Mateus 17

Yesu lò di’a zá

1 Yii niki ishinzyi, Yesu lò Bitrus lò wa’u, wa Yakubu wa Yohana ngoyī Yakubu ma lò’wa lò ya dɔdɔ yii ishina gā, wa hwoi beli tànwú’wa. 2 Yiibeli u lò zu pàzu kɛkɛ yii pyɛ̀’wa. Azú’a lò nyànyà sáyìna nyunu, átúkpá’a lò mombo sáyìna beyá. 3 Yiibebeli áwátu’a isa hwoila wya Musa wa Iliya hwoi vyāshé wa Yesu. 4 Yimamala Bitrus zɛ̀ yí Yesu la, <<Adandō, u sàsà waa i hwoi maa lá, nyunu waa u ma vyā’odì ní, m ngyi dá dáwà isa, zu, wuo, zu wu Musa, zu wu Iliya.>> 5 U yii fu zyí wàzɛ̀zɛ̀, ábèhwa wànghálá-nghálá tòli be’wa, ahuna zyí yiifu bèhwā lá yi zɛ̀ la, <<Ango’m gbaa yiinì, ándó waa m ngyi shó lá; m fá vyā’a lò kādɔ. Ni fá zyí’a! 6 Dédēwaa áwátu fá huna zyíli lá, ázī wàlò kāgbá’wa dɔ lá, wa kwèkwè lò zú be zyoku. 7 Yesu be gwà’wa vo yii dì ma zɛ̀ la,<<Ni dàdɔ, niká sázī yɔ̀.>> 8 Dédēwaa wa lò ishina dɔ lá, wa wya wuzukponu yii beli yɔ̀, ákèké Yesu waa wa wya minɛ ní. 9 Dédēwaa wa hwoi tòli yiishina gā lá, Yesu bwà’wa vo la,<<Ni káwa zɛ̀ yí pazukponu wú waa ni wya lá yɔ̀ gbógbó Ango Panku ma dàdɔ yiibe dì wàhūùhū pùnū.>> 10 Áwátu mbyē’ushé la, <<Lá áyɛ̄ sá waa áwándó tà dɔ̀ wu Musa hwoi zɛ̀ la, Iliya kɛ́pyɛ̀ yi be ní?>> 11 Yesu zɛ̀ la, <<Yibyɛ̀, Iliya yi be ma lò wú sásá yi mbya. 12 Dedee ḿ zɛ̀ yí’ni, Iliya kɛ́pyɛ̀ lò’a be ló waa wa yìkyà’u yɔ̀ ma sá’u wú wàvyā’wa dì ní. Mamá waa Ango Panku kà yi wyafyì yii vo’wa ní.>> 13 Yiibeli áwátu lò yìkyà la u yi zɛ̀ zyí wa wa yiishina Yohana wàyi sá Baptisma lá.

Yesu lò zyɔ̀ ká zumyɛ yii dì Ngowánùzu

14 Dédēwaa wa lò kàsɛ yiifu bè panku lá, ápazu gbe di’a bà Yesu ma kàli yii pyɛ̀’a ma zɛ̀ la, 15 <<Adandō, wyashishi ngo’m, u yi pà kpikpi, àfyì waa u yi wya lá lò buu. U kwò fu pyù buu, u kwò lape buu. 16 M lò’u ya dò áwátu’u, dedee wa lò dàgba kà yɔ̀>> 17 Yesu zɛ̀ la, <<Áwuni panku wàtama wàbā zyíbyɛ̀ yɔ̀ nàti ni wa wúwàbɛbɛ lá, m ngyi shí wa ni gbógbó bà nyunu wàni ni? Bá yi puna waa m ngyi pànwú wa ni ní? Ni lò ngoli be maa.>> 18 Yesu nyá zyɔ̀ ndɛ̀, u zumyɛ yi dì ngoli, yiibebeli u lò dàgba.

19 Yiibeli áwátu be dò Yesu kyó ma mbyē’ushé la, <<Áyɛ̄ sá waa i hwoi ká zyɔ̀ zumyɛ kà yɔ̀ ní?

20 <<Yesu zɛ̀ yí la, <<Yiishina ni ba zyíbyɛ̀ wàtitinti lá. Ḿ zɛ̀ yí’ni zyíbyɛ̀, o ma ba zyíbyɛ̀ titinti sáyìna ngyì fyī zu wàtí waa wa ba’u la mustad, o yi zɛ̀ yí gā lá la, <Dàdɔ yii maa ya bewàmu> u yi dàdɔ. Wuzukponu yi kāgbá ni dɔ kà yɔ̀. 21 Wa ndɛ̀wàjāàjā wa nūwàsèsè waa zyɔ̀ wàmamá yi zumyɛ ní.

Yesu kà zɛ̀ zyí yiishina ki’a.

22 <<Dédēwaa wa ya gbayi sásá wa yi Galili lá, Yesu zɛ̀ yí’wa la, <<Wa lò Ango Panku yi lò hwa panku vo. 23 Wa lò’u yi bwā, nyunu isa u yi dàdɔ yi hwonwu>>Abēbè lò áwátu pà.

Agba wu Táwàwáshidɔ

24 Yesu wa áwátu’a be fè Kapernaum lá, áwándó wàhwoi pà gba wu Táwàwáshidɔ lá be dò Bitrus ma mbyē’ushé, <<Andótàwú ni yi hwa gba wu Táwàwáshidɔ yɔ̀? 25 U zɛ̀ la, << Eba, u yi hwa.>>Dédēwaa Bitrus lò kàsɛ be futá lá, Yesu gbaa kɛ́pyɛ̀ zɛ̀ zyí ní. U mbyeshé la<<Siman, áyɛ̄ waa o wya yiishina zyí lá ní? Áwá nɔ̄ waa ku denmyɛ hwoi pà banji gba yiibe’wa ní, yii bé zyē’wa kwɛɛ yiibe áwápàkyù?>> 26 Bitrus zɛ̀ la, <<Yiibe áwápàkyù.>>Yesu zɛ̀ la, <<Ázyē’wa hwoi hwa gba yɔ̀.>> Yesu zɛ̀ la, 27 <<Yiishina í ká lò kà áwándó wàbɛbɛ yii bé wa yɔ̀ lá, ya núkù mazyi o tá lii. Azyé waa o yi pà kɛ́pyɛ̀ má; lò’u nū pòfā, o yi wya shɔ́wàmòmbò yii nū’a. Lò tɛ mazyi ó lò yí’wa agba’m wa wuni manì.>>