Mateus 14

Wa lò Yohana wàyi sá Baptisma lá ishina kè

1 Yiifu dédē li Hirudus fá zyí buu yiishina Yesu, 2 u zɛ̀ yí áwányà’a la, <<Yohana wàyi sá Baptisma lá gbaa yiinì; ahu waa wa lò’u dà yii bé ki ní! Áwú wàsá waa u dò gbā ma yi sá wugbashu buu lá manì.>>

3 Hirudus kɛ́pyɛ̀ lò Yohana pà ma lò’u tá wa gbàlàgbà hwā fu táfyì yiishina Herodias àwà ngoyī’a Filip, 4 dizyi Yohana yi zɛ̀ yí’u lá,<<U bā sàsà yiibe dɔ̀ mazyi ó lò Herodias bà yɔ̀.>> 5 Hirudus yi fú mazyi ú lò Yohana bwā, dedee u yi sázī Áwáyahuda dizyi wa hwoi wya’u sáyìna ándówyàpyɛ̀.

6 Dédēwaa nyunu mbàmbà wu Hirudus kà lò vekà be lá, ango wu Herodias gbòzyó yii pyɛ̀’wa, áwúli vyā Hirudus dì lò kādɔ 7 lá u génū wa kidàdà wàyí’u wú waa u ma mbyeshé sásá. 8 áyī’a dózyí yí’u lá, u zɛ̀ la, <<Yí’m ishina Yohana wàyi sá Baptisma.>> 9 Ánwúzáàzá lò ku pà, dedee yiishina ki waa u dà yii pyɛ̀ áwá pàkyù’a lá, u yínū la, áwú waa u yi fú lá wa sá 10 ázyēndō ku Hiridus lò Yohana ishina kè yii tá. 11 Wa lò ishina’a lò yiifu wú be yí nguwáwà li, u lò chá yí yī’a. 12 Áwátú Yohana be lò kwā lò ma lò zyì. Yiibeli wa ya ma lò zɛ̀ yí Yesu.

Yesu yí panku idipaichɔndoide ichɔ wúzyī

13 Dédēwaa Yesu fá zyí ki Yohana ándó sá batisma lá, u dàdɔ kyómá wa kɔ̀ ma ya’a be waa pazukponu yii ní yɔ̀ lá. Apanku fá mamá lá, wa me gá’wàni ma hwoi be’uni. 14 Dédēwaa Yesu lò tòli ma wya bè panku lò kādɔ lá, azushishi’wa lò’u pà, u lò wándó wàfá vyā yɔ̀ lá dàgba.

15 Anyizɔli, áwátu be dò’u ma zɛ̀ la, <<Abe’a yi lá bā wuzukponu yɔ̀, nyunu kà lò’a kwò ló. Me bè panku hwoi lá ní wa ya’wa, mazyi wa kà gáwàtiti wa hwɛ wúzyī yí di’wa.>>

16 Yesu zɛ̀ yí’wa la, <<U bā sàsà mazyi wa ya’wa yɔ̀. Awuni ni yí’wa wúzu wàzyīìzyī.

17 <<Wa zɛ̀ yí’u la, <<I bā bredi ichɔ wa zyé ipyɛ̀ kɛ̀ ló.>>

18 U zɛ̀ yí’wa la, <<Ni lò wa chá be yí’m yii maa.>> 19 U yí panku nū mazyi wá shí ishina byɛ́, yiibeli u lò bredi ichɔ wa zyé ipyɛ̀ lá lò, u lò zú jā dɔ, ma tá mamgba ma lò bredi hwoila téká sásá. Yibeli ma lò yí áwátu’a, áwátu’a lò gà yí bè panku. 20 Sásá’wa zyī ma lò mufu zɛ̀, áwúzyī wànati lá, áwátu’a hwo tikishɛ mwɛ̀mwɛ̀ idezepyɛ̀. 21 Àbè panku wàzyī wúzyīli lá, kāgbá idipaichɔndoide ichɔ, dizyi wa hwɛ̀ wáwà wa zyetifyi yɔ̀.

Yesu kyēkyū yiishina lape

22 Yiibeli Yesu yí áwátu’a kà kɔ̀ ma kyā nú ya zyɛ̄ kɛ́pyɛ̀ yí’ú, áhu gɛ̀ lò sāli wa bè panku ma yí’wa nū wàgànyá. 23 Dédēwaa Yesu lò gàfā wa bè panku lá, u lò né ya ishina gā vodi’a mazyi ú jāndɛ̀. Dédēwaa nyunu lò kwò lá, u yii beli tàtànwú’a, 24 dedeeli, àkɔ̀ lò kɛ́pyɛ̀ ya benashɔ wa zyoku ló, ányázyà yi sù kɔ̀ wa wɔ̀ wàsā lò ishina té’u lá.

25 Dédēwaa be fu lò kyà la, Yesu lò ishina té’wa, yi kyēkyū yiishina lape. 26 Dédēwaa áwátu wya’u yi kyēkyū yiishina lape lá, wa lò kàzi ma zɛ̀ la, <<Anidi ndówàhūùhū,>>wa dá kito wa zī.

27 Yesu zɛ̀ yí’wa mɔmɔ la,<<Ni lò nwú byɛ̄! Ami. Ni ká sázī yɔ̀.>>

28 Bitrus zɛ̀ la, <<Adandō, u ma yi wo ní, yí’m nū mazyi ḿ kyēkyū yiishina lape be dò’u.>>

29 Yesu zɛ̀ la, <<Be.>> Yiibeli Bitrus lò tòli zumyɛ yiifu kɔ̀ ma dà kyū yiishina lape lò ishina té Yesu. 30 Dedee dédēwaa Bitrus wya wɔ̀ lò gbakpo lá, u lò kàzi ma yi shìli minɛ ní, u dá kito la, <<Adandō, sá zá’m ní!>>

31 Yiibebeli Yesu ndavo ma lò’u pà, ma zɛ̀ la, <<Andó byɛ̀ wàtitinti, áyɛ̄ sá waa o yi mɛ̀nwú ní?

32 << Dédēwaa wa lò kà kɔ̀ lá, áwɔ̀ lò pà. 33 Yiibeli áwátú’a wàhwoi fu kɔ̀ lá, ngya’o, hwoi zɛ̀ la, <<Yi byɛ̀ o yi Ngo Shidɔ.>>

34 Dédēwaa wa lò nú kyābwā lá, wa lò bà zyoku Jenesaret. 35 Waa panku wàhwoi beli lò Yesu yìkyà lá, wa zɛ̀chɔ̀ yí di’wa shèkwà zyokuli ánɔ́nɔ̄ chá wándó wà fá vyā yɔ̀ be dò Yesu 36 ma vá’u mazyi ú me wándó wà fá vyā yɔ̀ lá wa gwà’uvo yii nū túkpá’a wàyádì, sásá wándó wàgwà’uvo lá hwo dàgba.