musa zɛ̀ lá.>>

5 Dédēwaa Yesu kà Kapernaum lá, ndósèdì wàshuwɔ̀ àwu Roma zū bē dò'u ma vá'u la, 6 <<Adando, ángo'm wàwūnù yi tòwú ná yiibe wúnáná yii ndō, yi dàdɔ kà yɔ̀ ma yi wyafyì wàbɛbɛ lá.>>

7 Yesu zɛ̀ yí'u la, <<M ngyi bē ma lò'u yi dàgba.>>

8 Ndósèdì wàshūwɔ̀ àwu Roma lá zɛ̀'undɛ̀ ní la, <<Adando, m gbā kē wàyí'o bē ndō'm yɔ̀. Yínū kin, ángo'm lò yi dàgba. 9 Dizyi ami yii vo wáshuwɔ̀ wàbā gbā kā'm lá dúdú, m bā soja hwoi vo'm. M ngyi yí ndó wàyila nū la, <Ya!>u yi ya, m ngyi yí ndó wàyimá nū la, <Be!> u yi be, m ngyi yí nyà'm nū la, <Sá wú wàyila!> u yi sá'u.>>

10 Dédēwaa Yesu fá mamá lá, àgbashu lò'u pà, u zɛ̀ yí wándó wà hwoi be'uni lá, <<Zyíbyɛ̀ waa ngyi zɛ̀ yí'ni ní, m gbā wya pàzu yiifu Isrela wàbā byɛ̀ shuwɔ̀ mamá ló yɔ̀. 11 M ngyi zɛ̀ yí'ni la, apanku ndàbè hwoi zū zúdɔ wa vyívyò bē hwoi shí bé dùdù wa Ibrahim, wa Ishaku, wa Yakubu yiifu Chɔ̀ wàyii dɔ lá. 12 Dedee áwándó wàhwoi zyē àwu Chɔ̀ lá, wa lò'wa hwoi tá wè myɛ yii bēwàsèfē, yii bē waa wa hwoi shèki ma hwoi pā nyí'wa lá.>> 13 Yiibeli Yesu gbá zɛ̀ yí ndósèdì lá, <<Ya ndō! Áwú waa o zɛ̀ndɛ̀ ishina'a lá, lò yi sá.>>

Ángonyà ndósèdì lá lò dàgba yiifu dédē lá pwá.

14 Dédēwaa Yesu kà ndō Bitrus lá, u wya vyó Bitrus wàwūwà ná yiibe wúnáná yi tò lamba. 15 Yesu gwà'uvo yii vo'a, alamba me'uni, u dàdɔ ma sá wúzyī yí'wa.

16 Dédēwaa nyunu lò kwò lá, apanku hwo wándó wàbā zyɔ̀ yii dì'wa lá bē Yesu, Yesu lò nidi wàbɛbɛ ká zumyɛ wa zyí nū'a ma lò wándó wàtòwú lá hwo dàgba sásá. 17 U sá mamá mazyi ázyí waa Ishaya ándówyapyɛ̀ zɛ̀ lá ú lò kà zyíbyɛ̀, yi zɛ̀ la,

<<Áhu vodia lò'i wútòtò lòdɔ

ma lò'i dōdì tɛ̄ zumyɛ̄.>>

18 Dédēwaa Yesu wya panku ndàbè lò'u tábílíkā lá, u yí wátú'a nū mazyi wákyanú ya zyɛ̄. 19 Yiibeli ándótà Dɔ̀ Musa bē dò'u ma zɛ̀ la, <<Andótàwú, m ngyi be'oní yi ya bē sásá waa o ma ya ní.>>

20 Yesu zɛ̀ yí'u la, <<Abɛ́fubyɛ́ bā shī waa wa hwoi ná ní, ányī wàyi pē yii dɔ bā ndō, dedee Ango Panku bā bē wàlò ishina hwāní yɔ̀.>>

21 Ápazu yi tú zɛ̀ la, <<Wàsèndo, ḿ ya lò ada'm zyì pùnū.>>

22 Dedee Yesu zɛ̀ yí'u la, <<Be'mni, mazyi ó me wándó wàhuuhu ní wálò wándó wàhūùhū'wa zyì.>>

23 Yesu lò kà fu kɔ̀, áwátu'a lò be'uni. 24 Mamá kin wa wya áwɔ̀ fyù wàshuwɔ̀ dà yiifu núkù, yimamala ányázyà né yi gbòkyā kɔ̀. Dedee Yesu gɛ̀ lò náná. 25 Áwátú ya dò'u ma lò'u zèná, wa hwoi zɛ̀ la, <<Adando, lò'i tɛ̄ la, i lò yi hu!>>

26 Yesu zɛ̀ yí'wa la, <<Awuni wándó zyíbyɛ̀ wàtítíìntí, áyɛ̄ sá waa ni hwoi sázī ní?>> Yiibeli u dàdɔ ma yi áwɔ̀ wa nyázyà nū wàsā li, áwɔ̀ wa nyázyà lò pà.

27 Agbashu lò panku pà, wa hwoi mbyēshé la, <<Āchɛ̄ panku wànī yi lá? Kwā áwɔ̀ wa nyázyà hwoi sá wú waa u zɛ̀ lá!>>

28 Dédēwaa Yesu lò kyā bà zyɛ̄ zyoku Áwágadara lá, u gbàyi wa wánù ápà ipyɛ wàzu bé mbélā lá. Wánù hwoila bā zyɔ̀ ma hwoi wándó sá shà hwoi ngāngɛ̄ wa nɔ́nɔ̄ lá, ápanku hwoi zū nyashɔ li yɔ̀. 29 Kin wa gbá lò kito sèni la, <<Ango Shidɔ, áyɛ̄ waa o yi fú yii bé'i ní? O bē wàtà'i fyì gbógbó bà dédē waa Shidɔ shē lá ní?>>

30 U gbā nāshɔ̄ wa beli yɔ̀, àbè luma buu hwoi zyī. 31 Àzyɔ̀ hwoi vá Yesu la, <<O ma lò'i ká zumyɛ ní, lò'i sù dó fu bè luma hwoi má.>>

32 Yesu zɛ̀ yí'wa la, <<Ni ya!>> Yimamala wa zumyɛ ma ya kà fu bè luma. Sásá bè luma hwoila shìshɔ̀ tòlī yii nū búwà ya kàfu núkù ma hwo hu yiifu lape.

33 Áwándó pyō luma hwo shè ya fu gá, ma lò zyí sásá gbòtà wa wú wàkwò wa wánù ipyɛ hwoila wàbā zyɔ̀ lá. 34 Yiibeli sásá panku wàhwoi gá lá zumyɛ mazyi wáya dò Yesu. Waa wa wya'u lá, wa vá'u mazyi ú me zyoku'wa ní.