1 << <Àchɔ̀wàsáàsá wàyii dɔ lá yi mamá. Nyunu zu àwàsendo zumyɛ pupunɔ mazyi ú hwo wándó sákolo àwu banji wàsá’u kolo yiifu dā’a. 2 U zɛ̀ndɛ̀ wàhwā’wa tɔ̄ banji waa wa hwoi hāwātɔ̄ àwu nyunu zukponu lá, ma lò’wa sù ya hwoi sá’u kolo yiifu dā’a.

3 Dédēwaa shɔ́ isùngyɔ̀ sá lá, u zumyɛ ma dò wándó wanati sā hwoi ti hwoi sá wuzukponu yɔ̀. 4 Andó dā zɛ̀ yí wa la,< Awuni dedee ni ya dā’m mazyi ni sá kolo, m ngyi hwa’nitɔ wàsàsà. > 5 Yimamala wa lò ya.

<< Andó kà mbya’a zumyɛ nyitò wa shɔ́ isā, ma hwo wándó kolo. 6 Gbógbó shɔ́ ichɔ̄ wànyizɔ u kà mbyā wàzumyɛ ma wya panku sā hwoili. U mbye’wa shé la, < Áyɛ̄ sá wa ni sā hwoili kyaakya hwoi sá wuzukponu yɔ̀ ní?>

7 Wa zɛ̀ yí’u la, << Yiishina pazukponu yí’i kolo yɔ̀ lá,>

<<U zɛ̀ yí’wa la, < Áwuni dedee ni ya sá kolo yii dā’m.>

8 << Dédēwaa nyunu lò kwò la, ándó wàbā dā lá zɛ̀ yí ápà wàyi jā’uzú yii dā lá la, <Bá wándó sákolo ndɛ̀ mazyi ú hwa’watɔ̄ banji’wa, hwātɔ̄ zu ishina wándó kɛɛkɛ lá bē ishina wándó wàkɛ́pyɛ̀.>

9 <<Áwándó sá kolo waa wa lò’wa yiifu àshɔ́ ichɔ̄ lá ánɔ́nɔ̄ be pà banji kolo àwu nyunu zukpo. 10 Yimamala dédēwaa áwándó waa wa lò’wa kolo kɛ́pyɛ̀ lò be lá, wa lò nwú sā ni la, wa hwoi pà banji wàbuu. Dedee, abanji’wa kà yi zunkponu wa wándó waa wa hwo wa kɛɛkɛ lá. 11 Dédēwaa wā lò banji pà lá, wa nwínwí yii niki wàsendo’wa. 12 < Ápà hwoila waa wa hwō’wa kɛɛ̀kɛ lá, sá kolo àwu shɔ́ zukponu kɛ̀ló,> wa zɛ̀ la, <o hwa’watɔ̄ kà gyegye wa’i, áwui wàtò betò sá kolo wa bàpyù yii nyunu kwò nyunu lá.>

13 U zɛ̀ yí pà zu yiifu áwándó sá kolo lá la, << Abugɛ’m, m gba zyī bētò’o yɔ̀. Abanji kolo wu nyunu waa o zɛ̀ndɛ̀ lá waa m hwā’otɔ̄ ní yɔ̀? 14 Pà banji’o mazyi ó ya’o. M shó wàhwā ndó waa m kōlò’u kɛ̄ɛ̀kɛ̄ lá gyēgyē wa wuo. 15 M ba gba wa sá wú waa nwú m shó wa banji m yɔ̀? Kwɛɛ o yi sápa wa m yishina m ba nwú wa sásɔ̀ la?>

16 << Yimamala, wàkɛɛkɛ lò kā wàkɛ́pyɛ, wàkɛ́pyɛ̀ lò kà wàkɛɛkɛ.>>

17 Dédēwaa Yesu yi kà Urushalima la, u lò áwátu a hwo ya kìká ma zɛ̀ yi wa la, 18 << I hwoi né ya Urushalima, yiibe waa wàlò Ngo Panku ndavo yí áwádakumbwa wàshuwɔ̀ wa áwándó tà Dɔ̀ wu Musa mazyi wá hwà’u kwɛ́ wá lò’u bwā. 19 Wa lò’u yi kōlò yí wándó wa hwoi Áwáyahuda yɔ̀ la mazyi wa hwo u wɔ̀, mazyi wa zɛ̀ yɔ̀, wa kà lò’u dábà bé fyī. Yifu nyunu wàhwāsa u lò yi dà ma yi hwonwu! >>

20 Yibeli, áyī wu zyē Zabadi bē dò Yesu wa zyé a, ma lò kunuba wè zyoku ma vá’u.

21 Yesu mbyē’u shé la, << Áyɛ̄ wa o yi fu ni? >>

U zɛ̀ la, <<Ngmángbá yi zyē m ipyɛ̀ hwoila, apazu ú shí zyɛ̄ vonsɔ́, apazu ú shí zyɛ̄ vonzyī ndō chɔ̀’o. >>

22 Yesu zɛ̀ yí’wa la, << Ni gba yì wú waa ni hwoi vá lá yɔ̀, ni hwoi wā gè àwu fyì waa m be yi wā lá kà?>>

Wa zɛ̀ yí’u la, <<I hwoi wā kà.>>

23 Yesu zɛ̀ yi wa la, << Ni hwoi wa yiifu gè’m, wa shí vonsɔ m kwɛɛ vonzyī m wa ba gba wa zɛ̀ wa li yɔ̀. Ada m wa yi dɔ la bá mbya bē li yishina wándó wa u shé la ni.>>

24 Dédēwaa áwátu’a kwazɔ ide lò zyíli fá lá, wa hwo sáàpá wa Yakubu wa Yohana. 25 Yesu lò wa bándɛ̀ gbàyi ma zɛ̀ yí’wa la, << Ni yìnɔ̀ la, ádóshī wándó wàhwoi Áwáyahuda yɔ̀ lá bā gba yiishina’wa, áwáshuwɔ̀’wa hwoi tà gba yishina’wa dúdú. 26 U lò yi kà mamá yiifu’ni yɔ̀, ápà wàma fú ú lò ndó wàshuwɔ̀ yiifu’ni ní, ú lò dia kà nyà àwu wándó wànati, 27 ándó wà ma yi fú ú lò kà wàkɛ́pyɛ̀ u lò kà kɛ́n u kɛ́pyɛ̀ lò kà nyà 28 sáyìna Ango Panku, wàbe mazyi wá wá’u yɔ̀ lá, dedee u be wàwá panku ma lò nwú yí wàhwɛ̄ panku buu.>>

29 Dédēwaa Yesu wa áwátu’a me Jeriko ní lá, àbè buu be’u ni. 30 Abòzú pàipyɛ̀ shí hwoi nyashɔ, waa wā fá la Yesu ba yi nwázū ni, wā kōlò huna dɔ ma zɛ̀ la,<< Wasendo, ngo u Dawuda, wya shishi yi!>>

31 Abe li bwà wa vo ma zɛ̀ yi wa la wa bàndɛ̀, dedee wā kwá huna kwaani ma zɛ̀ la, <<Wasendo , ngo u Dawuda, wya shishi yi!>>

32 Yesu sāli ma bá’wa ndɛ. U mbye wa shé la, << Áyɛ̄ waa ni hwoi fú mazyi ḿ sá yí’ni ní?>>

33 Wa zɛ̀ndɛ̀ la,<<Wasendo!>> << I hwoi fú í wyabe.>>

34 Yesu nyézú wya’wa, ma wya shishi’wa ma gwà’wa vo yii zú. Yiibebeli, wa wyabe ma be’u ní.