1 Dédēwaa Yesu lò zyí zɛ̀ bwā wa áwátu’a idezepyɛ̀ lá, u dàdɔ yii beli ya pyɛ̀ mazyi ú tàwú, ú kà dádɔ̀ zyí Shidɔ yiifu gá wàhwoi Galili lá. 2 Dédēwaa Yohana yiifu táfyì ma fá wú waa Kristi yi sá lá, baptisma u chō áwátu’a ya 3 mbyē’ushé la, << Áwo gbaa yi ndótɛpa waa Yohana ndó sá baptisma zɛ̀ la, u yi bē lá kwɛɛ í lò zú hwali yiishina pàzu kɛkɛ ní?>> 4 Yesu zɛ̀ yí’wa la, <<Ni kàsɛ ya zɛ̀ yí Yohana wú waa ni fá ma kà wya lá: 5 Abòzú hwoi wyabe àkábá hwoi kyēkyū, wándó wàbā wútòtò gàhwɔ̄dì lá áwútòtò’wa lò kɛ̀, akochu hwoi fá zyí zɛ̀zɛ̀, áwándó wàhūùhū hwo dà, áwándó chɛ̀ fá dɔ̀wàdáàdá àwu shévyā wàsàsà. 6 Ánwúmbòmbò yi wu ápà wàyi mɛ̀nwú ishina’m yɔ̀ lá!>> 7 Dédēwaa áwátu Yohana hwoi ya’wa lá, Yesu pi dà zyí Yohana wàzɛ̀ yí bèpanku la, <<Áyɛ̄ waa ni zumyɛ mazyi ni ya wya yii sáchɔ́ ní? Ni ya wya byɛ́ waa wɔ̀ yi sā’wa hwoi hwò lá kwɛɛ? 8 U ma yi mamá yɔ̀, áyɛ̄ waa ni zumyɛ ma ya wya ní? Áwánù mbyadì wa túkpá wàsàsà? Aayì, áwándó wàhwoi wè wúchɛ́ wàsàsà lá, hwoi sukpa ku. 9 Lá yɛ̄ waa ni ya wya yii myɛ ní? Andówyapyɛ̀? Eba, ḿ zɛ̀ yí ni, u kāgbá ndówyapyɛ̀ buu. 10 Ahu waa zyí’a tāàtā yiifu fā yi zɛ̀ la,

<<M ngyi chō ndózɛ̀chɔ̀’m chɔ̀ yi kɛ́pyɛ̀ yí’o,

ándó wàlò nyàshɔ’o yi mbyā dɛ̀dɛ̀ bà zú’u lá.

11 Ḿ zɛ̀ yí ni zyíbyɛ̀! Yiifu mbàmbà wáwà, Yohana ndó sá Baptisma lá kā’wa sásá ní, dedee ándó wàzōnwū kā yiifu ndochɔ̀ wu Shidɔ lá, kā’u ní. 12 Dà yiifu dédē wu Yohana ándó sá Baptisma lá be tama, àchɔ̀ wu Shidɔ yi wya fyì wa ngɛ̄, ápanku wàbɛbɛ fú lò chɔ̀ wu Shidɔ fyé. 13 gbógbó mazyi Yohana ndó sá baptisma ú bē lá, wándówyapyɛ̀ wa dɔ̀ wu Musa zɛ̀zyí yiishina chɔ̀ wu Shidɔ . 14 Nyunu waa ni ma hwoi zɛ̀ndɛ̀ wa ázéchɔ̀’wa ní, Yohana gbaa yi Iliya waa wa zɛ̀zyí’a la, u yi be lá ní. 15 Ápà wàma bā chùchú wàfá ní, ú fá.

16 <<Wa yɛ̄ waa m ngyi lò panku wàtama ya yi sé wa’u ní? Wa hwoi sáyìna zyetifyi wà hwoi zyízyó yi fīfí ti, hwoi bá bugɛ zyó’wa ndɛ̀ la,

17 <<I mwɛ̀ tufɛ̀lɛ́ yí’ni,

ni nghà wa gbòzyó;

I chòvyū ki

ni nghà wàshèki.>

18 Dédēwaa Yohana be lá, u yi zyī buu yɔ̀, u yi wā zyàwā buu yɔ̀, dedee wa zɛ̀ la, <U bā nídì wàbɛbɛ.> 19 Ango Panku be ma yi zyī, ma yi wā, wa zɛ̀ la <Wya ndó zyī wúzyī buu, ándó wā zyàwā buu, àbugɛ wándó pà gbā wa <<wándó sá wúwàbɛbɛ.>>> Dedee áyìyì wu Shidɔ yi tà di’a yii bé wúsáàsá’a.>>

20 Yiibeli Yesu hwa áwágáwashuwɔ̀ hwoila nū dizyi u sá wugbashu’a buu yiifu’wa, dedee wa me wúwàbɛbɛ’wa ní mazyi wa mbya beshí’wa yɔ̀. 21 Yesu zɛ̀ la,<<Shàmákɛ̀ló, ápanku wu Korazin! Shàmákɛ̀ló, ápanku wu Betsayida! Wa ngaa zɛ̀ la, áwúgbàshú waa m sá yiifu’ni lá, yii Áwátaya wa Áwábasayida ní, wa ngaa hwoi mbyā beshí’wa nashɔ-nashɔ wa wúkɛ̀ wàshúki wa chúpyù pwò dì. 22 Dedee m ngyi zɛ̀ yí’ni, anyunu wàhwàkwɛ́ Shidɔ yi wyashishi panku wàhwoi Áwátaya wa Áwásidon yi kā’ni ní. 23 Áwo Kapernaum, o yi fú ú lò’di’u dɔ gbógbó ya gwà dɔ? Aayì, o yi kà pyù. Wa ngaa zɛ̀ la, áwúgbàshú wàsá yiifu’u lá, sá yii Sodom ní, ú ngaa kà yiiní bà zyina. 24 Dedee m ngyi zɛ̀ yí’ni, anyunu wàhwàkwɛ́, Shidɔ yi wyashishi Sodom lá, yi kā’ni ní.>>

25 Yiifu kyūli Yesu zɛ̀ la, << M tá’o mamgba, Ada, Adandō wà yii dɔ wa bēèmyɛ̄ lá, dizyi o lò wú wàhwoila yìyò yii bé wándó wàbyɛzu wa wándó wàbā yìyì, ma lò pòfā tà zyetifyi wàtiti. 26 Eba, Ada, áwú wàsàsà vyā’odì lá mánì. 27 Ada’m lò wúsásá ndavo yí’m. Apazukponu yì Ngoli yɔ̀, Ada tanwú’a gbaa yì’u ní, apazukponu kàwa yì Ada yɔ̀, Angoli tanwú’a wa ándó waa u shē mazyi ú lò pòfā tà’u lá.

28 <<Ni be bé’m, sásá wuni wándó wà hwoi wya fyì wa wúchɛ́ wàndabɔ lá, m ngyi yí’ni nghànwū. 29 Ni lò gyūnūnɛ̀’m sè dini ní, mazyi ni fyé wú yii bé’m, dizyi m ngyi ndózyínyà yɔ̀ ma yi ndóshina lòdɔ yɔ̀ yiifu nidi, ni kà hwoi nghànwū yiifu nwúdì’ni. 30 Àgyūnūnɛ̀’m patashi, áwúchɛ́ waa m ngyi sèni ní lá gba ndabɔ yɔ̀.>>