Mateus 21

Yesu Kà Urushelima wa Gwá

1 Dédēwaa Yesu wa áwátu’a lò be bà Urushelima lá, wa ya Betfage yii bé gā wu fyī zu, Yiibeli Yesu chō áwátu’a pà ipyɛ̀ chɔ̀, 2 U zɛ̀ yí wa la, << Ni kà gá wàtí wàyii pyɛ̀ ni la, yiibeli ni hwoi wya lēbànā wa ngu’a dɛ̀dɛ̀. Ni lò wa fɛ̀ mazyi ni lò’wa chá bē yí’m. 3 Apà wàma zɛ̀zyí zu ní, ni zɛ̀ yí’u la, Adandō gbaa yi fú ní, u lò yi meni yí ni.>>

4 Áwúli sá mamá mazyi zyí waa ándówyàpyɛ̀ zɛ̀ lá ú lò gyila:

5 << Zɛ̀ yí Áwáisrela la, Wya, aku’ni lò ishina té’ni yi bē manì,

u yi ndó lò ishina dɔ yɔ̀ u né ishina ngu lēbànā,

yiishina túkpá, yiishina ngu lēbànā. > >>

6 Áwátu’a ya ma sá yiiyi waa Yesu zɛ̀ yí’wa la, wa sá lá. 7 Wa lò lēbànā wa ngu chá be, ma lò tukpá byá’wa dì, Yesu lò shí shina’a. 8 Abè panku hwo tukpá’wa hwoi byá nyashɔ, wándówanati gé zyèwú hwoi byá nyashɔ. 9 Abè hwoi pyɛ̀ wa wándó wàhwoi niki’a lá hwoi dákito, Osana, Ango wu Dawuda!>> <<Avosɔ̀ yi wu wándó wàbe yiifu zyì Adando lá!>>

<< Í ngya Shidɔ!>>

10 Dédēwaa Yesu kà Urushelima lá, sásá panku wàhwoi gáwàshūwɔ̀ lá hwoi mbyē shé la,<<U yi nɔ̄ ní?>>

11 Abèpanku zɛ̀ la, <<Ahu gbaa yi Yesu ndówyàpyɛ̀ wàzu Nazaret yii Galili lá ní.>>