1 Apupunɔ, sásá Adakumbwa wàshūwɔ̀ wa wácha wu bè li hwo zɛ̀ndɛ̀ la, wa lò Yesu yi bwā. 2 Wa lò’o dɛ̀, ma lò’u chá ya dò Bilatus, dóshī zyoku.

3 Dédēwaa, Yahuda wà lò Yesu kpátí lá wya fyì waa wa hwoi tà Yesu lá, ánwú’a lò bɛbɛ, u lò shɔwàmombò 30 chá kàsɛ̄ ya yi áwádakumbwa wàshūwɔ̀ wa wácha. 4 U zɛ̀ la, << M lò sá dà, dizyi m lò pà wa sá wúwàbɛbɛ yɔ̀ kpátí>>

Wa zɛ̀ yi’u la, << Awui zyī la yɛ̄? Wú wàli yi zyí’u.>>

5 Yimamala, Yahuda lò banji li nyá wè fú Táwàwáshidɔ ma ya. U ya ma lò vyù dó di’a huna. 6 Áwádakumbwa lò shɔwàmombò li hwo ma zɛ̀ la,<< U ba sàsà mazyi i lò banji la hwā fu banji táwàwáshidɔ yɔ̀, dizyi u yi banji sà. >> 7 Yimamala, wa zɛ̀ndɛ̀ ma lò banji li hwɛ̄ zyókù wu ndómyīpá mazyi wa dò mbéla àwu pàkyù. 8 Yiishinali waa wa hwoi ba’u la zyókù wu sà kà bà zyìná ni. 9 Yiibeli, zyí waa Irimiya ndówyapyɛ̀ lò gyila ni:<< Wa hwo shɔwàmombò idizuzede, átí waa Áwáisrela hwɛ̄ yiishina lá ma ni, 10 ma hwo wa hwɛ̄ zyókù àwu ndómyīpá, yiiyi waa Adando yí’m nū lá.>>

11 Yesu sā yii pyɛ̀ dóshī zyoku, Ádóshī li mbyē’ushé la, << Áwo gbaa yi ku wu Áwáyahuda ni? >>

Yesu zɛ̀ la, << Eba, yiiyi wa’o zɛ̀ la manì. >>

12 Dédēwaa adakumbwa wàshūwɔ̀ wa wácha té’o zyí la, zɛ̀zyí zukponu yɔ̀. 13 Yiibeli, Bilatus mbyē Yesu shé la, << O fá zyí waa wa hwoi té’oní lá yɔ̀?>> 14 Dedee Yesu pò’wa nū yɔ̀, u zɛ̀zyí zukponu yɔ̀; áwúli lò kà dóshī zyoku áwúgbàshú.

15 Nyunuli, lò kà wú wàsáàsá dóshī nyunu dùdù mazyi u fā dà li yi ndó waa wa hwo pà wè tá waa bè ma shē. 16 Nyunu li wa bā pazu wàbɛbɛ waa wa pà’u hwa tá zyī la Barabas. 17 Yimamala dédēwaa bèpanku gbayi lá, Bilatus mbyē’wa shé la, <<Anɔ̄ waa ni hwoi fú mazyi ḿ me’u ní yí’ni ní, Barabas, kwɛɛ Yesu waa wa hwoi bá’u la Kristi lá ní? >> 18 Dizyi u yìnɔ̀ la Yishina wā shó yɔ̀ la, wa lò’u lò ndāvo yí’u ní.

19 Dédēwaa Bilatus shí shina dù ndóhwàkwɛ́ lá, àwà’a chōchɔ̀ la, << Lò vo’o tɛ yiifu zyí panku wàsá wúwàbɛbɛ yɔ̀ lá, dizyi àsunɔ̀ zyina m wyafyì yiibe ndó yiishina’a.>> 20 Dedee adakumbwa wa wácha byè bè panku ni mazyi wa shē Barabas mazyi wā lò Yesu bwā.

21 Adóshī mbyē’wa shé la, << Ánɔ̄ yiifu pà ipyɛ̀ hwoila waa ni hwoi fú mazyi ḿ me’u ní yí’ni ní? Wa zɛ̀ la, <<Barabas!>>

22 Bilatus mbyē’wa shé la, << Áyɛ̄ wa m pi yi sá wa Yesu waa wa ba’u la Ndótɛpa ni? >>

Wa zɛ̀ la, << Lò u táfyī!>>

23 Bilatus mbyē wa shé << Yishina yɛ̄? Áwú wa bɛ̄bɛ̄ wàni waa u sá ní? Dedee sásá wa dákito ma zɛ̀ la, << Lò u táfyī!>>

24 Dédēwaa Bilatus wya la, u yi kē ní wa wa kà yɔ̀, wa hwoi fú wá dà zyí lá, u kwá lape ma hwo vo’a tō yii pyɛ̀’wa. U zɛ̀ la,<< Avo’m yiifu sà pàlá yɔ̀,>> << Wa li yi zyí ni!>>

25 Sásá bè li zɛ̀ndɛ̀ la, << Asa a yishina i wa zyē i!>>

26 Yibeli, u me Barabas ní yí’wa. Ma lò Yesu ndāvo yi wa da u, ma lò u táfyī.

27 Yibeli, wándósèdì wu dóshī lò Yesu chá ya fu sukpa a dóshī ma lò u shèkwà . 28 Wa lò u gbò myàmbyà ma hwo wúchɛ́ wa nyànyà wè’u dì, 29 wa kà kpá bíshī sé ma lò wó’u shina, ma lò kutɛ̀ dó vonzyi, ma kàli yii pyɛ̀ a hwoi sá’u wɛ́. Ma hwoi zɛ̀ la, <<Shí gbógbó Aku àwu Áwáyahuda!>> 30 Wa chɛ́chɛ́ wè’u dì, ma kōlò kutɛ̀ ma dá’u shina. 31 Dédēwaa wa lò wɛ́ sá’u bwā lá, wa lò’u wúkɛ̀ wàgwɔ̄ɔ̀gwɔ̄ tɛ́ ma hwo túkpá’a zé’u ní.

32 Dédēwaa wa hwoi nyashɔ hwoi zumyɛ̄ la, wa gbàyi wa pazu wa zu Sayirin, wa ba u la, Siman, wa pà’u wu gba la u lò fyī li. 33 Wa fè bē zu wa ba u la, Golgota ( u yi tà la, Abe wu Puke Shina) 34 Yiibeli, wa yí Yesu zyàbā nūùnū wa wúzu wàjɛ̀jɛ̀, dedee niki waa u mbàwya lá, u nghà wàwā. 35 Dédēwaa wa lò u dábà bé fyī la, wa lò wúchɛ́’a gà yí di’wa wa shéèshē. 36 Wa shí hwoi beli, wa hwo zu jā u yibeli. 37 Wa tā zyí wàkpō’ubī ma lò bà shina’a yii dɔ la, <<Yesu gbaa yinì, Aku wu Áwáyahuda.>> 38 Wa hwo vyú kwazɔ ipyɛ̀ dábà bé fyī wa’u, ándózu yii zyɛ̄ vonzyi ndózu yii zyɛ̄ vonsɔ’a. 39 Ápanku wa hwoi nwázū la hwoi chō tè, ma hwoi jú shina wa 40 ma hwoi zɛ̀ la, <<áwo pà wa lò táwàwáshidɔ yi hwo ma lò u yi myī yiifu nyunu isā lá, tɛ̄ diu ! Tòli zu be fyī, o ma yi Ngo u Shidɔ ni! >>

41 Mamá wa áwákù dakumbwa, áwándótà Dɔ̀ Musa wa áwácha sá’u wɛ́. 42 Wa zɛ̀ la, << U lò wanati tɛ.>> << dedee, u tɛ dia kà yɔ̀! Ahu gbaa yi Ku àwu Isrela ní! U tòli yishina fyī be zyókù, mazyi i zɛ̀ndɛ̀ wa’u. 43 U zɛ̀ndɛ̀ wa Shidɔ. Shidɔ u lò u tɛ̄ tama, u ma shó u ni, dizyi u zɛ̀ la, < M ngyi Ngo wu Shidɔ.>>> 44 Kwā áwávyú waa wa hwo’wa dábà bé fyī dùdù wa’u lá, kà chō’u tè.

45 Dà zu shɔ́ idezepyɛ wànyitò gbógbó ya shɔ́ isā wa nyitò abe lò sèfē. 46 Wa lò shina té shɔ́ isa lá, Yesu shèki wa huna wàgbakpo la, <<Eloi, Eloi, lama sabatani? Tà la, << Shidɔ’m, Shidɔ’m, áyɛ̄ sá waa o me’m ni ní?>>

47 <<Dédēwaa wándó wa sā hwoili fá mamá lá, wa zɛ̀ la, << U yi ba Iliya ndɛ̀.>>

48 Yiibebeli, apazu yiifu’wa shìshɔ̀ ma ya kōlò gàsálà, ma lò’u dó fu zyàbā wàngháànghá, ma lò dó bé kutɛ̀, ma yi ngā wàyí Yesu mazyi ú wā. 49 Wándó wànati zɛ̀ la, << Tama ni me’u ní. Mazyi i wya kwɛɛ Iliya yi be ma lò’u yi tɛ̄ kà.>>

50 Dédēwaa Yesu kà mbya a dákito la, u lò nū tɛ̄.

51 Yiibebeli, túkpáwàgònúkyɔ́ wu táwànyɛ̄nyɛ̄ lò yà gàfā ipyɛ̀ dà zu dɔ be zyókù. Abēènmyɛ̄ júùjú, àgɔ́ hwo kyà. 52 Ámbélā hwō hwó ma lò pò, ākwā panku wànyɛnyɛ hwo dàdɔ. 53 Wa zumyɛ̄ me mbélā ní, niki waa Yesu lò dàdɔ yiibe ki lá, wa kà fu gá wànyɛ̄nyɛ̄, ápanku buu wya’wa.

54 Dédēwaa dóshī ndósèdì wa wándó wa hwoi jā Yesu zu la wya zyókù júùjú wa sásá wu wa sá la, wa lò kàzī, wa zɛ̀ la, << Zyíbyɛ̀ u yi Ngo Shidɔ! >>

55 Wáwà ndàbè hwo beli, ma hwo wya bē zu bēnashɔ. Wa bē u ni zu Galili ma hwoi sázá u ni. 56 Maryamu wàzu Magadala lá, wa Maryamu áyī Yakubu wa Yusufu, wa áyī wu zyē Zebedi.

57 Dédēwaa nyunu lò kwò la, ndówúchɔ́ zū zu Arimatiya, zyī la Yusufu be, u yi fu áwátu wu Yesu dúdú. 58 U ya ma dò Bilatus, ma mbyeshé kwā wu Yesu, Bilatus yínū la wa lò yi u. 59 Yusufu lò kwā lò, ma lò kpá wa túkpá wàpyoo, 60 ma lò’u hwā fu mbélā’a wàpyoo waa u kā yiifu gɔ́ lá. U gā gɔ́ wàshuwɔ̀ zu ma lò nūkyɔ́ mbélā chù ma ya’a. 61 Maryamu àwu Magadala wa Maryamu zu lá shí hwoi beli lò zú jā mbélā.

62 Bànábēkyà, niki nyunu wànghànwū, adakumbwa wàshuwɔ̀ wa Áwáfaris ya dò Bilatus. 63 Wa zɛ̀ la, << Wàsendo, i kyé la, dédēwaa u kà yi zyoo lá u byè’wa ní la, < Bà nyunu isā m kà lò yi dà.> 64 Yimamala, yínū mazyi wa hwo zu hwo jā mbélā ba nyunu isā. Áwátu’a ká bē lò kwā’a vyí mazyi wa zɛ̀ yi panku la u lò dà yɔ̀. Abyè wa kɛkɛ la be yi kà wa kɛ́pyɛ̀ la ni. >>

65 Bilatus zɛ̀ la, << Ni hwo ndósèdì ni ya lò nwú sá mbélā gyēgyē.>> 66 Yibeli, waa ya ma lò mbélā chù gyēgyē, ma kà lò ndósèdì hwa bé li.