Mateus 5

Àdɔ̀wàdáàdá Yesu Yiishina Gā

1 Yesu wya panku lò ndàbè, ma lò né ishina gā, ma ya shí li. Áwátu’a gbàyi ma lò’u tábílíkā, 2 u gbá pòfā nū’a ma yi tà’wa wú la,

Avosɔ̀ Wàbuu

3 <<Avosɔ̀ Shidɔ yi wu áwándó wàyì’wanɔ̀ la, wa nyànì nidi lá,

dizyi Àchɔ̀ wàyii dɔ lá yi wuwa!

4 Avosɔ̀ Shidɔ yi wu áwándó wàhwoi shèki lá,

dizyi Shidɔ gbaa yi pé’wa ní!

5 Avosɔ̀ Shidɔ yi wu áwándó wàhwo ishina’wa náli lá,

dizyi áwuwa gbaa hwoi zyīfí bēèmyɛ̄ ní!

6 Avosɔ̀ Shidɔ yi wu áwándó wàhwoi fá mbɔ̄ wa nwúzyà àwu wú wàgyēgyē lá,

dizyi Shidɔ yí’wa hwoi zɛ̀fu!

7 Avosɔ̀ Shidɔ yi wu áwándó wàhwoi wyashīshī wándó wànati lá,

dizyi Shidɔ yi wyashīshī’wa dúdú!

8 Avosɔ̀ Shidɔ yi wu áwándó wàbā nwú wànyɛnyɛ lá,

dizyi wa hwoi wya Shidɔ!

9 Avosɔ̀ Shidɔ yi wu áwándó wàhwoi pézyí lá,

dizyi Shidɔ yi bá’wa la, ázyē’a!

10 Avosɔ̀ Shidɔ yi wu áwándó waa wa hwoi tà’wa fyì ishina wàsá wú waa Shidɔ yi fú lá,

dizyi Àchɔ̀ wàyii dɔ lá yi wuwa!

11 <<Avosɔ̀ Shidɔ yi wuni nyunuwaa ápanku ma chō’ni tè, ma tà’ni fyì, ma té’ni zyí kɛ̄-kɛ̄kɛ̄ wàbɛbɛ àwu zyígé ishina ni hwoi be’mni lá ní. 12 Ni mbònwú mazyi ni shàáshà, dizyi ābetò kolo’ni wàshūwɔ̀ hwā’ni yii dɔ. dizyi mamá waa áwándówyapyɛ̀ wàkɛ́pyɛ̀ yí’ni lá wyafyì ní.

Áwándó Wàhwoi Bē Yesu ní lá Hwoi Sena Āmā wa Beyá

13 <<Ni hwoi sáyìna āmā àwu pànku sásá. Dedee nyunu waa āmā magadì wa àvyā’a, bā nyashɔ waa o kà yi sá’u yi vyāàvyā gɛ̀ yɔ̀. U lò kà wúwàtàánchɔ̀, yimamala wa lò’u yi nyámbyɛ́ wè myɛ̄, ápanku hwoi tébá yii ní.

14 <<Ni hwoi sáyìna bēyá àwu denmyɛ sásá. Àgáwàshuwɔ̀ waa wa myī’u yiishina gwū yi yùyò yɔ̀. 15 Ápàzukponu yi hwāpyù yiibe kyàngyà ma lò wú yi bē’u yɔ̀. Kin ú lò’u sè bé wúwàsèní, yii bē waa u yi yí nɔ́nɔ̄ yi bēyá yii futá lá. 16 Kà yi zukpo mamá, mazyi ábēyá’ni ú sánghánghálá yii pyɛ̀ panku, mazyi wá wya wúwàsàsà waa ni hwoi sá lá, mazyi wá ngyā Adā’ni wà yii dɔ lá.

Áwútàtà Yesu ishina Dɔ̀

17 <<Ni káwa gàzyíhwɛ̀ la, m be wàlò Dɔ̀ Musa wa wútàtà áwándówyapyɛ̀ sábɛ yɔ̀. M gba be wàlò’wa sábɛ yɔ̀, dedee m be wàyí wútàtà’wa ú lò kà zyíbyɛ̀. 18 Yibyɛ̀, m ngyi zɛ̀ yí’ni la, gbógbó dɔ wa bēèmyɛ̄ wálò zyìli lá, kwā ngyì wúwàtāàtā wàtítíntíì kwɛɛ àzyèwúchɔ̀ wàtítíntíì wàhwoi fu Dɔ̀ Musa lá, hwoi zyìli yɔ̀, gbógbó áwúsásá lò yi gyīlà. 19 Yimamala sásá pà wàma nghà kwā wú wàtítíntíì yiifu dɔ̀ ma tà wándówànati mazyi wásá zukponu mamá ní, u lò yi kà ápanku wàtítíntíì yiifu Chɔ̀ wàyii dɔ. Dedee sásá pà wàma zɛ̀ndɛ̀ wa Dɔ̀ ma tà wándówànati mazyi wá sá zukponu mamá ní, u lò yi kà ápanku wàshūwɔ̀ yiifu Chɔ̀ wàyii dɔ. 20 M ngyi zɛ̀ yí’ni la, nyunuwaa àbyɛ̀’ni ma kāgbá àwu áwándó tà Dɔ̀ Musa wa Áwáfaris yɔ̀ ní, ni hwoi kàfu Chɔ̀ wàyii dɔ lá yɔ̀.

Áwútàtà Yesu Ishina Àpáwàsáàsá

21 <<Ni kàpyɛ̀ fá Shidɔ zɛ̀ yí panku ndii la, <O yi bwā panku yɔ̀, sásá pà wàma bwā panku wa hwoi hwà’ukwɛ́.> 22 Dedee tàma m ngyi zɛ̀ yí’ni la, sásá pà wàma yi sáàpá wa ngoyī’a, wa hwoi hwà’ukwɛ́, sásá pà wà ma bá ngoyī’a la, <Àkyɔ̀!> wa hwoi chá’u yi ya tákwɛ́ wàshūwɔ̀, Sásá pà wàma bá ngoyī’a la, àkyɔ̀ wàbā lɛ̀ yɔ̀, u yii nūki wàya ndō pyù. 23 <<Yimamala nyunuwaa o ma yi ndāvo wúwàsásɔ̀’o yi yí Shidɔ yiishina gwūdù wàpyāndɛ̀ ma kyé la, ángoyī’o bā nūhwɛ̀ zū wa’o ní, 24 me wúwàsásɔ̀’o ní hwā pyɛ̀ gwūdù wàpyāndɛ̀ yii beli, ya lò diu mbyā wa ngoyī’o, mazyi ó pi kàsɛ lò wúwàsásɔ̀’o ndāvo yí Shidɔ ní.

25 <<Lò diu mbyā mwɔ̄mwɔ̄ wa wámà’o wàchá yi ya tákwɛ́ lá, sá dédēwaa ni kà hwoi nyàshɔ lá, kwɛɛ u ma mamá yɔ̀, u lò’o yi ndāvo yí ndógàkwɛ́, ándógàkwɛ́ lò’o yi ndāvo yí ndósèdì pi lò’o yi tá hwā fu táfyì. 26 Ázyíbyɛ̀ waa m ngyi zɛ̀ ní, o yi zumyɛ yii beli yɔ̀ gbógbó o lò banji kwɛ́ waa wa pà’o lá yi hwātɔ̄bwā.

Áwútàtà Yesu ishina báwàkyáàkyá

27 <<Ni kàpyɛ̀ fá Shidɔ zɛ̀ yí panku ndii la, <O yi kyábá yɔ̀.> 28 Dedee tàma m ngyi zɛ̀ yí’ni la, sásá pà wà ma jā wáwà zú àwu shɔ́wàmāàmā, u kàpyɛ̀ lò bákyá wa’u yiifu nwú’a mánì. 29 Yimamala nyunuwaa ázú vonzyī’u ma hwā’o yi sá wúwàbɛbɛ ní, lò’u shā támbyɛ́! U yi pà’otáshì ní buu mazyi o sáfyì àkélédì’u zukpo lá kā waa wa lò dìu mɛ̀mbɛ̀lɛ̀ yi tá hwā ndōpyù lá ní. 30 Nyunuwaa àvonzyī’u ma hwā’o yi sá wúwàbɛbɛ ní, lò’u kè mazyi ó lò’u támbyɛ́! U yi pà’otáshì ní buu mazyi ó sáfyì àkélédì’u zukpo lá kā waa dìu mɛ̀mbɛ̀lɛ̀ yi ya ndōpyù lá ní.

Áwútàtà Yesu ishina Bāwàgàgà

31 <<Wa kà zɛ̀ la, <Sásá pà wàma nghà wà’a, u yi yí’u āfā wàgàbā.> 32 Dedee tàma m ngyi zɛ̀ yí’ni la, Sásá pà wàma nghà wà’a, dizyi wúsásá wàmahwā gba ishina báwàkyáàkyá yɔ̀ ní, yiibeli u yi sá wúwàbɛbɛ wàyí’u yi kyábá nyunuwaa u makà bà nù zū, ànù wàkà yi bà’u lá, kà yi kyábá dúdú.

Áwútàtà Yesu ishina Kiwàdàdà

33 <<Ni kà fá wa zɛ̀ yí panku ndii la, <Káwa dàki àwu zyígé yɔ̀, dedee sá wú waa o dàki yí Adando la, o yi sá lá.> 34 Dedee tàma m ngyi zɛ̀ yí’ni la, ni káwa dàki zukponu yiifu dédēwaa ni hwoi génū lá yɔ̀. Ni káwa dàki wa dɔ yɔ̀ kin, dizyi u yi dù waa Shidɔ yi shí ní; 35 kwɛɛ wa bēèmyɛ̄ wàyi bē wàsè bá’a yii ní lá yɔ̀, kwɛɛ wa Urushelima wàyi àgáwàshuwɔ̀ àwu ku wàshūwɔ̀ lá yɔ̀. 36 O yi dàki wa ishina’o yɔ̀, dizyi o lò ngyì zyí zukponu yi vēkà mòmbò kwɛɛ wàpèpè kà yɔ̀. 37 Kin zɛ̀ la, <Eba> kwɛɛ <Aayi> dedee o ma zɛ̀ wúzu gbòkyā wú wàhwoila, u zube Ápawàbɛbɛ.

Áwútàtà Yesu ishina Wú Wàlò Hwātɔ̄ Kàshī

38 <<Ni kàpyɛ̀ fá Shidɔ zɛ̀ yí panku ndii la, áyīzú yi wàlò hwātɔ̄ kàshī wa áyīzú, kàwa nyí yi wàlò hwātɔ̄ kàshī wa nyí. 39 Dedee tàma m ngyi zɛ̀ yí’ni, ni kálò wúwàbɛbɛ waa pàzu sá’ni lá hwātɔ̄ kàshī yɔ̀. Nyunuwaa ápazu ma tá’o pitá yii gbákyì zyɛ̄ vonzyī ní, kà vēkà gbákyì zyɛ̄ vonsɔ́ yí’u dúdú. 40 Kàwa nyunuwaa ápazu ma chá’okwɛ́ yii tákwɛ́ dizyi áwúkɛ̀’o ní, me túkpá’o ní yí’u dúdú. 41 Nyunuwaa pàzu ma pà’o wu gbā lò’u wúchɛ́ ya kyilomita zukponu ní, lò’u ní lò ya kyilomita ipyɛ. 42 Nyunuwaa pàzu ma vá’o wúzu ní, lò yí’u, nyunuwaa pàzu ma fú ó hwā’u wúzu ní, lò hwā’u ní.

Áwútàtà Yesu ishina Wàshó Wàzé

43 <<Ni kàpyɛ̀ fá Shidɔ zɛ̀ yí panku ndii la, <Ni shó áwábugɛ’ni mazyi ni zé áwáwàzé’ni.> 44 Dedee tàma m ngyi zɛ̀ yí’ni la, ni shó áwáwàzé’ni mazyi ni jāndɛ̀ wè wándó wàhwoi tà’ni fyì lá, 45 mazyi ni hwo kà ázyē Ada’ni wàyii dɔ lá. Dizyi u yí nyunu’a yi vyì ya dɔ yiishina ápanku wàbɛbɛ wa ápanku wàsàsà, ma yí fyù yi tā yí wándó sá wúwàsàsà wa wándó sá wúwàbɛbɛ. 46 Nyunuwaa ni ma shó ákèké wándó wàshó’ni lá ní, Shidɔ yi hwa’ni tɔ̄ mamánī ní? Kwā wándó pà gbā hwoi sá mamá. 47 Nyunuwaa ni ma hwoi tá mamgba wa ákèké áwábugɛ’ni ní, ni sá wúzu kɛ̄kɛ̄ wa yiiyi waa wa hwoi sá gbɛ̀n lá mánì? Kwā áwándó wá wúhwɔ̀ hwoi sá mamá. 48 U lò kà kɛ́n mazyi ni lò kà ápanku wàgyīlà sáyìna yiiyi waa Ada’ni wàyii dɔ gyīlà lá!