Mateus 24

Yesu Zɛ̀zyí Akɛ̀kɛ̀ Denmyɛ

1 Yesu me táwàwáshidɔ ní dédēwaa u támyɛ yi ya lá, áwátu’a be dò’u ma tà’u ámyīìmyī táwàwáshidɔ. 2 U zɛ̀ la, <<Eba, ni wya wú wàhwoila sásá. Ḿ zɛ̀ yí’ni, wa hwoi me gɔ́ zukponu ní yi nati yii beshí’a yɔ̀, wa lò’wa hwoi hwó wè zyoku.>>

3 Yesu shí yii ishina gā àwu fyī Oliv, áwátu’a be dò’u kyó má. Wa mbyeshé la, <<Zɛ̀ yí’i dédēwaa sásá wú wàhwoila yi kwò lá, kà wa wú yi kwò ma yi tà dédē bēèbē’o wa ákɛ̀kɛ̀ denmyɛ lá.>>

4 Yesu zɛ̀ yí’wa la, <<Ni kó dini, mazyi ni káwa me pazu ní ú byè’ni ní yɔ̀. 5 Apanku ndabe hwoi zɛ̀ la, wa hwoi zɛ̀zyí wum, ma be hwoi zɛ̀ la, <Ami gbaa yi Kristi ní!> ma hwoi byè panku ní ndabe. 6 Ni hwoi fá kito kɛ̀ bàbà wa ni kà wa tɛ̄ kɛ̀ wàyii benashɔ, dedee ni káwa sázī yɔ̀. U lò kà kén mazyi wu wa hwoila ú sá mamá, ákɛ̀kɛ̀ kà nàtī. 7 Àchúpanku wàndabe hwoi bā zyī wa Àchúpanku wàndabe, àchɔ̀ hwoi ba zyī wa àchɔ̀. Ámbwɔ̄ bē yiiní, zyoku sásá hwo yi júùjú. 8 Sásá wu wa hwoila hwoi fyì wàkɛ́pyɛ.

9 << Yiibeli, wa hwoi tà’ni fyì makà hwo’ni yi bwā, àchúpanku wàndabe hwoi zé’ni dizyi’m. 10 Nyunu li, panku ndabe hwoi me nyàshɔ zyí Shidɔ ní ma hwoi sá diwa bɛfù ma hwoi zé diwa. 11 Áwándówyapyɛ̀ àwu zyígé hwoi be ma hwoi byè panku ndabe ni. 12 Ishina wúwàbɛbɛ wàhwo buu lá, ashóòshó lò yi tashuma, 13 dedee wándó wà ma lò nwúgbā ya kèli, u be yi dò nwàzu. 14 Dedee wa hwoi zɛ̀zyí chɔ̀ wu Shidɔ la yi denmyɛ̄ ú lò yi kà áshévyā yi denmyɛ̄ sásá waa kɛ̀kɛ̀ denmyɛ̄ yi bē ni. 15 << Yimamala ni ma wya <wúsɔ́ sā hwoili yii bē wànyɛnyɛ, waa pazukponu yi ndō yɔ̀ lá,> 16 Yiibeli, wàhwoi Yahudiya shìshɔ̀ né gā. 17 Apazukponu wàyi dɔ tá ndō’a ká tòli be kōlò wúzu yiifu tá yɔ̀ 18 Andó wàyii dā yi kàsɛ̄ be wàhwo wúchɛ́’a yɔ̀. 19 Nyunu li wándó wà yi wā dì ipyɛ̀ wa wándó wa hwoi yi zyē wàmyɛɛ ma hwoi wya fyì! 20 Ni jāndɛ̀ yí Shidɔ la, ni hwoi shè yiifu dédē wōhwɔ̀ kwɛɛ yiifu Nyunu wànghànwū yɔ̀! 21 Apanku hwoi wyà fyì buu kágba dédēwaa wa mà denmyɛ lá. 22 Wā ma kwá nyunu wa hwoila kàsɛ̄ yɔ̀ ni, pazukponu be yi shí kà yɔ̀, dedee yiishina wándó waa Shidɔ shē lá, u lò nyunuli yi kwákàsɛ̄. 23 Yiifu nyunuli, apazu ma zɛ̀’u la,< Wya, Ndótɛpa yi ni!> Kwɛɛ,< U yi mánì!> Ni ká wa zɛ̀ndɛ̀ yɔ̀. 24 Dizyi ndótɛpa wúzyīgé wa wándówyàpyɛ̀ wuzyigé hwoi pwèzu makà hwoi sá wu gbàshú buu mazyi wa byè panku kwa wa Shidɔ shē lá ma hwoi sákà ni. 25 Wya, m lò kɛ́pyɛ̀ zɛ̀ yi ni.

26 << Yimamala, apazu ma zɛ̀ yi ni la, <U yi mánì, yi sáchɔ́ ,> ni ká ya myɛ̄ yɔ̀; kwɛɛ < U yùyò yiifu tá,> ni ká zɛ̀ndɛ̀ yɔ̀. 27 Kwɛina zú kwáàkwá fyù wàyi dà yii zúdɔ gbógbó be yi zyìli yii vyívyò lá, mamá waa kàsɛ Ngo Panku yi yi ní. 28 Sásá bē wa kwā ma hwoi ni, ngyífyī hwoi kwazɔ̄ yiibeli.

29 Yii niki fyì wu nyunu wa hwoila

<< < nyunu lò yi sèfē,

àsɔ̀ yi mbò gɛ̀ yɔ̀;

áchí zu dɔ hwo kwèkwè,

sásá wu wa hwoi dɔ la hwoi júùjú.>

30 << Yi fu nyunuli wu Ngo Panku yi pwèzu yi dɔ, sásá àchù panku ndabe hwoi shúki. Wa hwoi wya Ngo Panku yi be yiifu bèhwā wàyii dɔ, wa gba, wa gwá wàshuwɔ̀. 31 U kà yi chō zyēchɔ̀ mazyi wa nwɛ fyū, wa kà hwoi hwo wándó waa Shidɔ shē lá hwo kwazɔ̄ zu. denmyɛ̄ sásá

32 Yimamala, ni fyé wúzu yiibe fyī gbánkòlò, dédēwaa u ma yi chà zyèwú, ni hwoi yìnɔ̀ la, ádɛ̀ɛ́nɔ̀ lò kwò. 33 Yimamala, ni ma wya wú hwoila sásá ní, ni hwoi yìnɔ̀ la, ábēèbē Ngo Panku lò be bà’i zɔ yii nūkyɔ́. 34 M ngyi zɛ̀ yí’ni byɛ̀, ápanku yi kɛ̀ yɔ̀ gbógbó wú wàhwoila hwoi sá. 35 Adɔ wa bēèmyɛ̄ hwoi kɛ̀, dedee ázyí’m yi kè yɔ́.

Apazukponu Yì Nyunu Ábēèbē Kristi Yɔ̀

36 << Apazukponu gba yì kyū kwɛɛ nyunu, ázyēchɔ̀ wa hwoi dɔ dedee kwɛɛ Ngo li, gba yìnɔ̀ bēèbē’a yɔ̀, Ada tànwú’a gbá yìnɔ̀ ní. 37 Yiiyi waa u yiifu nyunu àwu Nuhu lá, mamá waa u yi kwò nyunu bēèbē Ngo Panku ní. 38 Dédēwaa làpè mwɛ̀ ló yɔ̀ lá, apanku hwoi zyī ma hwoi wa, wánù hwoi sèbā, wa hwo zyēwáwà yi nù, gbógbó nyunu waa Nuhu kà fu kɔ̀; 39 dedee wa gba yì wú wàyi sá yɔ̀ gbógbó fyù bē lò wa hwo ya sásá. Mamá waa u yi yi ni nyunu bēèbē Ngo Panku. 40 Apa ipyɛ̀ hwoi sá kolo yi dā, wa lò zu yi kōlò chá ya ma hwoi me zu ní. 41 Áwáwà ipyɛ̀ hwoi shé kuna, wa lò zū yi kōlò chá ya ma hwoi me zū ní.

42 << Yimamala, ni hwo zu hwali, dizyi ni ba yi nyunu waa Adandō yi be la yɔ̀. 43 Dedee ni yìnɔ̀ la: Andó ndó ma yìnɔ̀ la vyú yi bē súnɔ̀, u yi shíli ma lò zú yi hwali ma yi me ndō ni yí vyú u kà ni yɔ̀. 44 Yimamala, ni mbyā di ni, dizyi Ango Panku yi bē nyunu waa pazukponu lò nwú sáni yɔ̀.

45 << Ánɔ̄ yí nyà wa bābyɛ̀ makà byɛ̄zú ní, waa wàsendo lò’u kà dóshī nwúnyà wa hwoi fu ndō’a la mazyi u yi wa wúzyī yiifu nyunu gyēgyē? 46 U yi sàsà mazyi wàsendo u kàsɛ̄ bē dò nwúnyà yi sá kóló waa wa dà’u ni la. 47 M ngyi zɛ̀ yi ni zyibyɛ̀, u lò sásá wu waa u bā la hwoi kwà’u vo. 48 Nyunu waa nyàli ma bā nwúwàbɛbɛ ma zɛ̀ yiifu nwú’a la, < Wàsendo’m lò shí myɛ nashɔ,> 49 Nyunu u ma tà áwányà wanati fyī, ma yi zyī ma kà yi wā wā wándó wa hwoi wa shā. 50 Wàsendo nyàli yi be dédēwaa u sá nwú yi ni yɔ̀ kwɛɛ nyunu waa u yi yìnɔ̀ yɔ̀. 51 Wàsendo lò nwúnyà li yi gé wìlìwìlì ma lò nyàli yi kwazɔ̄ wa wándó sá bɛfù, yiibeli, kishèshè wa nyíwàpāàpā.