Matu 25

Adɛ̀ wa byí

31 << Nyunu waa, Ngo Panku ma bē yiifu gwá’a wa sásá zyēchɔ̀ wa’u dùdù, u yi shí bé dù àwu gwá chɔ̀’a wà yii dɔ lá. 32 Sásá panku denmyɛ hwoi gbàyi pyɛ̀’a. Yiibeli u lò’wa ndō ipyɛ̀, sáyìna yiiyi waa ndópyōwú yi gàfā dɛ̀ wa byí lá. 33 U lò dɛ̀ hwoi wè zyɛ̄ vonzyī ma lò byí hwoi wè zyɛ̄ vonsɔ́.

34 << Yibeli Àku yi zɛ̀ yi wándó wa hwoi zyɛ̄ vonzyī la, < Bē, áwuni wa Ada’m kwāndɛ̀ yí’ni lá; ni be zyīfí ndō chɔ̀ wuni waa wa lò mbyā ndii-ndii yiibe màmà denmyɛ lá. 35 Ámbɔ̄ bwā’m ni yi’m wúzyī, nwúzyàwā zá’m ni yí’m zyàwā, M ngyi pàkyù ni kà tà’mkyù , 36 M ngyi kyē myàmbyà ni hwo wúchɛ́ wè’m dì, M tòwú ni fú fyī yí’m, wa lò’m pà hwā tá ni be ma wya’m.>

37 << Yiibeli, wándó wàbā byɛ̀ hwo zɛ̀ yí’u la, < Adando, nyunu wa ni wa i wya’u yi bwā ámbɔ̄ ma yi’o wúzyī ni, kwɛɛ nwúzyàwā zá’u ma yí’o zyàwā ni, > 38 Nyunu wa ni waa i wya’u yi pàkyù ma tà’ukyù ni, kwɛɛ o yi kyē myàmbyà ma hwo wúchɛ́ wè’o dì ni, 39 Nyunu wàni waa o tòwú kwɛɛ yiifu táfyì waa í be wya’u ní?>

40 << Aku yi zɛ̀ yí wā la, < M ngyi zɛ̀ yi ni zyibyɛ̀, sásá wu wa ni ma sá yi zyēyī’m wa vo’wa lò zō, ni sá yi’m mánì. >

41 << Yiibeli, u yi zɛ̀ yi wándó wa hwoi zyɛ̄ vonsɔ́ lá la,< Dàdɔ yi pyɛ̀’m, Awuni waa wa hwa’ni nūli lá, ni kà fu pyù waa wa mbya yi pà wàbɛbɛ wa ázyēchɔ̀’a. 42 Ámbɔ̄ bwā’m ni yí’m wúzyī yɔ̀, nwúzyàwā zá’m ni yí’m zyàwā yɔ̀, > 43 M ngyi pàkyù ni tà’mkyù yɔ̀ , M ngyi kyē myàmbyà ni hwo wúkɛ̀ wè’m dì yɔ̀, M tòwú ni fú fyī yí’m yɔ̀, wā lò’m pà hwa táfyì ni bē wya’m yɔ̀.>

44 Wā hwoi zɛ̀ la, < Adando, nyunu wa ni wa i wya’o yi bwā ámbɔ̄, kwɛɛ, yi zánwú zyàwā, kwɛɛ yi pàkyù, kwɛɛ myàmbyà, kwɛɛ yí tòwú, kwɛɛ wā lò’o pà hwa táfyì ma sázá’o ní yɔ̀ ní?>

45 << Aku yi zɛ̀ yí wā la, < M ngyi zɛ̀ yi ni zyibyɛ̀, sásá wu waa ni ma sá yi zyēyī’m waa vo’a lò zō la ni sá yí’m yɔ̀ mánì.> 46 << Yiibeli,wa hwoi kà fu pyù wa gbógbógbògbò, dedee, wándó wàbā byɛ̀ hwoi dò nghànwū wàgbógbó gbògbò.